Read Plautdietsch (Low German) – De Bibel Sacharja 14 Bible Online

Sacharja 14 - Plautdietsch (Low German) – De Bibel bible

Sacharja 14

¹Horch emol. Däm HARN sien Dach kjemt, un dan woa jie tookjikjen, wan see sikj daut endeelen woaren, waut see von junt jenomen un jestolen haben.

²Ekj woa aule Velkja toopbrinjen, daut see jäajen Jerusalem kjriejen. Un dee woaren de Staut ennämen un de Jebieda bestälen, un woaren met de Frues Schaund driewen. De halft von de Lied enne Staut woaren faustjenomen woaren un veschlapt woaren. Oba de äwaje woaren enne Staut bliewen.

³Un de HAR woat jäajen de Velkja kjamfen, soo aus see en eenen Kjrich kjamfen.

⁴Un wan dee Tiet kjemt, dan woat hee met siene Feet oppem Oliewen Boajch stonen, dee doa oosten von Jerusalem es. Un de Oliewen Boajch woat sikj vom Oosten nom Wasten breet opspoolen, un daut eene Poat woat sikj nom Sieden, un daut aundre Poat nom Nuaden vesaten.

⁵Un jie woaren en daut Tol tweschen miene Boaj flichten, soo aus jie en de Tiet von däm judschen Kjennich Usija fa daut Ieedbäben randen. Daut Tol woat meist bat Azel rieekjen. Un dan woat de HAR ons Gott, un aul de heilje met am, komen.

⁶Doa woat en dee Tiet Licht sennen, un daut woat nich kolt sennen ooda frieren.

⁷Un daut woat dän selwjen Dach bliewen, soo aus de HAR daut kaun. Un doa woat nich Dach un Nacht sennen; daut woat Licht sennen aus aum Owent.

⁸Un en dee Tiet woaren doa läwendje Wotastreem ut Jerusalem ranen. De halft von dee woaren nom Mäa em Oosten ranen, un de halft nom Mäa em Wasten. De Riefasch woaren Somma un Winta ranen.

⁹Un de HAR woat äwa daut Launt Kjennich sennen. En dee Tiet woat de HAR bloos eena sennen un sien Nomen bloos eena.

¹⁰Daut gaunze Launt woat eene jlikje Stap sennen, von Geba bat Rimmon, sieden von Jerusalem. Oba Jerusalem woat huach ligjen, soo aus nu, von daut Benjamin Puat bat daut ieeschte Puat, un von doa bat daut Akj Puat, un von däm Hananel Torm bat däm Kjennich siene Wienprassen.

¹¹Un de Lied woaren en Jerusalem wonen un von kjeenem jedreift woaren. Soo secha woat de Staut sennen.

¹²Un de Velkja waut jäajen Jerusalem jekjamft haben, woat de HAR met eene Ploag bestrofen. Äa Fleesch woat wajch jefräten woaren, wan see noch oppe Been sent; äare Uagen woaren en äare Lajcha vekomen, un äare Tungen woaren an em Mul vedrieejen.

¹³Wan dee Tiet kjemt, woat de HAR eene furchtboare Angst opp an komen loten, soo daut see sikj unjarenaunda aunjriepen woaren. Een jiedra woat siene Haunt jäajen sienen näakjsten opphäwen.

¹⁴Un Juda woat Jerusalem en dän Kaumf halpen. Un doa woaren Selwa un Golt un Kjleeda en groote Maussen nenn jebrocht woaren.

¹⁵Un de selwje Ploag, dee äwa de Menschen kjemt, woat oppe Pieed, Mulasch, Kameelen, Äsels, un aul de Tieren en daut Loaga komen, waut sikj jäajen Jerusalem stalt.

¹⁶Un aul dee waut äwabliewen von de Velkja, waut jäajen Jerusalem kjriejden, woaren jieda Joa emma wada no Jerusalem gonen un doa däm Kjennich, de HAR, dee aules rejieet, aunbäden un daut Loofbooden Fast fieren.

¹⁷Un wan wua een Volkj nich woat no Jerusalem gonen däm Kjennich, däm HARN, dee aules rejieet, auntobäden, dan woat daut opp dee nich räajnen.

¹⁸Un wan de Ägipta sikj nich wudden bemieejen un no Jerusalem komen, dan wudd an de selwje Ploag trafen aus aule aundre Velkja, dee nich toom Loofboodenfast kjeemen.

¹⁹Ägipten woat bestroft woaren, krakjt soo aus aundre Velkja, dee nich toom Loofbooden Fast komen.

²⁰Wan dee Tiet kjemt, woaren opp de Pieed äare Kjlinjasch dise Wieed sennen: “Heilich fa däm HARN”. Un de Gropes en däm HARN sien Hus woaren soo sennen aus de Kommen biem Aultoa.

²¹Aule Gropes en Jerusalem un Juda woaren heilich fa däm HARN, dee aules rejieet, sennen. Aul dee waut een Opfa brinjen wellen, woaren von de Gropes nämen, un daut Fleesch vom Opfa doabennen koaken. Wan dee Tiet kjemt, woat doa kjeena en daut Hus von däm HARN, dee aules rejieet, haundel driewen.