Read Plautdietsch (Low German) – De Bibel Sacharja 2 Bible Online

Sacharja 2 - Plautdietsch (Low German) – De Bibel bible

Sacharja 2

¹Eemol, aus ekj oppkjikjt, sach ekj vea Hieena.

²Un ekj säd to däm Enjel, dee doa met mie räd: Waut bedieden dise Hieena? Un hee säd: Dit sent de Hieena von dee, dee Juda un Israel un Jerusalem veschlapt haben.

³Un dan wees de HAR mie vea Schmets.

⁴Un ekj säd: Waut wellen dise? Un hee säd: Du weetst je, daut de Velkja soo hunjsch äwa Juda kjeemen un an veschlapten, daut kjeena dän Kopp jäajen an opphoof. Dise sent jekomen de Velkja de Hieena auftoschlonen. See sellen dee Velkja, dee äwa Juda kjeemen un an veschlapten, Forcht enjoagen un äare Macht dolschlonen.

⁵Eemol aus ekj oppkjikjt, sach ekj een Maun met een Motbaunt en de Haunt.

⁶Un ekj fruach am: Wua jeist du han? Un hee säd: Ekj go no Jerusalem un well mäten woo lank un woo breet de Staut es.

⁷Un weetst, de Enjel, dee met mie jerät haud, kjeem, un een aundra Enjel kjeem uk noch,

⁸un dee säd to däm ieeschten Enjel: Ran un saj däm jungen Maun: Doa woaren soo väl Menschen, un doa woat soo väl Vee en Jerusalem sennen, daut doa kjeene Mia sennen woat, wiels doa soo väl sennen woaren.

⁹Un ekj, soo sajcht de HAR, ekj woa eene Waunt von Fia runtom ar sennen, un ekj woa doabennen wiesen woo harlich ekj sie.

¹⁰Hä! Hä! Dee jie en daut Launt em Nuaden sent, rant doa rut, sajcht de HAR. Ekj hab junt wiet un breet vespreet, soo aus de vea Wind enne Loft, sajcht de HAR.

¹¹Hä! Dee waut jie noch en daut scheene Babel sent, komt no Zion.

¹²De HAR, dee aules rejieet, un dee harlich es, schekjt mie no de Velkja, dee junt bestolen haben, om an to sajen: Een Volkj, daut junt auntukst, puakst mie em Uag.

¹³Wacht bloos. Ekj woa miene Macht äwa an wiesen, un dan woaren dee, dee äare Hauntlanga wieren, an bestälen. Dan woa jie weeten, daut de HAR, dee aules rejieet, mie jeschekjt haft dit to sajen.

¹⁴Sinjt un freit junt, dee jie en Jerusalem wonen. Ekj kom un well mank junt wonen, sajcht de HAR.

¹⁵Wan dee Tiet kjemt, woaren väle Velkja nom HARN komen un woaren sien Volkj sennen. Dan woat hee mank junt wonen, un jie woaren weeten daut de HAR, dee aules rejieet, mie jeschekjt haft.

¹⁶Dan woat de HAR Juda äwanämen un to sient moaken en daut heilje Launt, un hee woat wada Jerusalem fa sikj wälen.

¹⁷Lot aule Menschen ver däm HARN stell sennen. Hee kjemt nu ut siene heilje Woninj.