Read Plautdietsch (Low German) – De Bibel Sacharja 1 Bible Online

Sacharja 1 - Plautdietsch (Low German) – De Bibel bible

Sacharja 1

¹En de 8. Moonat von daut 2. Joa daut Darius Kjennich wia, jeef de HAR däm Profeet Sacharja dise Norecht. Sacharja wia Berechja sien Sän, un Ido däm Profeet sienen Grootsän.

²En de Norecht säd de HAR to däm Profeet: De HAR es sea oajalich jewast äwa june Elren.

³Un nu sajcht de HAR, dee aules rejieet: Komt trigj no mie, un dan woa ekj trigj no junt komen. Dit sajcht de HAR, dee aules rejieet.

⁴Siet nich soo aus june Elren. To dee säden de Profeeten: “De HAR, dee aules rejieet, sajcht: Komt trigj von june schlajchte Wäaj, un von jun beeset Väahaben.” Oba see horchten doa nich no, sajcht de HAR, dee aules rejieet.

⁵Un waut es met june Elren jeworden? Ooda waut es met de Profeeten passieet? Läwen dee noch?

⁶Oba sent miene Woarnungen, un daut waut ekj derch miene Profeeten säd, nich aula soo romjekomen? Un onse Vodasch besonnen sikj doaräwa un säden: “De HAR, dee aules rejieet, haft krakjt soo met ons jedonen, aus hee säd daut hee wudd, wan wie opp onse ieejne Wäaj gonen wudden, un bie ons ieejnet Väahaben bliewen wudden.”

⁷Dan en däm Kjennich Darius sien 2. Joa en de 11. Moonat, de Moonat Schebat aum 24. Dach, jeef de HAR däm Profeet Sacharja eene Norecht. Un Sacharja säd:

⁸Horcht emol, ekj sach en de Nacht een roodet Pieet met eenen Ritta bie de Mirtenbeem em Tol stonen. Un hinja am wieren mea roode, brune, un witte Pieed.

⁹Un ekj säd: Waut bedieden dise Pieed, mien Har. Un de Enjel, dee to mie räd, säd: Ekj woa die wiesen, waut dit bediet.

¹⁰Dan säd de Maun bie de Mirtenbeem: Dit sent dee, dee de HAR schekjt, daut see oppe Ieed noseenen sellen.

¹¹Dan säden dee, dee bie de Mirtenbeem stunden, to däm Enjel: Wie sent aulawäajen oppe Ieed jewast, un de Ieed es ruich un frädlich.

¹²Dan säd däm HARN sien Enjel: HAR, dee aules rejieet, woo lang woascht du nich Metleet äwa Jerusalem un de Städa en Juda haben? Du best nu aul 70 Joa äwa an oajalich jewast.

¹³Dan räd de HAR leeftolich to däm Enjel un treest am.

¹⁴Un de Enjel säd to mie: Saj de Lied, daut de HAR, dee aules rejieet, sajcht: Ekj vedroag daut nich, daut aundre de Macht äwa Jerusalem un Zion haben.

¹⁵Ekj wia een beskje oajalich äwa Israel, oba de prauzje Velkja haben daut too wiet jedräwen. Ekj sie sea veoajat äwa an.

¹⁶Un nu horcht no waut de HAR sajcht: Ekj sie met Metleet trigj no Jerusalem jekomen. Mien Hus woat doa jebut woaren, sajcht de HAR, dee aules rejieet. De Motbaunt woat aulawäajen en Jerusalem em Jebruck komen.

¹⁷Un dan saj uk noch dit: De HAR, dee aules rejieet, sajcht: Miene Städa woaren noch wada goot buaren. Un de HAR woat Zion noch wada treesten, un hee woat uk noch wada Jerusalem fa sien Tus wälen.