Read Plautdietsch (Low German) – De Bibel Sacharja 13 Bible Online

Sacharja 13 - Plautdietsch (Low German) – De Bibel bible

Sacharja 13

¹Wan dee Tiet kjemt, woat doa een Borm opgonen fa David siene Nokomen un de Lied en Jerusalem. Met daut Wota woaren see von Sinden un Onjehuarsom rein jemoakt woaren.

²Un wan dee Tiet kjemt, sajcht de HAR, dee aules rejieet, woa ekj em Launt soogoa de Nomes von de Jetta utroden, daut nich mea aun dee jedocht woaren woat. Un ekj woa de Profeeten un orreine Jeista ut daut Launt rutdriewen.

³Un wan noch wada wäa profezeien woat, dan woaren däm sienen Voda un Mutta, dee am oppjetrocken haben, sajen: Du saust stoawen doafäa, daut du en däm HARN sienen Nomen de Onwoarheit rätst. Un sien Voda un siene Mutta, dee am oppjetrocken haben, woaren am doot moaken wan hee profezeien woat.

⁴En dee Tiet woat jieda Profeet sikj schämen siene Norecht bekaunt to moaken, un hee woat nich eenen Mauntel von Kosenhoa brucken, soo daut hee nich aus een Profeet jeseenen woat.

⁵Hee woat daut vestrieden, daut hee een Profeet es, un woat sajen, daut hee een Foarma es, un daut hee noch emma es Foarma jewast.

⁶Un wan see am froagen woaren, von waut de Wunden aun siene Brost sent, dan woat hee sajen: Ekj kjrieech de Wunden, aus ekj bie miene Frind wia.

⁷Komm emol äwadäl, Schwieet, un moak die jäajen mienen Hoad; jäajen däm, dee mie daut notste steit, sajcht de HAR, dee aules rejieet. Schlo däm Hoad, un lot de Häad sikj vespreeden. Ekj woa miene Macht uk jäajen de junge Hoads wiesen.

⁸Twee dreddel von de Lied en daut Launt woaren omkomen un stoawen, sajcht de HAR, un een dreddel woat äwabliewen.

⁹Un ekj woa dee waut äwabliewen, derchem Fia nämen un an rein moaken, soo aus eena Selwa rein kjricht, un an dolschmelten, soo aus eena Golt dolschmelt. Dee woaren dan mienen Nomen aunroopen, un ekj woa no an horchen. Ekj woa sajen: Dit es mien Volkj, un see woaren sajen: De HAR es ons Gott.