Read Plautdietsch (Low German) – De Bibel 4. Mose 33 Bible Online

4. Mose 33 - Plautdietsch (Low German) – De Bibel bible

4. Mose 33

¹Dit sent de Städen wua de Israeliten äare Loagasch hauden, aus see unja Moses un Aaron met äa gaunzet Häa ut Ägipten trocken.

²Moses schreef daut no däm HARN siene Aunordnunk dol, wua see emma äa Loaga, eemol nom aundren, jemoakt hauden. Un dit sent de Loagasch von opp de Reis:

³See trocken aum 15. Dach en de 1. Moonat, däm Dach no däm daut see daut ieeschte Passafast fieeden, ut Ramses rut, derch eene stoakje Macht, ver de Ägipta äare Uagen,

⁴jrod aus see de Ieeschtjeburten begrowden, dee de HAR mank an dootjeschloagen haud. De HAR haud aun äare Jetta daut Jerecht derchjefieet.

⁵Aus see ut Ramses rut trocken, loagaden see sikj en Sukkot

⁶un trocken von Sukkot wieda un loagaden sikj en Etam, waut aum Raunt von de Wiltnis licht.

⁷Von Etam trocken see wada trigj un bleewen en Piehahirot, waut ver Baal Zefon licht, un stalden äa Loaga dicht bie Migdol opp.

⁸Von Piehahirot trocken see wieda un jinjen medden derch daut Mäa un reisden eene Reis von dree Doag en de Etam Wiltnis nenn un loagaden sikj en Mara.

⁹Von Mara trocken see wieda un kjeemen no Elim; doa wieren twalf Wotakjwalen un 70 Paulmbeem, un doa loagaden see sikj.

¹⁰Von Elim trocken see wieda un loagaden sikj aum Schelpmäa.

¹¹Vom Schelpmäa trocken see wieda un loagaden sikj en de Sin Wiltnis.

¹²Von de Sin Wiltnis trocken see wieda un loagaden sikj en Dofka.

¹³Von Dofka trocken see wieda un loagaden sikj en Alusch.

¹⁴Von Alusch trocken see wieda un loagaden sikj en Refidim. Dort haud daut Volkj kjeen Wota toom drinkjen.

¹⁵Von Refidim trocken see wieda un loagaden sikj en de Sinai Wiltnis.

¹⁶Von de Sinai Wiltnis trocken see wieda un loagaden sikj bie de Städ, dee Lost Jräwa heet.

¹⁷Von de Lost Jräwa trocken see wieda un loagaden sikj en Hazerot.

¹⁸Von Hazerot trocken see wieda un loagaden sikj en Ritma.

¹⁹Von Ritma trocken see wieda un loagaden sikj en Rimmon Perez.

²⁰Von Rimmon Perez trocken see wieda un loagaden sikj en Libna.

²¹Von Libna trocken see wieda un loagaden sikj en Rissa.

²²Von Rissa trocken see wieda un loagaden sikj en Kehelata.

²³Von Kehelata trocken see wieda un loagaden sikj aum Boajch Schefer.

²⁴Vom Boajch Schefer trocken see wieda un loagaden sikj en Harada.

²⁵Von Harada trocken see wieda un loagaden sikj en Makhelot.

²⁶Von Makhelot trocken see wieda un loagaden sikj en Tahat.

²⁷Von Tahat trocken see wieda un loagaden sikj en Tarach.

²⁸Von Tarach trocken see wieda un loagaden sikj en Mitka.

²⁹Von Mitka trocken see wieda un loagaden sikj en Haschmona.

³⁰Von Haschmona trocken see wieda un loagaden sikj en Moserot.

³¹Von Moserot trocken see wieda un loagaden sikj en Bene Jaakan.

³²Von Bene Jaakan trocken see wieda un loagaden sikj en Hor Gidgad.

³³Von Hor Gidgad trocken see wieda un loagaden sikj en Jotbata.

³⁴Von Jotbata trocken see wieda un loagaden sikj en Abrona.

³⁵Von Abrona trocken see wieda un loagaden sikj en Ezjon Geber.

³⁶Von Ezjon Geber trocken see wieda un loagaden sikj en de Zin Wiltnis, daut es Kadesch.

³⁷Von Kadesch trocken see wieda un loagaden sikj aun däm Boajch Hor, aun de Jrens vom Launt Edom.

³⁸Doa jinkj de Priesta Aaron no däm HARN sien Wuat opp dän Boajch Hor nopp. Un doa bowen storf hee aum 1. Dach en de 5. Moonat en daut 40. Joa, von dan aus see ut Ägipten jetrocken wieren.

³⁹Un Aaron wia 123 Joa oolt, aus hee opp däm Boajch Hor storf.

⁴⁰Un de Kanaanita Kjennich von Arad, dee em Sieden en daut Launt Kanaan wond, hieed daut, daut de Israeliten kjeemen.

⁴¹Un von däm Boajch Hor trocken see wieda un loagaden sikj en Zalmona.

⁴²Von Zalmona trocken see wieda un loagaden sikj en Punon.

⁴³Von Punon trocken see wieda un loagaden sikj en Obot.

⁴⁴Von Obot trocken see wieda un loagaden sikj en Ije Abarim, en de Jäajent, wua de Moabita wonen.

⁴⁵Von Ije Abarim trocken see wieda un loagaden sikj en Dibon Gad.

⁴⁶Von Dibon Gad trocken see wieda un loagaden sikj en Almon Diblatajim.

⁴⁷Von Almon Diblatajim trocken see wieda un loagaden sikj bie de Boaj Abarim dicht bie Nebo.

⁴⁸Von de Boaj Abarim trocken see wieda un loagaden sikj en daut moabitische Jordantol jäajen Jericho.

⁴⁹En daut Jordantol stalden see äa Loaga aum Jordan opp von Bet Jeschimot bat Abel Schittim.

⁵⁰De HAR räd doa en daut moabitische Jordantol jäajen Jericho met Moses un säd:

⁵¹Räd met de Israeliten un saj to an: Wan jie äwa dän Jordan en daut Launt Kanaan jegonen sent,

⁵²dan sell jie aule Enwona ver junt vedriewen un aule Jettabilda un aul äare jegotne Bilda vestieren un aul äare huage Opfastäden venichten.

⁵³Nämt daut Launt en un besiedelt daut; junt hab ekj daut Launt jejäft, daut jie daut aus jun ieejnet Launt haben.

⁵⁴Un jie sellen daut Launt derchem Loss mank june Stam vedeelen. Däm Staum, dee groot es, sell jie een grootet Oafgoot jäwen, un däm Staum, dee kjlien es, sell jie een kjlienet Oafgoot jäwen. Wäm daut derch daut Loss traft, dee saul daut haben. No de Stam von june Vodasch sell jie daut vedeelen.

⁵⁵Wan jie de Enwona von daut Launt nich vedriewen, dan woaren junt dee, dee jie äwaloten, to Spekjasch en june Uagen un to Spekjapitschen opp junen Rigjen woaren, un woaren junt en daut Launt, wua jie bennen wonen, unjadrekjen.

⁵⁶Dan woat daut passieren, daut ekj junt daut aundoonen woa, waut ekj docht an auntodoonen.