Read Plautdietsch (Low German) – De Bibel Sacharja 12 Bible Online

Sacharja 12 - Plautdietsch (Low German) – De Bibel bible

Sacharja 12

¹Eene wichtje Norecht vom HARN, äwa Israel. Dit es waut de HAR sajcht: De HAR es dee, wäa dän Himmel utspreet, wäa de Ieed äaren Grunt jeft, un wäa em Mensch dän Odem helt.

²Ekj moak von Jerusalem een Kuffel, woont aule Velkja, dee doa runtom sent, woat dieslich moaken. Jerusalem un Juda woaren toop omrinjt woaren,

³un aule Velkja oppe Ieed woaren jäajen an komen. En dee Tiet woa ekj von Jerusalem een grooten Steen moaken, dee nich wieda to saten jeit, un jieda Volkj waut däm woat wellen wiedasaten, woat sikj sea schnieden. Un aule Velkja woaren jäajen ar komen.

⁴En dee Tiet woa ekj jieda Pieet veenjst, un jieda Ritta derchhan moaken. Oba äwa Juda woa ekj miene Uagen ophoolen, wan ekj aule Pieed von de Velkja woa blint moaken.

⁵De Menschen von Juda woaren dan seenen, daut see stoakj sent, wiels de HAR, dee aules rejieet, de Gott fa Jerusalem es.

⁶Wan dee Tiet kjemt, woat Juda aus een Eeljfia em Holtklompen sennen, un aus een brennenda Stock mank de Goawen. Dee woaren linkjsch un rajchtsch de Velkja rom an venichten. Un Jerusalem woat wada opp äare Städ Jerusalem sennen.

⁷De HAR woat de Lied en Juda daut ieeschte raden, soo daut David siene Nokomen un de Lied en Jerusalem, dee soo groosoatich sent, sikj nich hecha denkjen, aus dee waut en Juda wonen.

⁸Wan dee Tiet kjemt, woat de HAR de Lied en Jerusalem bewoaren. Dan woat de schwaksta von an soo sennen aus David, un David siene Nokomen woaren soo veropp gonen aus Gott deit, un see woaren soo aus däm HARN siene Enjel sennen.

⁹Wan dee Tiet kjemt, woa ekj aul dee dolschlonen, dee jäajen Jerusalem komen.

¹⁰Ekj woa dan äwa David siene Nokomen un de Lied en Jerusalem eenen Jeist utjeeten, daut see een Metlieden met eenaunda haben woaren un aunbäden woaren. An woat daut schod sennen, äwa däm dän see jestoaken haben, un see woaren doaräwa truaren, soo aus eena äwa een eensjet Kjint truat. See woaren sikj jrämen un woaren hielen, aus äwa dän Doot von eenem sienen Ieeschtjebuarnen.

¹¹En Jerusalem woat dan soon grootet truaren sennen, aus emol bie Hadad Rimmon en Megiddo wia.

¹²Un en daut gaunze Launt woaren de Lied truaren: David siene Nokomen fa sikj, un äare Frumenschen fa sikj; Natan siene Nokomen fa sikj, un äare Frumenschen fa sikj;

¹³de Leviten fa sikj, un äare Frumenschen fa sikj; Schimi siene Nokomen fa sikj, un äare Frumenschen fa sikj;

¹⁴un krakjt soo aule äwaje Famieljes emma fa sikj, un äare Frumenschen fa sikj.