Read Plautdietsch (Low German) – De Bibel 4. Mose 4 Bible Online

4. Mose 4 - Plautdietsch (Low German) – De Bibel bible

4. Mose 4

²Got no de Leviten un talt de Mana mank de Kehatita en äare Gruppen un Famieljes,

³een jiedra waut 30 Joa oolt un ella es, bat 50 Joa oolt, dee waut em Vesaumlungszelt deenen kjennen.

⁴De Oabeit, waut de Kehatita bie daut Vesaumlungszelt doonen sellen, es met de heilichste Sachen.

⁵Wan de Israeliten äa Loaga opphäwen, sellen Aaron un siene Säns nengonen un de bennaschte Gardien rauf nämen un dee äwa de Bundeskjist met däm Bewies vom Bunt spreeden.

⁶Äwa daut sellen see eene Dakj von Seekoolada dakjen, un dan eene Dakj von dunkel bleiwet Zeich. Dan sellen see de Droagstangen en de Rinj von de Bundeskjist nenstäakjen.

⁷See sellen eene Dakj von bleiwet Zeich äwa dän Desch fa daut jeweide Broot spreeden, un dan de Schatels, Läpels, Schiewen un de Kauntjes fa daut Drinkjopfa doa nopp saten; daut Broot, waut wie doa emma haben, saul doa bowen bliewen.

⁸Dan sellen see doa eene kloa roode Dakj äwa spreeden un daut met eene Dakj von Seekoolada bespreeden, un dan de Droagstangen en de Rinj aum Desch nenstäakjen.

⁹Un see sellen dän Laumpenhoola met Laumpen, Scheeren un Schatels un Eelj Kaunen, waut doatoo jehieren, met bleiwet Zeich bespreeden,

¹⁰un äwa daut eene Dakj von Seekoolada spreeden un daut opp daut Droag Jestal saten.

¹¹Krakjt soo, sellen see eene bleiwe Dakj un eene Dakj von Seekoolada äwa dän goldnen Aultoa spreeden un de Droagstangen en de Rinj stäakjen.

¹²Aul daut Toobehia, waut em Heilichtum jebrukt woat, sellen see en eene bleiwe Dakj enrollen un met eene Dakj von Seekoolada bedakjen un opp Droagstangen saten.

¹³See sellen daut Ausch von opp däm Aultoa rauf moaken un doa eene bleiwroode Dakj äwa spreeden,

¹⁴un aul daut Toobehia von Paunen fa de Kolen, de Gauflen, Scheflen un groote Kommen, waut bie dän Aultoa jebrukt woaren, doa nopp saten un doa eene Dakj von Seekoolada äwa spreeden un de Droagstangen en de Rinj nenstäakjen.

¹⁵Wan Aaron un siene Säns ieescht de gaunze Woninj un aul daut Jereetschoft doatoo bedakjt haben un reed toom wieda trakjen sent, dan sellen de Kehatita komen un daut droagen. Oba see sellen de heilje Sachen nich aunschieren, wiels dan wudden see stoawen. Dit es waut de Kehatita bie daut Vesaumlungszelt droagen sellen.

¹⁶Eleasar, däm Priesta Aaron sien Sän, es veauntwuatlich fa de Laumpen Eelj, daut Stoff fa dän Weiruak, daut Broot waut wie doa emma opp dän Desch haben un de Eelj toom ensaulwen, un fa de gaunze Woninj un aul de heilje Sachen, waut doatoo jehieren.

¹⁷De HAR räd to Moses un Aaron un säd:

¹⁸Siet väasechtich, daut de Famieljes von de Kehatita nich Schoden lieden mank de Leviten.

¹⁹Kjikjt doano, daut dee läwen kjennen un nich stoawen brucken, wan see met de heilje Sachen to doonen haben. Aaron un siene Säns sellen daut ieeschte nengonen un jiedrem krakjt oppjäwen, waut siene Oabeit es, un waut hee droagen saul.

²⁰De Kehatita sellen nich ut sikj selfst nenn gonen un sellen daut Heilje nich emol eenen Uagenblekj seenen, soo daut see nich stoawen.

²¹De HAR räd to Moses un säd:

²²Go un tal de Nokomen von Gerschon en äare Gruppen un Famieljes,

²³een jiedra waut 30 Joa oolt un ella es, bat 50 Joa oolt, dee waut em Vesaumlungszelt deenen kjennen.

²⁴De Oabeit waut de Gruppen von Gerschonita doonen sellen un de Sachen dee see droagen sellen sent:

²⁵De Zeltdakjen fa de heilje Woninj, woont daut Vesaumlungszelt es, de zeichne un de ladane Dakjen, waut eene opp de aundre ligjen woat, un de Gardien fa dän Engank en daut Vesaumlungszelt nenn.

²⁶De Gardien rom dän Bennahoff un de Gardien fa de Däa bie daut Puat em Väahoff nenn, woone rom de Woninj un dän Aultoa es, un de Strenj un aul daut Jereetschoft doatoo. Dit es aules äare Oabeit.

²⁷Aaron un siene Säns sellen de Gerschonita aules väasajen waut see droagen sellen un waut see noch doonen sellen. Un jie sellen an sajen waut see aules droagen sellen.

²⁸Dit es dan waut de Gruppen von Gerschonita bie daut Vesaumlungszelt doonen sellen, un Itamar, däm Priesta Aaron sien Sän, saul de Äwasecht äwa an haben.

²⁹Un du saust uk de Mana waut Nokomen von Merari sent, en äare Gruppen un Famieljes talen,

³⁰dee waut 30 Joa oolt un ella, bat 50 Joa oolt sent, waut deenen kjennen, un saust an äare Oppgowen jäwen, dee see aun daut Vesaumlungszelt doonen sellen.

³¹De Sachen, fa woone see bie daut Vesaumlungszelt veauntwuatlich sent un droagen sellen, sent de Bräda von de Woninj, de Dwäastangen, de Past un de Feet,

³²un de Past rom dän Väahoff met Feet un Stekjels un Strenj, waut doatoo jehieren. Jie sellen an krakjt em eenselnen väasajen, waut see droagen sellen.

³³Dit sent de Oppgowen fa de Gruppen von Merari siene Nokomen dee see doonen sellen aun daut Vesaumlungszelt, un Itamar, däm Priesta Aaron sien Sän, saul an väasajen.

³⁴Un Moses un Aaron un de Leida von daut Volkj talden de Kehatita no äare Gruppen un Famieljes,

³⁵de Mana waut 30 Joa oolt un ella wieren bat 50 Joa, waut doa deenen kunnen un äare Oabeit bie daut Vesaumlungszelt doonen.

³⁶Un Moses un Aaron talden 2.750

³⁷Kehatita, soone waut bie daut Vesaumlungszelt deenen kunnen. Daut wia soo aus de HAR Moses daut jesajcht haud.

³⁸Un see talden Gerschon siene Nokomen en äare Gruppen un Famieljes,

³⁹de Mana waut 30 Joa oolt wieren un ella, bat 50 Joa oolt, waut deenen kunnen un äare Oabeit bie daut Vesaumlungszelt doonen.

⁴⁰Un Moses un Aaron talden 2.630

⁴¹Nokomen von Gerschon, soone waut bie daut Vesaumlungszelt deenen kunnen. Daut wia soo aus de HAR an daut jesajcht haud.

⁴²Un see talden uk de Nokomen von Merari no äare Gruppen un Famieljes,

⁴³de Mana waut 30 Joa oolt un ella wieren bat 50 Joa oolt, waut em Deenst wieren un äare Oabeit bie daut Vesaumlungszelt doonen kunnen.

⁴⁴Un Moses un Aaron talden 3.200

⁴⁵Nokomen von Merari. Dit wia soo aus de HAR Moses daut jesajcht haud.

⁴⁶Un Moses un Aaron un de Leida von Israel talden toop woo väl Leviten doa en de Gruppen un Famieljes wieren,

⁴⁷waut 30 Joa oolt un ella, bat 50 Joa oolt wieren, dee em Deenst wieren un dee äare Oabeit bie daut Vesaumlungszelt doonen kunnen un de Sachen droagen.

⁴⁸Aules toop wieren daut 8.580

⁴⁹waut Oabeit oppjejäft wort derch daut waut de HAR Moses jesajcht haud. Een jiedra kjrieech siene Oabeit un daut, waut hee droagen sull, soo aus de HAR Moses daut jesajcht haud.