Read Plautdietsch (Low German) – De Bibel 4. Mose 12 Bible Online

4. Mose 12 - Plautdietsch (Low German) – De Bibel bible

4. Mose 12

¹Mirjam un Aaron räden jäajen Moses wäajen siene Fru, dee von daut Launt Kusch staumd. Hee haud sikj eene Fru von Kusch jefriet.

²Un see säden: Rät de HAR dan auleen derch Moses? Rät hee nich uk derch ons? Un de HAR hieed daut.

³Moses wia een sea deemootja Mensch, deemootja aus aule Menschen oppe Ieed.

⁴Un de HAR säd fuaz to Moses un to Aaron un to Mirjam: Got rut no daut Vesaumlungszelt, jie dree! Un see jinjen aule dree doahan.

⁵Dan kjeem de HAR rauf en däm Wolkjenstenda un kjeem bat en dän Engank von daut Vesaumlungszelt un roopt Aaron un Mirjam, un see jinjen beid doahan.

⁶Un de HAR säd: Horcht emol häa! Wan mank junt wäa een Profeet vom HARN es, däm well ekj mie openboaren enne Bildasproak, ooda en Dreem met am räden.

⁷Oba soo steit daut nich met mienen Deena Moses; am hab ekj mien gaunzet Hus aunvetrut.

⁸Ekj räd unja vea Uagen met am, soo daut hee daut vestunt un nich derch veschlotne Wieed, un hee sach mie en miene Jestault. Wuarom hab jie junt dan nich jefercht, jäajen mienen Deena Moses to räden?

⁹Un däm HARN sien Oaja brend opp jäajen an, un hee dreid sikj wajch;

¹⁰uk de Wolkj veschwunk von daut Vesaumlungszelt. Un kjikjt, doa wia Mirjam von de Leprakrankheit bedakjt, daut äare Hut witt wia aus Schnee. Un Aaron dreid sikj no Mirjam un wort en, daut see de Leprakrankheit haud,

¹¹un säd to Moses: Mien Har, lot dise Sind nich opp ons bliewen. Wie haben sea onbedocht jehaundelt un haben ons vesindicht.

¹²Lot Mirjam nich soo sennen aus een doot jebuarnet Kjint, daut haulf vefult es, wan daut von de Mutta kjemt.

¹³Moses schrieech nom HARN: Gott, heel ar doch!

¹⁴De HAR säd to Moses: Wan äa Voda ar em Jesecht jespäajen haud, wudd see sikj dan nich säwen Doag schämen? Lot ar säwen Doag aufjesondat buta daut Loaga sennen; no däm saul see wada oppjenomen woaren.

¹⁵Soo wort Mirjam säwen Doag aufjesondat buta daut Loaga. Un daut Volkj trock nich wieda, bat Mirjam wada oppjenomen wort.

¹⁶No dit veleet daut Volkj Hazerot un see stalden äa Loaga en de Paran Wiltnis opp.