Read Plautdietsch (Low German) – De Bibel 4. Mose 23 Bible Online

4. Mose 23 - Plautdietsch (Low German) – De Bibel bible

4. Mose 23

¹Un Bieleam säd to Balak: Bu mie hia säwen Aultoaren un brinj mie säwen junge Bolles un säwen Schopsbakj.

²Un Balak leet aules reedmoaken, soo aus Bieleam daut wenscht, un see beid opfaden opp jieda Aultoa eenen jungen Boll un eenen Schopsbock.

³Dan säd Bieleam to Balak: Bliew du hia bie dien Brauntopfa; ekj well dort hangonen un seenen, auf de HAR mie bejäajnen woat. Ekj woa die dan sajen, waut hee mie jewäsen haft. Un hee jinkj opp däm kolen Boajch.

⁴Un Gott bejäajend Bieleam; un Bieleam säd to am: Säwen Aultoaren hab ekj oppjebut un opp jieda Aultoa eenen jungen Boll un eenen Schopsbock jeopfat.

⁵De HAR jeef Bieleam de Wieed em Mul un säd: Go trigj no Balak un saj am daut!

⁶Un aus hee trigj no am kjeem, dan stunt dee met de Moabita äare Volkjsleida toop bie sien Brauntopfa.

⁷Dan funk Bieleam met sienen Spruch aun un säd: Ut Aram, von de Boaj em Oosten, haft Balak, de Moabita Kjennich mie häajebrocht, un haft aunjeordnet: Du saust Jakob sien Volkj veflieekjen! un dit Volkj Israel wajch wenschen!

⁸Woo saul ekj dit Volkj veflieekjen, wan Gott daut nich veflieekjt? Woo saul ekj daut doa wajch wenschen, wan de HAR daut doa nich wajch wenscht?

⁹Von hia huach kaun ekj an seenen, von opp dise Steenspetz see ekj daut: Daut see een aufjesondadet Volkj sent, dee sikj nich mank aundre Velkja talen.

¹⁰Wäa kaun dise Lied von Jakob, dee soo aus Stoff de Ieed bedakjen, ooda daut vieede Deel von Israel, talen? Miene Seel mucht de jerajchte äaren Doot stoawen, un mucht mien Enj soo aus äa Enj woaren!

¹¹Dan säd Balak to Bieleam: Wuarom hast du mie daut aunjedonen? Ekj hab die holen jeloten, om miene Fiend to veflieekjen, un nu säajenst du an!

¹²Bieleam oba auntwuad un säd: Mott ekj mie nich aun daut hoolen un daut räden waut de HAR mie sajcht?

¹³Dan säd Balak to Bieleam: Komm doch met mie met no eene aundre Städ, von wua ut du bloos de butaschte Kaunt von an seenen kaust, un nich daut gaunze Volkj, un doo mie daut von doa veflieekjen.

¹⁴Un hee neem Bieleam met no Zofim siene Stap, oppe Spetz vom Boajch Pisga. Un hee bud doa uk säwen Aultoaren un opfad opp jieda Aultoa eenen jungen Boll un eenen Schopsbock.

¹⁵Dan säd Bieleam to Balak: Bliew du hia bie dien Brauntopfa, ekj well dort hangonen un däm HARN bejäajnen.

¹⁶Un de HAR bejäajend Bieleam un jeef am de Wieed en sien Mul un säd: Go trigj no Balak un saj am daut!

¹⁷Aus Bieleam no Balak kjeem, stunt hee bie sien Brauntopfa, un de väaschte Mana von de Moabita wieren doa bie am. Un Balak fruach am: Waut haft de HAR die jesajcht?

¹⁸Un hee funk met sienen Spruch aun un säd: Sto opp, Balak, un horch! Nemm die daut aun, waut ekj saj, Zippor sien Sän!

¹⁹Gott es nich een Mensch, dee doa lieejen deit, ooda de Sän von eenen Mensch, daut hee siene Meeninj endat. Sull hee waut sajen un daut nich doonen? Sull hee waut räden un sikj nich doaraun hoolen?

²⁰Horch, mie es aunjeordnet worden dit Volkj to säajnen; hee haft daut jesäajent, un ekj kaun daut nich endren.

²¹Daut blift doabie: Kjeen Ojjlekj woat an trafen, un kjeen vedoawen woat en Israel to seenen sennen. De HAR, äa Gott, steit an bie, un see freien sikj to äaren Kjennich.

²²Gott, dee an ut Ägipten jefieet haft, es äare Macht, soo stoakj aus een willa Boll.

²³Daut jeft kjeene Zaubarie en Jakob un kjeene Woasajarie en Israel. Nu woat äwa Jakob un Israel jesajcht: Waut fa Wunda Gott deit.

²⁴Kjikj, daut Volkj woat oppstonen aus een junga Leiw un woat sikj äwahäa moaken aus een Leiw, un sikj nich hanlajen, bat hee daut jestolne oppjefräten un daut Bloot von de Doodje jedrunken haft.

²⁵Dan säd Balak to Bieleam: Wan du daut nich veflieekjen west, dan saust du daut uk nich säajnen!

²⁶Bieleam oba auntwuad Balak un säd: Hab ekj die daut nich jesajcht, aules, waut de HAR mie sajcht, woa ekj doonen?

²⁷Balak säd to Bieleam: Komm doch, ekj well die no eene aundre Städ brinjen; veleicht jefelt Gott daut, daut du mie dee von dort veflieekjen deist.

²⁸Un Balak neem Bieleam met oppe Spetz von dän Boajch Peor, von wua jlikj opp daut Jordantol rauf to kjikjen jeit.

²⁹Dan säd Bieleam to Balak: Bu mie hia säwen Aultoaren un brinj mie säwen junge Bolles un säwen Schopsbakj häa.

³⁰Un Balak deed, soo aus Bieleam säd, un opfad opp jieda Aultoa eenen jungen Boll un eenen Schopsbock.