Read Plautdietsch (Low German) – De Bibel 4. Mose 27 Bible Online

4. Mose 27 - Plautdietsch (Low German) – De Bibel bible

4. Mose 27

¹Zelofhad, Hefer sien Sän, dee Gilead sien Sän wia, dee Machir sien Sän wia, dee Manasse sien Sän wia, eena von Josef sienen Sän Manasse siene Nokomen, haud fief Dajchta hinjaloten: Machla, Noa, Hogla, Milka un Tirza.

²Dise kjeemen ver däm Engank von daut Vesaumlungszelt un säden to Moses un däm Priesta Eleasar ver de Staumleida un de gaunze Vesaumlunk:

³Ons Voda es enne Wiltnis jestorwen. Un hee jehieed nich to Korach siene Baund, dee sikj jäajen dän HARN erhäwen deed, oba hee must stoawen, wiels hee soo aus aul de aundre däm HARN onjehuarsom jewast wia. Un hee haft kjeene Säns hinjaloten.

⁴Wuarom saul ons Voda sien Nomen en sienen Staum nu unjagonen, doawäajen daut hee kjeenen Sän haft? Jäft ons uk een Oafgoot mank onsen Voda siene Breeda.

⁵Moses brocht äare Sach ver däm HARN,

⁶un de HAR säd to am:

⁷Zelofhad siene Dajchta haben rajcht. Du saust an een Oafgoot mank äaren Voda siene Breeda jäwen un an äa Voda sien Oafgoot toodeelen.

⁸Un saj de Israeliten: Wan een Maun stoaft un kjeenen Sän haft, dan sell jie däm sien Oafgoot siene Dochta tookomen loten.

⁹Wan hee oba uk kjeene Dochta haft, dan sell jie siene Breeda daut jäwen.

¹⁰Wan hee oba kjeene Breeda haft, sell jie sienen Voda siene Breeda daut jäwen.

¹¹Un wan de Voda uk kjeene Breeda haft, sell jie däm notsten em Frintschoft daut jäwen, dee en siene Volkjsgrupp to am jehieet, daut dee daut kjricht. Dit saul bie de Israeliten een Rajcht sennen waut jeltich es, soo aus de HAR Moses daut väajesajcht haft.

¹²De HAR säd to Moses: Go opp däm Abarim Boajch nopp un kjikj äwa daut Launt, waut ekj de Israeliten jäwen woa!

¹³Un wan du daut jeseenen hast, saust du uk stoawen, soo aus dien Brooda Aaron jestorwen es,

¹⁴wiels jie mien Wuat en de Zin Wiltnis nich jehorchten, aus de Jemeent mie aunkloagen deed un jie mie nich de Jeläajenheit jeewen, mie ver de Israeliten derch daut Wota ut däm Steen aus de heilja un majchtja Gott to bewiesen. Von don haft de Kjwal bie Kadesch dän Nomen Meriba.

¹⁵Moses räd met däm HARN un säd:

¹⁶HAR, du Gott, von däm aulet Läwen kjemt, sat eenen Maun en, äwa daut Volkj,

¹⁷dee an veropp jeit wan see rutgonen, un uk wan see trigj nenn komen. Sest woat diene Jemeent eene Häad sennen, aus Schop dee kjeenen Hoad haben.

¹⁸De HAR säd to Moses: Nemm Nun sienen Sän Josua, eenen Maun, en däm de Jeist es, un laj am de Haunt opp.

¹⁹Lot am ver däm Priesta Eleasar un ver de gaunze Vesaumlunk komen un äwajeff am de Veauntwuatunk ver äare Uagen

²⁰un laj von diene Volmacht opp am, om daut de gaunze Jemeent en Israel am jehorcht.

²¹Un hee saul met aule wichtje Entscheidungen no däm Priesta Eleasar gonen, un dee saul fa am met de heilje Lessa dän HARN befroagen. No däm sien Wuat sellen see rutgonen, un uk trigjkomen, hee un aule Israeliten met am toop.

²²Moses deed, soo aus de HAR am daut aunjeordnet haud, un neem Josua un leet am ver dän Priesta Eleasar un ver de gaunze Vesaumlunk komen.

²³Dan läd hee am siene Haunt opp un sad am aus sienen Nofolja en, soo aus de HAR am daut aunjeordnet haud.