Read Plautdietsch (Low German) – De Bibel 4. Mose 10 Bible Online

4. Mose 10 - Plautdietsch (Low German) – De Bibel bible

4. Mose 10

¹De HAR räd met Moses un säd:

²Moak die twee Trompeeten von jeprastet Selwa un bruck dee, om de Vesaumlunk tooptoroopen un wan daut Häa sikj saul reedmoaken toom loosreisen.

³Wan met de beid Trompeeten jeblost woat, saul de Jemeent sikj bie die ver däm Engank von daut Vesaumlungszelt vesaumlen.

⁴Wan mau met eene Trompeet jeblost woat, sellen sikj de Staumleida, waut Hauptmana äwa dusende en Israel sent, bie die vesaumlen.

⁵Wan jie sea lud blosen, sellen sikj de Loagasch oppmoaken, waut aun de oostne Sied ligjen.

⁶Un wan jie toom tweeden mol lud blosen, sellen sikj de Loagasch oppmoaken, waut nom Sieden han ligjen. Wan see wieda reisen sellen, dan sell jie lud blosen.

⁷Oba om de Vesaumlunk tooptoroopen sell jie mau soo jeweenlich blosen un nich een ludet Jeschrech moaken.

⁸Aaron siene Säns, de Priesta, sellen met de Trompeeten blosen; un daut saul eene Ordnunk fa aule Tieden sennen fa junt un june Nokomen.

⁹Wan jie en jun Launt toom Kjrich gonen jäajen june Fiend, waut junt unjadrekjen, dan sell jie lud blosen met de Trompeeten, daut aun junt jedocht woat ver däm HARN, junen Gott, un jie jerat woaren von june Fiend.

¹⁰Un soo uk, wan jie junt freien aun june Fastdoag un june Niemonen, sell jie met de Trompeeten blosen bie june Brauntopfa un Dankopfa. Dan woa ekj aun junt denkjen. Ekj sie de HAR, jun Gott.

¹¹Aum 20. Dach en de 2. Moonat en daut 2. Joa hoof de Wolkj sikj opp von de Woninj fa dän Bewies von däm Bunt.

¹²Un de Israeliten reisden loos ut de Sinai Wiltnis, un de Wolkj hilt aun en de Paran Wiltnis.

¹³Soo reisden see toom ieeschten mol loos no däm HARN sien Wuat derch Moses,

¹⁴un de Flag von daut Loaga vom Staum Juda jinkj daut ieeschte loos, eene Volkjsgrupp no de aundre. Un de Leida von äa Häa wia Nachschon, Aminadab sien Sän.

¹⁵Un von daut Häa vom Staum Isachar wia Netanel, Zuar sien Sän, de Leida.

¹⁶Un von daut Häa vom Staum Sebulon wia Eliab, Helon sien Sän, de Leida.

¹⁷Dan wort de heilje Woninj uteneen jenomen, un dan jinjen de Nokomen von Gerschon un Merari un druagen de Woninj.

¹⁸No däm kjeem de Aufdeelunk unja de Flag von Ruben sien Loaga, eene Volkjsgrupp no de aundre. Un de Leida von äa Häa wia Elizur, Schedeur sien Sän.

¹⁹Un von daut Häa vom Staum Simeon wia Schelumiel, Zurischadai sien Sän, de Leida.

²⁰Un Eljasaf, Deguel sien Sän, wia de Leida von daut Häa vom Staum Gad.

²¹Un dan muak de Grupp von Kehat sikj opp un druagen daut heilje Jereetschoft; un de Woninj wort oppjestalt, ea de Kehatita aunkjeemen.

²²Hinja dise jinkj de Aufdeelunk unja de Flag von Efraim sien Loaga, eene Volkjsgrupp no de aundre. Un de Leida von äa Häa wia Elischama, Amihud sien Sän.

²³Gamliel, Pedazur sien Sän, wia de Leida von daut Häa vom Staum Manasse.

²⁴Un Abidan, Gidoni sien Sän, wia de Leida von daut Häa vom Staum Benjamin.

²⁵No däm kjeem de Aufdeelunk unja de Flag von Dan sien Loaga aus latstet von aule Loagasch, eene Volkjsgrupp no de aundre. Un Ahieser, Amischadai sien Sän, wia de Leida von äa Häa.

²⁶Pagiel, Ochran sien Sän, wia de Leida von daut Häa vom Staum Asser,

²⁷un Ahira, Enan sien Sän, wia de Leida von daut Häa vom Staum Naftali.

²⁸Soo reisden de Israeliten loos, een Häa no daut aundre.

²⁹Moses säd to sienen Schwoaga Hobab, Reguel sienen Sän, von Midian: Wie trakjen doahan en daut Launt, wua von de HAR jesajcht haft, daut hee ons daut Launt jäwen woat. Komm met ons met, dan well wie goodet aun die doonen, wiels de HAR haft Israel goodet toojesajcht.

³⁰Hee auntwuad: Ekj well nich met junt met, ekj well en mien Launt no mien Frintschoft trakjen.

³¹Moses säd: Velot ons doch nich, wiels du weetst, wua wie ons enne Wiltnis loagren sellen, un du saust ons dän Wajch wiesen.

³²Un wan du met ons met kjemst, dan well wie daut goode waut de HAR aun ons deit, uk aun die doonen.

³³Soo trocken see von däm HARN sienen Boajch eene dree doagsche Reis wieda, un de Kjist met däm HARN sienen Bunt jinkj de dree Doag ver an, un wees an wua see sikj reiwen sullen.

³⁴Un däm HARN siene Wolkj wia äwa Dach äwa an, wan see ut daut Loaga trocken.

³⁵Un wan de Bundeskjist oppjehowen wort, säd Moses: HAR, wies die ons! Lot diene Fiend vestreit woaren un aul dee, dee die nich lieden kjennen, ver die flichten!

³⁶Un wan dee hanjesat wort, dan säd hee: Komm wada, HAR, no de Häad von dusende en Israel!