Read Plautdietsch (Low German) – De Bibel 4. Mose 31 Bible Online

4. Mose 31 - Plautdietsch (Low German) – De Bibel bible

4. Mose 31

²Bestrof de Midianita un tol an trigj fa daut, waut see de Israeliten aunjedonen haben. Un no däm saust du stoawen.

³Dan räd Moses met daut Volkj un säd: Moakt mank junt Menschen reed toom Kaumf jäajen de Midianita, daut de Strof vom HARN aun an derchjefieet woat.

⁴Von jieda Staum en Israel sell jie 1.000 Mana toom Kjrich schekjen.

⁵Un see neemen von de dusende en Israel emma 1.000 ut eenen Staum, 12.000 Mana dee toom Kjrich bewaufnet wieren.

⁶Un Moses schekjt dee met Pinhas, däm Priesta Eleasar sienen Sän, toom Kaumf. Disa haud daut heilje Jereetschoft un de Kjrichs Trompeeten bie sikj.

⁷Un see marschieeden loos toom Kaumf jäajen de Midianita, soo aus de HAR Moses daut jesajcht haud, un muaken doot aule Mana un Junges.

⁸Un doabie muaken see uk dise fief Kjennichs von de Midianita doot: Ewi, Rekem, Zur, Hur un Reba. Uk Bieleam, Beor sienen Sän, muaken see met een Schwieet doot.

⁹Un de Israeliten neemen de Midianita äare Frues un Kjinja faust, un aul äa Vee, aul äare Häaden un aul äare Sachen neemen see sikj met.

¹⁰Un aule Städa un Zelt Darpa, wua dee wonden, vebrenden see.

¹¹Un see neemen aul daut jestolne un aules, waut to nämen jinkj, Menschen un Vee,

¹²un brochten daut no Moses un däm Priesta Eleasar un de gaunze Jemeent von Israel, un aule Jefangne un aul daut jestolne Vee un Sachen, brochten see no daut Loaga, waut em Jordantol, en de Moabita äare Stapen, jäajen Jericho wia.

¹³Un Moses un de Priesta Eleasar un aule Staumleida jinjen an entjäajen, bat buten ver daut Loaga.

¹⁴Un Moses wort oajalich äwa de väaschte em Kjrichshäa, waut vom Kjrich trigjekomen wieren, un äwa de Befälshaba, waut äwa 1.000 un äwa 100 wieren,

¹⁵un säd to an: Wuarom hab jie aule Frues läwen jeloten?

¹⁶Wist jie daut nich mea, daut et de Frues wieren, dee de Israeliten derch Bieleam sienen Rot veleiden deeden, daut see sikj aum HARN veschuljden derch dän Baal Peor, soo daut däm HARN siene Jemeent eene Ploag derch muak?

¹⁷Nu moakt doot aule Junges mank de Kjinja, un aule Frues, dee met eenen Maun Vekjia jehaut haben!

¹⁸Bloos de Mejales, dee noch rein jebläwen sent, derw jie läwen loten un fa junt hoolen.

¹⁹Un loagat junt fa säwen Doag buten ver daut Loaga, aul dee, dee wäm doot jemoakt ooda eenen Dooden aunjefot haben, daut jie junt aum dredden Dach un aum säwenden Dach met dee toop reinjen loten, dee jie faustjenomen haben.

²⁰Uk aule Kjleeda un aule ladane Sachen un aule Woll Sachen un aul daut heltane Jereetschoft saul met Reinjungs Wota besprezt woaren.

²¹De Priesta Eleasar säd to de Mana, dee vom Kaumf trigjekomen wieren: Dit es daut Jesaz, waut de HAR Moses jesajcht haft:

²²Golt, Selwa, Brons, Iesa, Zin un Blie

²³un aules, waut Fia vedrajcht, sell jie derchem Fia gonen loten, dan woat daut rein; dan brukt daut bloos noch met Reinjungs Wota besprezt woaren. Oba aules, waut nich Fia vedrajcht, sell jie em Wota ducken.

²⁴Un june Kjleeda sell jie aum 7. Dach wauschen, dan woa jie rein. Dan derw jie wada em Loaga nenn komen.

²⁵De HAR räd met Moses un säd:

²⁶Nemm de gaunze Somm von daut läwendje Hab un Goot, de Menschen un daut Vee, waut metjebrocht wort, opp, du un de Priesta Eleasar un de Leida von de Volkjsgruppen,

²⁷un jeff de eene Halft dee, dee toom Kjrich jegonen sent un dän Kaumf derchjefieet haben, un de aundre Halft daut äwaje Volkj.

²⁸Du saust von aule Kjrieja, dee toom Kaumf jegonen wieren, eene Aufgow fa dän HARN fodren, emma eent von 500, bie Menschen, Rinda, Äsels un Schop.

²⁹Von äare Halft saust du daut fodren un däm Priesta Eleasar daut jäwen aus een Opfa fa dän HARN.

³⁰Oba von de Halft waut daut äwaje Volkj kjricht, saust du emma eent von 50 nämen, von Menschen, Rinda, Äsels un Schop un von aulet Vee, un saust de Leviten daut jäwen, dee dän Deenst en däm HARN siene Woninj verechten.

³¹Un Moses un de Priesta Eleasar deeden daut soo, aus de HAR Moses daut väajesajcht haud.

³²Von daut jestolne Hab un Goot, waut aum läwen jebläwen wia, waut daut Kjrichsvolkj toopjebrocht haud, wieren: 675.000 Schop,

³³72.000 Rinda

³⁴un 61.000 Äsels.

³⁵Un von Menschen wieren: 32.000 Mejales, dee noch met kjeene Mana vekjia jehaut hauden.

³⁶Un de Halft, waut dee jehieed, dee toom Kaumf jegonen wieren, wia: 337.500 Schop;

³⁷un doavon wieren aus Aufgow fa dän HARN 675 Schop.

³⁸Un soo wieren uk 36.000 Rinda, un doavon 72 aus Aufgow fa dän HARN.

³⁹Un soo uk 30.500 Äsels, un doavon 61 aus Aufgow fa dän HARN.

⁴⁰Un uk 16.000 Menschen, un doavon 32 aus Aufgow fa dän HARN.

⁴¹Un Moses jeef dise Aufgow däm Priesta Eleasar aus Opfagow fa dän HARN, soo aus de HAR am jesajcht haud.

⁴²Oba de aundre Halft, waut Moses von daut Kjrichsvolkj fa de Israeliten aufdeeld,

⁴³dee fa de Jemeent bestemt wia, haud uk 337.500 Schop,

⁴⁴36.000 Rinda,

⁴⁵30.500 Äsels

⁴⁶un 16.000 Menschen.

⁴⁷Un von dise Halft, waut de Israeliten jehieed, neem Moses emma eent von 50, vom Vee un uk von de Menschen, un jeef de Leviten daut, dee dän Deenst aun däm HARN siene Woninj verechten, soo aus de HAR Moses daut väajesajcht haud.

⁴⁸Dan kjeemen de Truppen Leida, dee äwa dusende em Kjrichsvolkj wieren, un de Befälshaba dee äwa 1.000 un äwa 100 wieren, no Moses

⁴⁹un säden: Wie, diene Deena, haben de Zol von de Mana oppjenomen, dee unja onse Oppsecht stunden, un doa fält nich eena.

⁵⁰Doawäajen brinj wie däm HARN aus Opfagow, waut een jiedra jefungen haft von goldnet Jereetschoft, Haulskjäden, Oarmbenja, Säajelrinj, Uarinj un Spalden, om ons Veseenunk to veschaufen ver däm HARN.

⁵¹Un Moses un de Priesta Eleasar neemen von an daut Golt, un aule sorten schmocke Sachen.

⁵²Un aul daut Golt, waut de Befälshaba äwa 1.000 un äwa 100 aus Opfa fa däm HARN brochten, wuach 16.750 Selwastekja.

⁵³Oba von de Kjrieja haud jieda eena bloos fa sikj jenomen.

⁵⁴Un Moses un de Priesta Eleasar neemen daut Golt von de Befälshaba äwa 1.000 un äwa 100 un brochten daut en daut Vesaumlungszelt, daut et doatoo deend, daut de HAR jnädich aun de Israeliten denkjt.