Read Plautdietsch (Low German) – De Bibel Zefanja 1 Bible Online

Zefanja 1 - Plautdietsch (Low German) – De Bibel bible

Zefanja 1

¹Dit es de Norecht, dee de HAR Zefanja jeef, en de Tiet aus Josia, Amon sien Sän, Kjennich en Juda wia. Zefanja sien Voda wia Kuschi, Kuschi sien Voda wia Gedalja, Gedalja sien Voda wia Amarja, un Amarja sien Voda wia Hiskia.

²Ekj woa aules wajchfäajen von oppem Ieedboddem, sajcht de Har.

³Ekj woa de Menschen un daut Vee, de Väajel enne Loft un de Fesch em Mäa wajchriemen. Ekj woa de gottloose venichten, un de Menschen oppem Ieedboddem utroden, sajcht de Har.

⁴Ekj woa miene Macht jäajen Juda eewen, un jäajen aul dee waut en Jerusalem wonen. Ekj woa opp dise Städ aules utriemen, waut von Baal jebläwen es, un junt woat nuscht mea von däm siene Priestasch denkjen.

⁵Krakjt soo woa ekj met dee doonen, waut oppe Däakja de Sonn, de Mon un de Stierns aunbäden; un uk dee waut däm HARN aunbäden un äa Vespräakjen bie am jäwen, un doch uk bie Milkom äa Vespräakjen jäwen.

⁶Ekj woa een Enj moaken von dee, dee vom HARN aufjefollen sent, un nich no am froagen ooda horchen.

⁷Siet stell ver Gott däm HARN, wiels däm HARN sienen Dach es dicht bie. De HAR haft een Opfa reed jemoakt un haft de Jast doafäa reed jemoakt.

⁸Aun däm Dach wan de HAR sien Opfa brinjen woat, woa ekj de aunjestalde un däm Kjennich siene Säns, un aul dee waut sikj no aundre Lenda äare Tracht rechten, bestrofen.

⁹Un ekj woa uk dee strofen, dee äwa de Schwal hupsen, un doamet äare Jetta ieren; un uk dee waut äaren Harn sien Hus met stälen un väamoaken voll moaken.

¹⁰Un wan dee Tiet kjemt, sajcht de HAR, woat doa een hielen vom Fesch Puat to hieren sennen, un een stänen von daut niee Stautsvieedel. Doa woat een grootet krachen von de Boaj komen.

¹¹Truat, jie Menschen, dee jie em “Haundelsvieedel” wonen, wiels aule Haundels Mana sent wajch, un aul dee waut met Jelt haundlen sent nich mea.

¹²Un wan dee Tiet kjemt, woa ekj Jerusalem met Laumpen derchsieekjen, un ekj woa dee strofen waut jemietlich setten un sikj sajen: De HAR woat nuscht doonen, nich goodet ooda schlajchtet.

¹³Äare Sachen woaren jestolen woaren un äare Hiesa doljebroaken. See woaren Hiesa buen un doa nich bennen wonen; see woaren Wiengoades aunplaunten, un kjeenen Wien von dee drinkjen.

¹⁴De groota Dach fa däm HARN es dicht bie, un kjemt bosich noda. Horch! Däm HARN sienen Dach es een betra Dach, un dan woaren de stoakjste Soldoten schrieen.

¹⁵De Dach es een Dach wan Oaja utjeeeft woat. Daut es een schrakjelja Dach, een liedens Dach, un een enjstelja Dach. Daut es een Dach met Storm un Schoden, een diestra un dunkla Dach met Wolkjen un dikjen Näwel.

¹⁶Daut es een Dach, wua de Trompeet blost un de Soldoten schrieen jäajen eene Staut met eene huage Mia, un huage Torms.

¹⁷Ekj woa de Menschen veenjsten, daut see romgonen aus blint. See haben jäajen däm HARN jesindicht, un nu woat äa Bloot rutjeschmäten aus Mell, un äare Doarm aus Mest.

¹⁸Äa Selwa un äa Golt woat an nich raden kjennen aun däm Dach wan Gott sien Oaja uteeft. Met daut Fia von sienen Oaja woat daut gaunze Launt doljebrocht woaren. Hee woat plazlich een Enj moaken met aul dee waut oppe Ieed wonen.