Read Plautdietsch (Low German) – De Bibel 4. Mose 3 Bible Online

4. Mose 3 - Plautdietsch (Low German) – De Bibel bible

4. Mose 3

¹Hia sent Aaron un Moses äare Nokomen, soo aus daut wia aus de HAR to an bie däm Sinai Boajch räd.

²Aaron siene Säns heeten Nadab, dee wia daut elste, un dan Abihu, Eleasar un Itamar.

³Dise worden aula enjesaulft un bestäticht daut see aus Priesta deenen sullen,

⁴oba Nadab un Abihu storwen ver däm HARN aus see en de Sinai Wiltnis ver däm HARN een Opfa muaken met een Fia, soo aus sikj daut nich jehieed; dee hauden aulebeid kjeene Säns. Eleasar un Itamar wieren don Priesta to äaren Voda Aaron siene Tiet.

⁵De HAR räd to Moses un säd:

⁶Brinj dän Staum Levi toop un stal dee aun ver däm Priesta Aaron, soo daut dee am deenen.

⁷See sellen fa am un de gaunze Jemeenschoft bie daut Vesaumlungszelt de Oabeit doonen un soo bie de heilje Woninj deenen.

⁸See sellen fa de Meebel un Jereetschoft em Vesaumlungszelt oppkomen, eene Oabeit, dee see fa aule Israeliten doonen, un soo bie de heilje Woninj deenen.

⁹Du saust de Leviten aun Aaron un siene Nokomen äwajäwen; dee sellen von daut Volkj Israel gaunz doatoo hanjestalt woaren.

¹⁰Du saust Aaron un siene Säns aunstalen toom Priesta sennen; wan sest wäa bie de Oabeit dicht bie kjemt, saul dee doot jemoakt.

¹¹De HAR räd to Moses un säd:

¹²Horch emol, ekj hab de Leviten aunjenomen en de Städ von jieda Ieeschtjebuarnen en Israel. De Leviten sent miene.

¹³Jieda Ieeschtjebuarnet jehieet mie. Aus ekj en Ägipten aul de Ieeschtjebuarne ombrocht, veschoond ekj mie jieda Ieeschtjebuarnet en Israel von Menschen un uk von daut Vee. Dee sellen miene sennen. Ekj sie de HAR.

¹⁴De HAR säd to Moses en de Sinai Wiltnis:

¹⁵Tal aule Mana un Junges en de Volkjsgruppen un Famieljes bie de Leviten, jieda eenen waut eene Moonat oolt ooda ella es.

¹⁶Un Moses tald dee, soo aus de HAR am jesajcht haud.

¹⁷Levi haud dree Säns, un dee heeten Gerschon, Kehat, un Merari.

¹⁸Gerschon siene Säns, dee Staumvodasch von äare Volkjsgruppen sent, heeten Libni un Schimi.

¹⁹Kehat siene Säns, dee Staumvodasch von äare Volkjsgruppen sent, heeten Amram, Jizhar, Hebron un Usiel.

²⁰Merari siene Säns, dee Staumvodasch von äare Volkjsgruppen sent, heeten Machli un Muschi. Daut sent de Gruppen un Famieljes mank de Leviten.

²¹Von Gerschon staumen de Libnita un de Schimita,

²²un dee hauden toop 7.500 Mana un Junges waut mea aus eene Moonat oolt wieren.

²³De Volkjsgruppen, waut von Gerschon staumen, sullen sikj hinja de heilje Woninj, nom wasten von de Woninj loagren.

²⁴De Leida von de Gerschonita wia Eljasaf, Lael sien Sän.

²⁵See wieren veauntwuatlich bie daut Vesaumlungszelt un de Woninj fa de Zelt Dakjen un fa de Enganks Gardien en daut Vesaumlungszelt nenn,

²⁶un fa de Gardien rom dän Bennahoff rom daut heilje Zelt un dän Aultoa un aul de Strenj waut doatoo sent. Dit wia aules äare Oabeit.

²⁷Von Kehat staumen de Amramita, de Jizharita, de Hebronita un de Usielita,

²⁸un dee hauden aulatoop 8.600 Mana un Junges waut mea aus eene Moonat oolt wieren.

²⁹De Volkjsgruppen, dee von de Kehatita staumen, sullen sikj aun de siedne Kaunt von de heilje Woninj loagren.

³⁰De Leida von dise wia Elizafan, Usiel sien Sän.

³¹De Kehatita wieren veauntwuatlich fa de Bundeskjist, dän Desch, dän Laumpenhoola, de Aultoaren un aul daut Toobehia, waut de Priesta en daut Heilichtum brukten, un fa dän Väahank. Dit wia aules äare Oabeit.

³²Eleasar, däm Priesta Aaron sien Sän, wia daut väaschte äwa de Leida em Heilichtum.

³³Von Merari staumen de Machlita un de Muschita,

³⁴un dee hauden toop 6.200 Mana un Junges waut äwa eene Moonat oolt wieren.

³⁵De Leida von dise Gruppen, waut von Merari aufstaumen, wia Zuriel, Abihajil sien Sän. Dise sullen sikj aun de nuadne Kaunt von de heilje Woninj loagren.

³⁶De Merarita wieren veauntwuatlich fa de Stendasch, Dwäastangen un Feet von de heilje Woninj un waut doatoo jehieed. Daut wia aules äare Oabeit.

³⁷See wieren uk veauntwuatlich fa de Past, Feet, Zeltstekjels un Strenj fa dän Väahoff.

³⁸Dee, dee ver de heilje Woninj nom Oosten loagaden, wieren Moses un Aaron un Aaron siene Säns. Dee wieren veauntwuatlich no daut Heilichtum opptopaussen fa aule Israeliten. Un wan doa eena dicht bie kjeem, dee nich doatoo bestemt wia, sull dee dootjemoakt woaren.

³⁹De gaunze Zol von Mana un Junges, waut eene Moonat oolt un mea wieren von de Gruppen von Leviten dee Moses un Aaron no däm HARN sien Wuat opptalden, wia 22.000.

⁴⁰De HAR säd to Moses: Du saust aule Ieeschtjebuarne Israeliten, Mana un Junges waut eene Moonat oolt un mea sent, no äare Nomes talen.

⁴¹Un dan saust du, wiels ekj de HAR sie, de Leviten fa mie oppoat saten, en de Städ von aul de Ieeschtjebuarne von Israel, un du saust daut Vee, waut de Leviten jehieet, oppoat saten en de Städ von daut Vee von daut gaunze Volkj.

⁴²Un krakjt soo aus de HAR am jesajcht haud, tald Moses aule Ieeschtjebuarne von de Israeliten,

⁴³un daut wieren 22.273 Mana un Junges waut eene Moonat un ella wieren.

⁴⁴Un de HAR säd to Moses:

⁴⁵Sat aul de Leviten oppoat en de Städ von aul de ieeschtjebuarne Israeliten, un daut Vee, waut de Leviten jehieet, en de Städ von daut Vee von em Volkj. Ekj sie de HAR.

⁴⁶Om de 273 frie to moaken, waut mea sent aus mank de Leviten,

⁴⁷saust du fief Selwastekja, soo aus dee em Heilichtum aufjewoagen woaren, von jiedrem velangen. Een Selwastekj es 20 Graum

⁴⁸Dit Selwa, waut soo toopkjemt toom dee waut äwaschossich sent frie to moaken, saust du Aaron un siene Säns jäwen.

⁴⁹Un Moses neem daut Selwa von dee, waut mea wieren aus waut derch de Leviten friejesat worden.

⁵⁰Un Moses kjrieech 1.365 Selwastekja, no daut Jewicht vom Heilichtum aufjewoagen.

⁵¹Un krakjt soo aus de HAR velangt haud, jeef hee Aaron un siene Säns daut Selwa von de loosjekofte Menschen. Daut wia je waut de HAR to Moses jesajcht haud.