Read Plautdietsch (Low German) – De Bibel Sacharja 11 Bible Online

Sacharja 11 - Plautdietsch (Low German) – De Bibel bible

Sacharja 11

¹Moakt de Däaren op, Libanon, soo daut daut Fia june Zeeda vebrennen woat.

²Lot de Taunenbeem schrieen, wiels de Zeeda jefollen sent; de straume Beem sent nich mea. Lot de Ieekjen en Baschan hielen, wäajen de dichta Woolt doljeschnäden es.

³Horcht woo de Hoads hielen, wiels äare goode Weid vedorwen es. Horcht woo de Leiws brellen, wiels de schmocka Jordan Woolt venicht es.

⁴De HAR mien Gott sajcht soo: Weid de Schop, dee boolt jeschlacht sellen.

⁵Dee, dee dee kjeepen woaren, woaren dee schlachten un nich tweemol doaräwa denkjen; un dee, dee dee vekjeepen, sajen: Ekj dank däm HARN, nu sie ekj rikj. De Hoads doonen nuscht toom dee bewoaren.

⁶Ekj woa dee, dee en dit Launt wonen nich mea bewoaren, sajcht de HAR. Ekj woa eenen jiedren loten utjenuzt woaren von sienen Noba, un uk von sienen Kjennich. Daut gaunze Launt woat tonicht jebrocht woaren, un ekj woa an nich raden.

⁷Soo wort ekj een Hoad fa de Schop, dee boolt jeschlacht sullen, un besondasch fa dee waut daut aul schlajcht hauden. Un ekj neem twee Stakja, eenen nand ekj “Jnod”, un dän aundren “Eenich”, un soo deed ekj dan Schop heeden.

⁸En eene Moonat wort ekj dree Hoads loos. Oba ekj wort ojjeduldich met de Häad, un dee kunnen mie nich vedroagen.

⁹Dan säd ekj: Ekj woa junt nich lenja heeden. Dee waut aum stoawen sent, lot stoawen, un dee waut omjebrocht woaren, lot omkomen. Un de äwaje lot sikj unjarenaunda oppfräten.

¹⁰Un ekj neem mienen Stock, däm ekj “Jnod” nand, un bruak däm twei. Doamet veschmeet ekj mienen Bunt, dän ekj met aule Velkja jemoakt haud.

¹¹Soo jeef ekj dän Dach mien Bunt met an opp. Un de Schop waut daut aul schlajcht hauden, dee sagen daut dit een Tieekjen vom HARN wia.

¹²Un ekj säd to an: Wan junt daut goot es, dan tolt mie doafäa ut. Oba wan nich, dan hoolt daut. Un see tolden mie 30 Selwastekja.

¹³Daut wia uk eene scheene Somm, waut ekj an wieet wia. Un de HAR säd to mie: Schmiet daut Jelt no däm, dee em Tempel de Kaus haft. Un soo jinkj ekj em Tempel un schmeet däm Selwa Schmett daut väa.

¹⁴Dan bruak ekj mienen aundren Stock, dän ekj “Eenich” nand. Doamet brocht ekj de Eenichkjeit von Juda un Israel to een Enj.

¹⁵Un de HAR säd to mie: Nemm nochmol daut Jereetschoft von eenen eefachen Hoad opp die.

¹⁶Ekj woa hia en dit Launt eenen Hoad stalen, dee nuscht romjeft om dee waut doa stoawen, dee nich no dee sieekjt waut sikj velieren, dee de lome nich besorcht, un de jesunde nich to äten jeft. Hee woat daut Fleesch von de fate Schop äten, un dee de Heefta aufrieten.

¹⁷Daut es schlemm bestalt met däm Hoad, dee nuscht daucht un de Häad velat. Mucht am daut Schwieet aum rajchten Oarm un en daut rajchte Uag trafen, soo daut de Oarm gaunz vedrieecht un daut Uag blint woat.