Read Plautdietsch (Low German) – De Bibel Micha 1 Bible Online

Micha 1 - Plautdietsch (Low German) – De Bibel bible

Micha 1

¹Dit es de Norecht, dee de HAR Micha von Moreschet jeef, en de Joaren aus Jotam, Ahas un Hiskia Kjennichs en Juda wieren. De Norecht haud met Samaria un Jerusalem to doonen.

²Horcht emol, aule Velkja. Lot daut Launt, un dee waut doabennen sent, oppaussen. Gott de HAR, von en sienen heiljen Tempel, well junt wäajen waut vekloagen.

³De HAR woat äwadäl komen von siene Städ, un hee woat raufkomen bat oppe Ieed; hee woat opp de huage Opfastäden romklunjen.

⁴De Boajchrigjen woat opprieten un de Boaj unja am veschmelten, soo aus Waus em Fia veschmelt, un Wota von de Boaj poascht.

⁵Aul dit, wäajen waut Jakob siene Nokomen jedonen haben, un wäajen de Sinden von daut Volkj Israel. Oba en waut haben Jakob siene Nokomen sikj soo vesindicht? Es daut nich, soo aus see en Samaria läwen? Un waut es de huage Opfastäd fa Juda? Es daut nich Jerusalem?

⁶Doawäajen woa ekj Samaria soo dolbräakjen, daut et eene Stap met een Steenaklompen sennen woat, wua see een Wiengoaden plaunten. Ekj woa äare Busteena em Tol nenn schälen, soo daut de Staut bat oppe Grunt woat kol sennen.

⁷Aul äare Jetta woaren en Stekja jebroaken woaren, un aul äa Vedeenst woat em Fia vebrennen. Aul äare oppjestalde Jetta woaren doljeräten woaren. Aul daut schmocke haft see doaderch jekjräajen, daut see sikj met aundre Jetta aufjeef; oba daut woat wada no aundre Jetta gonen.

⁸Ekj woa äwa dit truaren un hielen. Ekj woa boaft un haulf noaktich romgonen. Ekj woa julen aus de Wilw, un jaumarieren aus de Straus.

⁹De Wund, dee de HAR schleit, kaun nich bäta woaren, un Juda haft soone jekjräajen; dee es en mien Volkj nenjedrungen bat Jerusalem.

¹⁰Lot kjeenem en Gat doavon hieren. Lot see nich hieren daut jie hielen. Lot dee waut en Bet Leafra sent, sikj en Ieed rollen.

¹¹Lot de Lied von Schafir met aul äare Schaund flichten; de Lied von Zaanan woaren sikj nich wiesen. Daut truaren en Bet Ezel woat junt woarnen soo daut jie doa nich stelhoolen.

¹²Dee waut en Marot wonen, kjremmen sikj, wiels see aul soo lang nich goode Norecht jekjräajen haben, wiels de HAR haft eenen grooten Schoden bat aun daut Puat von Jerusalem komen loten.

¹³Dee, dee jie en Lachisch wonen, spaunt june Pieed aun, wiels jie wieren de ieeschte, waut de Sinden von de Israeliten nojinjen. Jie haben dee en Juda aunjewäsen,

¹⁴un jie woaren Moreschet Gat motten een aufscheets Jeschenkj jäwen. De Kjennichs en Israel woaren sikj aun de Hiesa en Achsib aunschmäaren.

¹⁵Ekj woa die, Marescha, eenen schekjen, dee die dien rajcht wajchnemt, un dee met woone Israel stolt es, woaren no Adullam flichten.

¹⁶Riet die de Hoa ut un schäa die dän Kopp em trua äwa de Kjinja, dee diene Freid sent; dee woaren faustjenomen woaren un von die veschlapt woaren, un du woascht lang äwa dee truaren.