Read Plautdietsch (Low German) – De Bibel 4. Mose 2 Bible Online

4. Mose 2 - Plautdietsch (Low German) – De Bibel bible

4. Mose 2

¹De HAR räd to Moses un Aaron un säd an:

²Wan de Israeliten daut Loaga oppstalen, saul jieda Grupp fa sikj, bie de Flag von äare Volkjsgrupp, daut Loaga moaken. Dee sellen aula rom daut Vesaumlungszelt, wan uk nich too dicht bie, äare Zelten oppstalen.

³Aun de oostne Sied saul de Flag von daut Häa von Juda stonen un äa Leida Nachschon, Aminadab sien Sän, un de Aufdeelungen doarom.

⁴De Aufdeelunk waut von däm Staum Juda wia haud 74.600 Mana.

⁵Biesied dee vom Staum Juda, dee vom Staum Isachar, met äaren Leida Netanel, Zuar sien Sän.

⁶Daut es eene Aufdeelunk von 54.400 Mana.

⁷Dan daut näakjste, dee vom Staum Sebulon, met äa Leida Eliab, Helon sien Sän.

⁸Daut es eene Aufdeelunk von 57.400 Mana.

⁹Daut gaunze Häa bie Juda met dee Aufdeelungen sent 186.400 Mana. Dise sellen daut ieeschte gonen.

¹⁰Aun de siedne Kaunt saul de Flag von daut Häa von Ruben stonen un äa Leida Elizur, Schedeur sien Sän, un de Aufdeelungen doarom.

¹¹De Aufdeelunk, waut von däm Staum Ruben wia, haud 46.500 Mana.

¹²Biesied dee vom Staum Ruben, dee vom Staum Simeon, met äa Leida Schelumiel, Zurischadai sien Sän.

¹³Daut es eene Aufdeelunk von 59.300 Mana.

¹⁴Dan daut näakjste, dee vom Staum Gad, met äa Leida Eljasaf, Deguel sien Sän.

¹⁵Daut es eene Aufdeelunk von 45.650 Mana.

¹⁶Daut gaunze Häa bie Ruben met dee Aufdeelungen sent 151.450 Mana. Dee sellen daut tweede rutgonen.

¹⁷Daut näakjste, tweschen de aundre Loagasch, sellen de Leviten daut Vesaumlungszelt un de Leviten äa Loaga oppnämen un loosgonen. Soo aus dee em Loaga sent, sellen dee no de Rieej, jieda opp siene Städ un bie siene Flag, wieda gonen.

¹⁸Aun de wastne Kaunt saul de Flag von daut Häa von Efraim stonen un äa Leida Elischama, Amihud sien Sän, un de Aufdeelungen doarom.

¹⁹De Aufdeelunk, waut vom Staum Efraim wia, haud 40.500 Mana.

²⁰Biesied dee vom Staum Efraim, dee vom Staum Manasse met äa Leida Gamliel, Pedazur sien Sän.

²¹Daut es eene Aufdeelunk von 32.200 Mana.

²²Dan daut näakjste es de Staum Benjamin, met äa Leida Abidan, Gidoni sien Sän.

²³Daut es eene Aufdeelunk von 35.400 Mana.

²⁴Daut gaunze Häa bie Efraim, met de Aufdeelungen, sent 108.100 Mana. Dee sellen daut dredde rutgonen.

²⁵Aun de nuadne Kaunt saul de Flag von daut Häa von Dan stonen, met äa Leida Ahieser, Amischadai sien Sän, un de Aufdeelungen doarom.

²⁶De Aufdeelunk, waut vom Staum Dan wia, haud 62.700 Mana.

²⁷Biesied dee vom Staum Dan, dee vom Staum Asser, met äa Leida Pagiel, Ochran sien Sän.

²⁸Daut es eene Aufdeelunk von 41.500 Mana.

²⁹Daut näakjste es de Aufdeelunk von däm Staum Naftali, met äa Leida Ahira, Enan sien Sän.

³⁰Daut es eene Aufdeelunk von 53.400 Mana.

³¹Daut gaunze Häa bie Dan, met de Aufdeelungen, sent 157.600 Mana. Dee sellen met äare Flag daut latste gonen, wan see rutgonen.

³²Aules toop wieren doa 603.550 Mana en de israelitische Volkjsgruppen, Aufdeelungen un Armeeen.

³³De Leviten worden nich met de Israeliten toop jetalt, soo aus de HAR daut von Moses velangt haud.

³⁴De Israeliten deeden aules krakjt soo aus de HAR daut von Moses velangt haud. Un soo aus see bie äare Flagen daut Loaga oppstalden, soo trocken see uk wieda, een jiedra bie sienen Staum un Volkjsgrupp.