Read Plautdietsch (Low German) – De Bibel Hagai 2 Bible Online

Hagai 2 - Plautdietsch (Low German) – De Bibel bible

Hagai 2

¹Aum 21. Dach en de 7. Moonat, en daut selwje Joa, kjrieech de Profeet Hagai eene Norecht vom HARN.

²De HAR säd am, daut hee sull Serubabel, Schealtiel sien Sän, dee de väaschta von Juda wia, un Jeschua, Jozadak sien Sän, dee de Huagapriesta wia, un dee, dee von daut Volkj äwajebläwen wieren, sajen:

³Wäa es noch von dee jebläwen, dee dit Hus ieeschtemma sagen aus daut noch groosoatich wia? Un woo lat junt daut nu? Lat daut nich no nuscht?

⁴Serubabel, de HAR sajcht to die, sie mootich; un uk to die, Jeschua, Jozadak sien Sän, sie mootich. Un de HAR sajcht to junt aula, dee jie en dit Launt sent, siet uk mootich un oabeit. Ekj sie met junt, sajcht de HAR, dee aules rejieet,

⁵soo aus ekj junt uk vespruak aus jun Volkj emol ut Ägipten rut kjeem. Un mien Jeist es noch emma mank junt; enjst junt nich.

⁶Dit es waut de HAR, dee aules rejieet, sajcht: Daut es aul mau eene korte Tiet bat ekj dän Himmel un de Ieed, daut Mäa un daut drieeje Launt schedren woa.

⁷Ekj woa aule Velkja schedren. Dan woaren aul äare Schaza häa jebrocht woaren, un ekj woa dit Hus groosoatich moaken, sajcht de HAR, dee aules rejieet.

⁸Daut Selwa es mient, un daut Golt es mient, sajcht de HAR, dee aules rejieet.

⁹Dit Hus woat noch harlicha sennen aus daut ieeschte, sajcht de HAR, dee aules rejieet; un ekj woa dise Städ fräd un een goodet wiedakomen jäwen.

¹⁰Aum 24. Dach en de 9. Moonat en daut 2. Joa aus Darius Kjennich wia, kjrieech de Profeet Hagai dise Norecht vom HARN:

¹¹De HAR, dee aules rejieet, sajcht: Froacht de Priestasch, waut daut Jesaz to dise Froag sajcht:

¹²Well wie emol sajen, daut wäa jeweidet Fleesch von een Opfa nemt, un daut en eene Fold von siene Kjleeda drajcht. Wan hee dan met sien Kjleet waut Broot, waut jekoaktet, waut Wien, ooda Eelj ooda sest waut Äten aunschieet, woat daut waut hee aunschieet doaderch jeweit? Un de Priesta dochten doaräwa no un säden: Nä.

¹³Un Hagai säd: Wan oba wäa eenen Dooden aunjeschieet haud un doaderch orrein wia, un dee dan soon Äten aunschieed, wudd daut dan orrein sennen? Un de Priestasch säden: Dan wudd daut orrein sennen.

¹⁴Dan säd Hagai: De HAR sajcht: Krakjt soo es daut fa mie met dit Volkj un met dise Menschen. Aules waut jie doonen un waut jie doa opfren es mie orrein.

¹⁵Nu saj ekj junt: Bedenkjt junt daut, woo junt daut von nu aun un wieda gonen woat. Aus doa noch nich een Steen opp dän aundren aum HARN sien Tempel jelajcht wia,

¹⁶woo jinkj junt daut dan? Wan wäa docht, hee kunn 20 Sakjvoll von sien Flekj kjrieen, kjrieech hee mau 10; un wan wäa docht, hee kunn 50 Ama en siene Wiendruwenpras kjrieen, kjrieech hee mau 20 Amavoll.

¹⁷Ekj muak june Oabeit schwoa fa junt un leet june Flekja befaulen un Braunt kjrieen. Ekj schekjt uk dän Hoagel, oba jie kjeemen nich no mie no Rot, sajcht de HAR.

¹⁸Oba paust opp woo junt daut nu wieda gonen woat, von vondoag un wieda, von dän 24. Dach von de 9. Moonat, von dän Dach daut de Foot fa däm HARN sien Tempel jelajcht wort. Ekj saj mau: Paust opp, un denkj doaräwa no.

¹⁹Wan jie daut Jeträajd uk noch nich em Spikja haben, un nuscht von de Wienranken, de Fiejenbeem, de Apelbeem, un de Oliewenbeem nenjebrocht haben, von disen Dach aun woa ekj junt säajnen.

²⁰De HAR jeef Hagai noch eemol eene Norecht aun dän 24. en de Moonat:

²¹Saj Serubabel, dee de väaschta en Juda es: Ekj well dän Himmel un de Ieed schedren

²²un een Enj moaken met de Rejierungen von de Velkja, un woa äare Macht to nuscht moaken. Ekj woa äare Kjrichswoages un dee äare Ritta omstelpen. De Pieed woaren faulen un de Mana woaren sikj unjarenaunda met daut Schwieet ombrinjen.

²³Aun dän Dach, sajcht de HAR, dee aules rejieet, woa ekj die, Serubabel, mien Deena, Schealtiel sien Sän, nämen un aus Leida aunstalen un du woascht fa mie rejieren. Ekj hab die jewält, sajcht de HAR, dee aules rejieet.