Read Plautdietsch (Low German) – De Bibel Micha 3 Bible Online

Micha 3 - Plautdietsch (Low German) – De Bibel bible

Micha 3

¹Un ekj säd: Horcht emol häa, jie Leidasch von Jakob sien Volkj, un jie aunjestalde en Israel. Jie sullen dee sennen, waut wisten woo to rechten.

²Oba jie veachten waut goot es, un freien junt aun schlajchtet. Daut es aus wan jie mien Volkj de Hut auf schalden, un an daut Fleesch von de Knoakes reeten

³un daut oppfreeten. Wan jie dee aufjeladat haben, bräakj jie de Knoakes von mien Volkj; jie schnieden daut Fleesch fien aus toom enne Paun, ooda aus Stekja toom em Gropen.

⁴Wan jie soo läwen, woat doa eene Tiet komen, daut wan jie uk däm HARN aunbäden, woat hee junt kjeene Auntwuat jäwen. Hee woat sien Jesecht dan ver junt vestäakjen, un junt krakjt daut jäwen, waut june Sinden vedeent haben.

⁵To de Profeeten, dee mien Volkj veleiden, un sajen aules es goot, soo lang aus see to äten kjrieen, un sajen daut woat Kjrich jäwen, wan an nuscht jejäft woat: to dee sajcht de HAR:

⁶Dee woat enne Nacht nuscht kloa woaren; un woaren onen Openboarungen em diestren bliewen. De Sonn woat äwa de Profeeten unjagonen, un de Dach woat äwa an diesta sennen.

⁷Dee waut enne Tookunft nenkjikjten, woaren beschromt sennen, un dee waut säden, woo Dinja utfaulen wudden, woaren sikj schämen. Beschämt woaren see sikj de Haunt äwa daut Mul hoolen, wiels see nich een Wuat von Gott haben.

⁸Oba ekj, ekj sie stoakj, un hab däm HARN sien Jeist. Ekj weet woo to rechten, un weet woo ekj daut doonen kaun; ekj woa Jakob sien Volkj wiesen wua see too wiet jegonen sent, un Israel wiesen, woo see jesindicht haben.

⁹Nu horcht no dit, jie Leidasch von Jakob sien Volkj, un jie aunjestalde en Israel. Jie rechten nich soo aus jie sullen, un vedreien aules waut sest kloa wia;

¹⁰Jie brucken Jewault om Zion opptobuen, un meenen daut met orrajcht doonen, woa jie Jerusalem stoakj moaken.

¹¹June aunjestalde loten sikj bekjeepen, de Priestasch nämen betolt fa daut rajcht utlajen, un de Profeeten nämen Jelt fa daut waut see profezeien. Un to de selwje Tiet beroop jie junt opp däm HARN un sajen: “Es de HAR nich mank ons? Dan kaun kjeen Schoden opp ons komen.”

¹²Nu saj ekj mau, daut es wäajen junt, daut Zion jeplieecht woaren woat aus een Flekj, Jerusalem woat een Steenahupen sennen, un de Tempel Boajch woat een Humpel met Struck bewossen sennen.