Read Plautdietsch (Low German) – De Bibel 4. Mose 17 Bible Online

4. Mose 17 - Plautdietsch (Low German) – De Bibel bible

4. Mose 17

¹De HAR räd met Moses un säd:

²Saj Eleasar, däm Priesta Aaron sienen Sän, daut hee de Gloot Paunen, dee heilich sent, ut däm Braunt opphäft un daut Fia wajch streit.

³Wiels de Paunen von dise Sinda, dee omjekomen sent, sent heilich. Dee sellen to plaute Blajchploten jeklopt woaren om dän Aultoa to betrakjen, wiels see haben dee ver däm HARN jebrocht, soo daut dee heilich sent. Un dee sellen de Israeliten een Tieekjen sennen.

⁴Un de Priesta Eleasar neem de bronsne Paunen, waut de Mana, dee vebrent wieren, doahan jebrocht hauden, un schluach dee plaut to Blajchploten, om dän Aultoa to betrakjen.

⁵Dit wia een Tieekjen fa de Israeliten toom doaraun denkjen, daut kjeena, dee nich doatoo bestemt wia, un dee nich von Aaron siene Nokomen es, sikj nodren doaf, om Weiruak to opfren ver däm HARN, daut am daut nich soo jeit aus Korach un siene Baund, soo aus de HAR derch Moses to am säd.

⁶Aum näakjsten Morjen grumsaujd de gaunze Jemeent von Israeliten jäajen Moses un Aaron, un see säden: Jie haben däm HARN sien Volkj doot jemoakt.

⁷Un aus de Jemeent sikj jäajen Moses un Aaron vesaumeld, un sikj no daut Vesaumlungszelt dreid, dan wort daut von de Wolkj bedakjt, un däm HARN siene Harlichkjeit leet sikj seenen.

⁸Un Moses un Aaron jinjen bat ver daut Vesaumlungszelt.

⁹Un de HAR räd met Moses un säd:

¹⁰Brinjt junt wajch von dise Vesaumlunk; ekj well dee fuaz venichten! Dan schmeeten see sikj opp äa Jesecht.

¹¹Un Moses säd to Aaron: Nemm de Paunen un doo doa Fia nenn vom Aultoa un laj doa Weiruak nopp un go schwind no de Vesaumlunk un veschauf eene Veseenunk fa an, wiels däm HARN sien Oaja es loosjegonen, un de Ploag haft aunjefongen.

¹²Un Aaron deed, soo aus Moses am jesajcht haud, un rand medden mank de Vesaumlunk; un werkjlich, de Ploag haud mank daut Volkj aul aunjefongen. Dan rieekjad hee un veschauft eene Veseenunk fa daut Volkj

¹³un stunt tweschen de Doodje un Läwendje. Dan wort de Ploag oppjehoolen.

¹⁴Dee waut jestorwen wieren aun de Ploag, wieren 14.700, buta dee, dee met Korach toop storwen.

¹⁵Un Aaron kjeem wada no Moses ver däm Engank von daut Vesaumlungszelt, aus de Ploag oppjehoolen wia.

¹⁶De HAR räd met Moses un säd:

¹⁷Räd met de Israeliten un nemm von an twalf Stakja, von jieda Staumleida von äare Stam eenen, un schriew jieda eenem sien Nomen opp sienen Stock.

¹⁸Oba opp däm Stock vom Staum Levi saust du Aaron sienen Nomen schriewen. Fa jieda Leida ut siene Grupp saul een Stock sennen.

¹⁹Un laj de Stakja en daut Vesaumlungszelt ver de Kjist met dän Bewies von däm Bunt han, wua ekj mie junt openboa.

²⁰Un wäm ekj mie utwälen woa, däm sien Stock woat jreenen. Soo well ekj de Israeliten äa grumsaujen stellen, met woont see jäajen junt grumsaujden.

²¹Moses räd met de Israeliten, un aul äare Staumleida jeewen am twalf Stakja, jieda Leida eenen Stock, no äare Gruppen no, un Aaron sien Stock wia uk mank äare Stakja.

²²Un Moses läd de Stakja en daut Zelt nenn, wua de Bewies von däm Bunt wia.

²³Un dän näakjsten Dach, aus Moses en daut Zelt met dän Bewies von däm Bunt jinkj, funk hee Aaron sienen Stock von Levi siene Famielje jreenen un blieejen un Maundlen droagen.

²⁴Un Moses druach de Stakja aula rut von däm HARN no de Israeliten, daut see daut sagen, un een jiedra neem sienen Stock.

²⁵De HAR säd to Moses: Droag Aaron sienen Stock wada trigj ver de Kjist met dän Bewies von däm Bunt, daut dee oppbewoat blift toom Tieekjen jäajen de onjehuarsome, daut äa grumsaujen ver mie opphieet un see nich stoawen.

²⁶Un Moses deed, soo aus de HAR am väajesajcht haud.

²⁷Un de Israeliten säden to Moses: Kjikj, wie vedoawen un komen om; wie woaren aula venicht.

²⁸Wäa sikj däm HARN siene Woninj nodat, dee stoaft. Sell wie dan werkjlich gaunz enne Grunt gonen?