Read Plautdietsch (Low German) – De Bibel Micha 5 Bible Online

Micha 5 - Plautdietsch (Low German) – De Bibel bible

Micha 5

¹Oba du, Betlehem, mank de Efratita, wan du uk eene von de kjliene Famieljes en Juda best, von die woat dee komen, dee äwa Israel de Leida sennen woat. Hee es dee, däm sien Aunfank un sien aufstaumen von lang häa jewast es.

²Nu lat hee sien Volkj lieden bat de Tiet kjemt, wan de Leida saul jebuaren woaren; oba dan woat daut äwaje von sien Frintschoft trigj no äa Volkj finjen.

³Un hee woat äwadäl komen un en däm HARN siene Krauft, un en de Macht von daut Wuat vom HARN, dee sien Gott es, leiden. Un siene Menschen woaren en Fräd läwen, wiels hee woat äwa de gaunze Ieed harlich sennen,

⁴un hee selfst woat de Fräd sennen. Wan Assur en ons Launt komen woat, un see onse Städa, dee wie stoakj jemoakt haben, dolbräakjen woaren, dan woa wie säwen Hoads un acht Leidasch jäajen an stalen,

⁵un dee woaren daut Launt Assur met daut Schwieet dolhoolen, un de Nimrod Jäajent met een kolet Schwieet rejieren. Soo woa wie von Assur jerat woaren, wan see ons Launt äwafaulen un äwa onse Jrensen enbräakjen.

⁶Un dee waut von de Israeliten äwajebläwen sent, woaren en veschiedne Lenda aus een erfreschenda Deiw vom HARN sennen; dee woaren aus een Räajen oppe Weid sennen, dee sikj no kjeenem recht un dee no kjeen Mensch horcht.

⁷Un dee waut von de Israeliten äwajebläwen sent, woaren mank de Velkja medden mank en veschiedne Lenda sennen, soo aus een Leiw mank de Tieren em Woolt, ooda aus een junga Leiw mank eene Häad Schop, däm kjeena aufwäaren kaun, wan hee nenbrakjt un vetraumpelt un veritt.

⁸Diene Krauft woat jewennen jäajen dee waut jäajen die sent, soo daut aul diene Fiend woaren utjerot woaren.

⁹Wan dee Tiet kjemt, sajcht de HAR, dan woa ekj de Pieed un de Kjrichswoages vedoawen.

¹⁰Ekj woa de huage Mieren rom june Städa un de Schutztorms em Launt dolbräakjen.

¹¹Ekj woa een Enj moaken met de Woasajarie, dee mank junt es, soo daut doa kjeena mea Tieekjens utlajen woat.

¹²Ekj woa een Enj moaken met de Jetta un de Steenmols, dee mank junt sent, soo daut jie nich mea daut aunbäden, waut von Menschenhenj jemoakt es.

¹³Ekj woa een Enj moaken von de Ascherapol un woa de Mieren rom june Städa dolbräakjen.

¹⁴Un ekj woa aul de Velkja, dee mie nich jehuarsom sent, met mienen grausomen Oaja bestrofen.