Read Plautdietsch (Low German) – De Bibel Nahum 1 Bible Online

Nahum 1 - Plautdietsch (Low German) – De Bibel bible

Nahum 1

¹Dit es waut de Profeet äwa Ninive to sajen haud. Hia es doljeschräwen waut Nahum von Elkosch profezeien deed.

²De HAR es een Gott dee trigjtolt; dee kjeenem aundren en siene Städ vedrajcht. De HAR tolt trigj un haft grooten Oaja. De HAR tolt siene Fiend trigj un vejat nich woo de Fiend am enjeoajat haben.

³De HAR es jeduldich un es sea stoakj; hee lat kjeenen schuldjen frie von waut am trafen sull. Hee es de HAR dee em Owwada un em Storm kjemt; de Wolkjen sent de Stoff von unja siene Feet.

⁴Hee schelt daut Mäa un daut drieecht ut; hee brinjt aule Riefasch toom utdrieejen. De Baschan un Karmel Boaj veschmachten un daut Jreens oppe Libanon Boaj vewalkjt.

⁵De huage Boaj zetren ver am un de Humpels veschwinjen; de Ieed un aules waut doabowen es scheddat.

⁶Wäa kaun sienen Oaja uthoolen; wäa kaun sienen heeten Groll vedroagen? Sien Oaja flaumt aus Fia, un de Steena vesprenjen ver am.

⁷De HAR es jenstich, un woat secha halpen wan doa Trubbel es. Hee es bedocht om dee, dee sikj opp am veloten.

⁸Met eene groote Äwaschwamunk moakt hee een Enj met dee, dee jäajen am sent. Hee jajcht siene Fiend deep em diestren nenn.

⁹Waut well jie noch jäajen Gott plonen? Hee woat een Enj moaken met däm Fient; kjeena kjemt toom tweeden mol jäajen am.

¹⁰See sent aus derch eenaunda jewosne Distlen, un dieslich aus een Drinkja; un see woaren vebrennen aus de reescha Stoppel.

¹¹Wäa schlajchtet jäajen däm HARN plont, un aunspornt beeset to doonen, kjemt von Ninive.

¹²Dit es waut de HAR sajcht: Lot an sikj soo reed moaken aus see kjennen, un soo väl Mana nämen aus mäajlich, doch woaren see doljebrocht woaren, un woaren een Enj haben. Wan ekj die, mien Volkj, uk toojesat hab, ekj woa die nich wada toosaten.

¹³Nu woa ekj daut Joch tweibräakjen, waut dee die oppjelajcht haben, un diene Strenj tweirieten.

¹⁴Dit es waut de HAR äwa Ninive to sajen haft: Doa woaren kjeene Nokomen dienen Nomen haben. Ekj woa de Jetta un de Bilda ut diene Tempel rutrieten; ekj woa dien Grauf reed moaken, wiels du soo schlajcht best.