Read Plautdietsch (Low German) – De Bibel Jona 2 Bible Online

Jona 2 - Plautdietsch (Low German) – De Bibel bible

Jona 2

¹Un de HAR schekjt eenen grooten Fesch, un dee schlukt Jona opp. Jona wia fa dree Doag, Dach un Nacht, em Fesch bennen.

²Un von doa em Fesch bäd Jona däm HARN, sienen Gott, aun un säd:

³En miene Noot, HAR, roopt ekj die aun, un du jeefst mie eene Auntwuat. Aus de Doot mie nämen wull, fruach ekj no Help, un du hieezhd mie.

⁴Du schmeetst mie en een grootet Mäa, wua daut väl too deep fa mie wia, un de Walen väl too huach fa mie wieren. Aul diene Walen fuaren äwa mie vebie.

⁵Ekj meend aul, ekj durf nienich mea ver die komen, un daut ekj nienich wada dienen heiljen Tempel seenen wudd.

⁶Ekj kunn mie schia nich wäaren. Ekj wia bloos too deep bennen un daut Wotakrut schlenjd sikj om mienen Kopp.

⁷Ekj wia unjen aum Foot von de Boaj, un dee Foot wull mie hoolen, oba du mien HAR un mien Gott hast mie ut aul daut rutjehowen.

⁸Aus mie daut aul soo wia daut ekj aules gonen loten must, docht ekj aun die, HAR, un du hieezhd mien Jebäd en dienen heiljen Tempel.

⁹Dee, dee sikj oppe Jetta veloten, vespälen de Jnod, dee bie die to haben es.

¹⁰Met miene Leeda woa ekj die danken; met mien Opfa woa ekj die preisen. Met mien Läwen woa ekj wiesen, waut ekj vesproaken hab. Daut es vom HARN, daut ekj jerat sie.

¹¹Dan räd de HAR to dän Fesch, un dee spieech Jona oppem Launt nopp.