Read Plautdietsch (Low German) – De Bibel Sacharja 10 Bible Online

Sacharja 10 - Plautdietsch (Low German) – De Bibel bible

Sacharja 10

¹Froacht däm HARN no dän loten Räajen; daut es hee, wäa doa de Wolkjen toopsaumelt. Hee brinjt dän Räajen fa de Menschen, un moakt de Flekja fa jiedrem waussen.

²Waut de Jetta sajen, es nuscht, un de Woasaja lieejen junt väa; dee moaken sikj waut opp un hoolen junt soont väa, wua kjeen Troost bennen es. Daut es wuarom mien Volkj rombeiselt, aus eene Häad onen eenen Hoad; see sent veacht, wiels doa kjeena es waut an leit.

³Ekj oaja mie sea äwa de Hoads, un ekj woa de Leidasch bestrofen. De HAR, dee aules rejieet, woat fa siene Häad oppkomen; hee woat daut judsche Volkj reed moaken, soo aus eena sien Pieet toom Kjrich reed moakt.

⁴Von an woat de Akjsteen komen; von an woat de Zeltstekjel komen; von an woat de Soldotenboagen komen; un von an woat jieda Leida komen.

⁵Aus stoakje Soldoten em Kjrich, woaren see däm Fient em Blott oppe Gaussen unjaklunjen. See woaren fa sikj enstonen, wiels de HAR woat met an sennen; dee woaren soogoa de Rittasch oppe Pieed toschaund brinjen.

⁶Ekj woa daut judsche Volkj stoakj moaken un Josef siene Nokomen friemoaken. Ekj woa an wada aunerkjant moaken, wiels ekj an goot sie. See woaren wada soo sennen aus verhäa, ea ekj an veschlapt. Ekj sie de HAR äa Gott, un woa no an horchen.

⁷Efraim woat soo aus een stoakja Soldot sennen, un see woaren soo schaftich sennen, aus wan see Wien jedrunken haben. Äare Kjinja woaren daut seenen un woaren sikj freien; see woaren vom Hoaten däm HARN preisen.

⁸Ekj woa an roopen un an toopsaumlen. Ekj hab an friejemoakt, un see woaren een grootet Volkj woaren, soo aus verhäa.

⁹Wan ekj an uk wiet mank de Velkja vespreet hab, woaren see uk doa aun mie denkjen. See woaren doa Famieljes haben un trigj komen.

¹⁰Von Ägipten woa ekj an trigjbrinjen, un ut Assierien woa ekj an saumlen. Ekj woa soo väl von an no Gilead un Libanon brinjen, daut doa nich woat fa aulem Rum sennen.

¹¹See woaren derch een Mäa von schwoare Tieden gonen, oba ekj woa de Walen stellen, un daut Wota woat bat opp daut latste utdrieejen. De stolte Assiera woaren von äaren stolt vejäten, un de ägiptische Macht woat to Enj jebrocht woaren.

¹²Ekj woa an derch miene Krauft stoakj moaken, un see woaren no mie horchen un jehuarsom sennen, soo sajcht de HAR.