Read Plautdietsch (Low German) – De Bibel Nahum 3 Bible Online

Nahum 3 - Plautdietsch (Low German) – De Bibel bible

Nahum 3

¹Woo es de merda Staut daut doch jegonen? Dee wia gaunz voll von Läajes un jestolnet, un wull nich met äare Stälarie opphieren.

²Doa woaren de Pitschen knaulen un de Räda klaupren; doa woaren de Pieed ranen un de Woages pralen.

³Rittasch foaren too met blenkjaje Schwieed un met blitzende Spiessen. Doa sent väl omjebrocht, Klompes von Doodes, daut dee nich to talen sent. Mana stolpren äwa de jestorwne.

⁴Nu woat Ninive bestroft, wiels see soo schmeichlen kunn un soo bedutzen deed. Dee haft de Lenda sea utjenuzt, un velokt un unjajedrekjt.

⁵Ekj woa met die vehaundlen, sajcht de HAR, dee aules rejieet. Ekj woa dien Rock äwa dien Jesecht häwen, un woa de Velkja loten diene kole Hut seenen. De groote Lenda woaren diene Schaund seenen.

⁶Ekj woa Aufgank opp die schmieten, un junt loten toschaund woaren. De Menschen woaren sikj wundren äwa waut see seenen.

⁷Aul dee waut die seenen, woaren von die wajchranen un sajen: Ninive es enne Grunt jebrocht. Wua finj ekj wäm, dee äwa ar truat? Wua finj ekj noch dee, dee ar treesten woaren?

⁸Dochst du daut du bäta wieescht aus de Staut No Amon, dee aum Niel wia? Dee haud Riefasch runtom enne Städ Mieren.

⁹Kusch un Ägipten muaken ar stoakj; Putt un Libien holpen ar.

¹⁰Oba doch worden de Menschen faustjenomen, un wajchjeleit. Äare Kjinja worden grausom oppe Gaussen omjebrocht, un om äare aunjeseene Mana schmeeten see daut Loss, toom seenen wäa dee nämen wudd. Dee waut doa de Macht jehaut hauden, worden met Kjäden jebungen.

¹¹Du woascht uk bedrunken woaren, un die nich weeten, un woascht die vekrupen motten ver dienen Fient.

¹²Aul diene Städa, dee nich sullen entonämen sennen, sent soo aus de Fiejenboom met riepe Frucht: wan dee jescheddat woat, felt däm, wäa doa äten well, de Frucht em Mul nenn.

¹³Horch emol. June Soldoten woaren sennen aus Frulied em Kjrich; un de Puaten em Launt nenn woaren fa de Fiend opjemoakt woaren. De Baulkjes ver de Puaten woaren vebrennen.

¹⁴Vesorj die met Wota, un moak diene Mieren stoakja. Fang aun Leem to kjnäden, ria daut Blott en un moak Tieejlen.

¹⁵Oba du woascht em Fia vebrennen un daut Schwieet woat die ombrinjen. Daut Fia woat die fräten aus de Kjniepasch. Vemia die aus de Kjniepasch; vemia die aus Graushoppasch.

¹⁶Du hast mea Haundelsmana aus doa Stierns aum Himmel sent; oba nu woaren dee soo aus Kjniepasch äare Flichten kjrieen un wajch flieejen.

¹⁷Du hautst soo väl huachbeaumte aus Graushoppasch, un soo väl aunjestalde aus een Schwoarm Kjniepasch dee sikj aun eenen Tun saten aun eenen kolden Dach. Oba wan de Sonn äwadäl kjemt, flieejen see opp un kjeena weet wuahan.

¹⁸Diene Hoads woaren schlopen, du Kjennich von Assur, un diene stoakje Mana sent enjeschlopen. Dien Volkj es oppe Boaj vestreit, un kjeena bemieecht sikj dee tooptosaumlen.

¹⁹Kjeena woat sikj bemieejen junen Schoden opptohoolen, un diene Wunden woaren soone sennen, waut nich veheelen. Aule waut von dienen Schoden hieren, woaren met de Henj klautschen. Wua es doa noch eena, dee nich onen Enj, dienen Groll haft lieden must?