Read Plautdietsch (Low German) – De Bibel 4. Mose 6 Bible Online

4. Mose 6 - Plautdietsch (Low German) – De Bibel bible

4. Mose 6

¹De HAR räd to Moses un säd:

²Wan een Mensch, auf Maun ooda Fru, een besondret Vespräakjen aus een Nazara opp sikj nemt un sikj däm HARN weit,

³dan saul dee kjeen Wien ooda stoakjet drinkjen. Dee saul kjeen Wienädikj, waut von Wien ooda stoakje Jedrenkjen jemoakt es, drinkjen un kjeen Jedrenkj, waut von Wiendruwen jemoakt es, drinkjen, un kjeene Wiendruwen ooda Rasienen äten.

⁴Soo lang aus sien Vespräakjen helt, saul dee nuscht äten waut von de Wiendruwenplaunt kjemt, nich emol Kjieena ooda Schluwen von Wiendruwen.

⁵Soo lang aus daut Vespräakjen helt, saul hee sikj kjeene Hoa aufschnieden; bat de Tiet äwa es daut hee sikj däm HARN jeweit haft, saul hee heilich sennen un de Hoa opp sienen Kopp waussen loten.

⁶Fa de gaunze Tiet daut hee sikj däm HARN jeweit haft, saul hee nich dicht bie eenen Dooden gonen.

⁷Uk wan sien Voda ooda siene Mutta ooda Brooda ooda Sesta stoaft, doaf hee sikj nich aun dee ver Gott orrein moaken, wiels daut Tieekjen daut hee sikj jeweit haft es opp sienen Kopp.

⁸De gaunze Tiet waut dee sikj aus een Nazara jeweit haft saul hee heilich bliewen ver däm HARN.

⁹Wan daut soo traft daut doa wäa haustich dicht bie am stoaft un hee siene Hoa ver Gott orrein kjricht, dan saul hee aun dän säwenden Dach wan hee wada rein woat, sikj de Hoa aufschnieden,

¹⁰un aum achten Dach saul hee twee Turtelduwen ooda twee aundre Duwen no däm Priesta brinjen bie däm Engank von daut Vesaumlungszelt.

¹¹Un de Priesta saul von daut eene Voagel een Sindopfa un von daut aundre een Brauntopfa moaken daut hee soo aus daut veseent woat, wiels hee sikj aun eenen Vestorwnen ver Gott orrein jemoakt un Schult opp sikj jebrocht haft. Un aun dän Dach saul hee sienen Kopp fa däm HARN heilich moaken,

¹²un sikj däm HARN weien fa de volle Tiet waut hee vesproaken haud. Hee saul een eenjoaschet Schop aus een Schultopfa brinjen. Un dee Tiet, waut hee sikj verhäa jeweit haud, saul to nuscht jetalt woaren, wiels hee sienen Kopp orrein jemoakt haft.

¹³De Zeremonie fa eenen Nazara es soo aus dit. Wan de Tiet dee hee vesproaken haud om es, saul hee bat de Däa von daut Vesaumlungszelt jebrocht woaren,

¹⁴un hee saul däm HARN Opfa brinjen. Hee saul een eenjoaschet Schop waut kjeen Fäla haft fa een Brauntopfa, een eenjoaschet Schop waut kjeen Fäla haft fa een Sindopfa, un eenen Bock waut kjeen Fäla haft fa een Dankopfa brinjen.

¹⁵Un hee saul een Korf Broot von onjesuaden Dieech von wittet Mäl un met Eelj doabennen un Reeschkje met Eelj beschmäat, un daut Ätesopfa, un uk de Drinkjopfa waut bie een jiedret bie jehieet brinjen.

¹⁶De Priesta saul dee ver däm HARN brinjen un saul fa am Sindopfa un Brauntopfa moaken,

¹⁷un von däm Bock un dän Korf voll Broot een Dankopfa fa däm HARN moaken, un dan uk noch de Ätesopfa un Drinkjopfa.

¹⁸De Nazara saul dan de Hoa von sien jeweiden Kopp, ver dän Engank to daut Vesaumlungszelt, aufschnieden un dee opp daut Fia unja daut Dankopfa vebrennen.

¹⁹Wan däm Nazara ieescht de Hoa von sien jeweiden Kopp aufjeschnäden sent, saul de Priesta eenen jekoakten Schulla von däm Bock un een Broot von onjesuaden Dieech von däm Korf, un een Biet Reeschkje nämen, un däm Nazara daut enne Henj jäwen.

²⁰De Priesta saul daut aus een Opfa ver däm HARN opphäwen. Dit es daut heilje Poat fa dän Priesta, toop met daut Broststekj waut oppjehowen wort, un dän Schinkjen dee jeopfat woat. No daut kaun de Nazara Wien drinkjen.

²¹Daut es daut Jesaz fa däm Nazara dee däm HARN sien Opfa jeweit haft en sien Vespräakjen, buta daut waut hee sest noch kaun; soo aus hee vesproaken haft saul hee daut doonen, doano aus hee daut unja daut Jesaz fa een Nazara vesproaken haft.

²²De HAR räd met Moses un säd:

²³Saj Aaron un siene Säns, dit es woo jie de Israeliten dän Säajen jäwen sellen. Sajcht to an:

²⁴Mucht de HAR die säajnen un die Schutz jäwen;

²⁵Mucht hee die met Freid halpen, un jenstich to die sennen;

²⁶Mucht de HAR dicht bie die bliewen, un die Erfolch un Fräd jäwen.

²⁷Un de HAR säd: Wan see daut Volkj Israel en mienen Nomen säajnen woaren, dan woa ekj daut Volkj säajnen.