Read Plautdietsch (Low German) – De Bibel 4. Mose 1 Bible Online

4. Mose 1 - Plautdietsch (Low German) – De Bibel bible

4. Mose 1

¹Daut ieeschte Joa aus de Israeliten ut Ägipten kjeemen, bleewen see en de Sinai Wiltnis. Dan aum 1. Dach von de 2. Moonat en daut 2. Joa, kjeem de HAR no Moses, aus hee een Dach en daut Vesaumlungszelt wia, un säd to am:

²Stalt emol faust, wooväl Menschen en daut gaunze Volkj Israel sent. Talt jieda Maun eenseln von de Famieljes un Volkjsgruppen,

³aul dee waut 20 Joa oolt un ella sent un waut fäich sent em Kjrich to halpen. Du un Aaron sellen dee bie äare Volkjsgruppen talen.

⁴Een Maun von jieda Staum, de väaschta von siene Volkjsgrupp, saul junt doamet halpen.

⁵De Mana, waut junt halpen sellen, sent Elizur, Schedeur sien Sän, vom Staum Ruben;

⁶Schelumiel, Zurischadai sien Sän, vom Staum Simeon;

⁷Nachschon, Aminadab sien Sän, vom Staum Juda;

⁸Netanel, Zuar sien Sän, vom Staum Isachar;

⁹Eliab, Helon sien Sän, vom Staum Sebulon;

¹⁰un dee waut von Josef staumen: Von Efraim: Elischama, Amihud sien Sän; un von Manasse: Gamliel, Pedazur sien Sän;

¹¹Abidan, Gidoni sien Sän, vom Staum Benjamin;

¹²Ahieser, Amischadai sien Sän, vom Staum Dan;

¹³Pagiel, Ochran sien Sän, vom Staum Asser;

¹⁴Eljasaf, Deguel sien Sän, vom Staum Gad;

¹⁵un Ahira, Enan sien Sän, vom Staum Naftali.

¹⁶Dit wieren dee, dee von mank daut Volkj aunjestalt wieren, aus de väaschte von de Stam, un wieren Leida von de Volkjsgruppen.

¹⁷Un Moses un Aaron kroagden dise Mana toop, waut hia oppjerieecht sent,

¹⁸un met dee äare Help vesaumelden see daut gaunze Volkj aun dän 1. Dach von de 2. Moonat, un muaken Listen von jieda Maun, waut 20 Joa un ella wia, un no de Volkjsgruppen un Famieljes.

¹⁹Soo worden dee en de Sinai Wiltnis jetalt, un daut wia, waut de HAR von Moses velangt haud.

²⁰De Nokomen, von Israel sienen ieeschten Sän Ruben, worden no daut Rejista von äare Aufstaumunk, no äare Volkjsgruppen un Famieljes no, biem Nomen jetalt, aula Mana, von 20 Joa un ella, waut fäich wieren toom Kjrich.

²¹Un vom Staum Ruben worden 46.500 jetalt.

²²De Nokomen von Simeon worden no äare Aufstaumunk, Volkjsgruppen un Famieljes no, biem Nomen jetalt, aule Mana von 20 Joa un ella, waut fäich wieren toom Kjrich.

²³Un vom Staum Simeon worden 59.300 jetalt.

²⁴De Nokomen von Gad worden no äare Aufstaumunk, Volkjsgruppen un Famieljes no, biem Nomen jetalt, aule Mana von 20 Joa un ella, waut fäich wieren toom Kjrich.

²⁵Un vom Staum Gad worden 45.650 jetalt.

²⁶De Nokomen von Juda worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

²⁷Un vom Staum Juda worden 74.600 jetalt.

²⁸De Nokomen von Isachar worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

²⁹Un vom Staum Isachar worden 54.400 jetalt.

³⁰De Nokomen von Sebulon worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

³¹Un vom Staum Sebulon worden 57.400 jetalt.

³²De Nokomen von Efraim worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

³³Un vom Staum Efraim worden 40.500 jetalt.

³⁴De Nokomen von Manasse worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

³⁵Un vom Staum Manasse worden 32.200 jetalt.

³⁶De Nokomen von Benjamin worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

³⁷Un vom Staum Benjamin worden 35.400 jetalt.

³⁸De Nokomen von Dan worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

³⁹Un vom Staum Dan worden 62.700 jetalt.

⁴⁰De Nokomen von Asser worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

⁴¹Un vom Staum Asser worden 41.500 jetalt.

⁴²De Nokomen von Naftali worden no äare Aufstaumunk, Volkjsgruppen un Famieljes no, biem Nomen jetalt, von 20 Joa un ella, waut fäich wieren toom Kjrich.

⁴³Un vom Staum Naftali worden 53.400 jetalt.

⁴⁴Dit sent de Mana waut Moses tald, met Aaron un de twalf Staumleida toop, waut äare Volkjsgruppen väastunden.

⁴⁵Un de gaunze Zol von de Israeliten, no äare Volkjsgruppen, dee 20 Joa un ella wieren, un aula fäich wieren toom Kjrich,

⁴⁶wieren 603.550.

⁴⁷Dee waut von dän Staum Levi wieren, worden nich met de aundre toop jetalt.

⁴⁸De HAR haud to Moses jesajcht:

⁴⁹Du saust däm Staum Levi nich met de aundre Israeliten toop talen aus dee, dee em Kjrich halpen.

⁵⁰Du saust de Leviten aunstalen, daut see bie de Woninj met däm Bewies von mienen Bunt, un waut doa nenn jehieet un aul daut Toobehia doatoo, deenen. See sellen de Woninj un aul daut Toobehia droagen un besorjen, un see sellen runtom de Woninj äa Loaga oppstalen.

⁵¹Jiedatsmol wan jie met jun Loaga wiedatrakjen, sellen de Leviten de Woninj oppnämen, un wan jie wada jun Loaga oppstalen, sellen see dee oppstalen. Un wan wäa dicht bie daut Zelt kjemt, dee doa nich to bestemt es, dee saul stoawen.

⁵²Un de Israeliten sellen sikj aula bie äare Armee, un bie äare Flag äa Loaga moaken,

⁵³oba de Leviten sellen sikj rom de Woninj met däm Bewies von mienen Bunt loagren, soo daut mien Oaja nich opp de israelitische Jemeenschoft komen woat. De Leviten sent veauntwuatlich fa de Woninj met däm Bewies von mienen Bunt.

⁵⁴Un de Israeliten deeden daut aula soo aus de HAR Moses daut väajesajcht haud.