Read Plautdietsch (Low German) – De Bibel Hagai 1 Bible Online

Hagai 1 - Plautdietsch (Low German) – De Bibel bible

Hagai 1

¹Daut kjeem emol, aun dän 1. Dach en de 6. Moonat en daut 2. Joa aus Darius Kjennich äwa daut Persarikj wia, daut de HAR eene Norecht fa Serubabel un Jeschua jeef derch däm Profeet Hagai. Serubabel, Schealtiel sienen Sän, wia dan de väaschta en Juda un Jeschua, Jozadak sienen Sän, wia de Huagapriesta.

²Un dit es waut de HAR, dee aules rejieet, säd: Dit Volkj sajcht daut et noch nich de Tiet es toom däm HARN sien Hus buen.

³Un de HAR jeef dit Wuat fa de Menschen derch däm Profeet Hagai:

⁴Es daut dan aul Tiet, daut jie en feine foadje Hiesa wonen, wan dit Hus noch goanich to brucken es?

⁵De HAR, dee aules rejieet, sajcht soo to dit: Paust goot opp, woo junt daut werkjlich jeit.

⁶Jie haben väl jeseit, oba weinich enjekjräajen. Jie haben to äten oba nich saut to äten. Jie drinkjen, oba nich daut jie emol voll woaren. Jie trakjen junt waut aun, oba jie haben nich toom junt jescheit woam auntrakjen. Dee waut sikj waut vedeent, dee mott daut en eene Tausch lajen, dee Lajcha haft.

⁷Dit es waut de HAR, dee aules rejieet, sajcht: Paust goot opp, woo junt daut werkjlich jeit.

⁸Got emol enne Boaj un holt Holt, un but daut Hus, daut ekj doa kaun een Jefaulen aun haben, un daut ekj doa jeieet woa, sajcht de HAR.

⁹Horcht emol, jie hopten opp een Deel un kjrieejen weinich. Un aus jie daut no Hus brochten, pust ekj daut wajch. Wuarom deed ekj daut? frajcht de HAR, dee aules rejieet. Ekj deed daut wiels mien Hus gaunz enne Grunt licht, un een jiedra soo bemieecht es, sien ieejnet Hus väatostonen.

¹⁰Daut es wuarom daut nich jedeift haft un de Ieed nuscht jedroacht haft.

¹¹Ekj hab dise drieeje Tiet opp junt jebrocht, soo daut jun Launt un june Boaj, jun Jeträajd, jun Wien un june Eelj, un waut sest von de Ieed kjemt, lieden mott. Ekj hab daut to eene schwoare Tiet fa Menschen un Vee jemoakt, un fa aules waut jie aun Haunt haben.

¹²Dan horchten Serubabel, Schealtiel sien Sän, un Jeschua, Jozadak sien Sän, dee de Huagapriesta wia, un uk aul dee waut äwajebläwen wieren von daut Volkj, daut faustjenomen un wajchjefieet worden wia, no däm HARN äaren Gott siene Stemm un no de Wieed, dee de HAR äa Gott däm Profeet Hagai jejäft haud. Daut Volkj haud Forcht fa däm HARN aus see hieeden waut siene Norecht fa an wia.

¹³Un Hagai, dee de Norecht vom HARN jekjräajen haud, un dee daut Volkj de Norecht sajen sull, säd: De HAR sajcht, Ekj sie met junt.

¹⁴Un de HAR jeef Serubabel, Schealtiel sien Sän, dee de väaschta von Juda wia, eenen weljen Jeist. Un hee jeef uk Jeschua, Jozadak sien Sän, dee Huagapriesta wia, eenen weljen Jeist. Un hee jeef dee, dee von daut Volkj äwajebläwen wieren, eenen weljen Jeist. Soo kjeemen see aula un fungen aun daut Hus fa däm HARN äaren Gott, dee aules rejieet, to buen.

¹⁵Dit passieed aum 24. Dach en de 6. Moonat en daut 2. Joa daut Darius Kjennich wia.