Read Plautdietsch (Low German) – De Bibel Sacharja 3 Bible Online

Sacharja 3 - Plautdietsch (Low German) – De Bibel bible

Sacharja 3

¹Un dan muak hee mie oppmoakjsom, daut Jeschua, dee de Huagapriesta wia, ver däm HARN sienen Enjel stunt. Un aun siene rajchte Sied stunt de Vekjläaja un wull am vekloagen.

²Un de Enjel säd to däm Vekjläaja: Sie stell, Vekjläaja! De HAR vebitt die diene Kjläajarie väatobrinjen. Hee es Jerusalem goot. See sent aus een brennenda Stock, dee ut däm Fia es jefipst worden.

³Jeschua, oba, stunt doa verem Enjel en schwiensche Kjleeda.

⁴Un de Enjel säd to siene Deena: Nämt am siene schwiensche Kjleeda auf. Un hee säd to Jeschua: Ekj hab diene Sinden von die jenomen un hab die eenen Priesta Rock jejäft.

⁵Un hee säd: Binjt am eene reine Koppbinj om. Un see bungen am eene reine Koppbinj om, un trocken am eenen reinen Priesta Rock aun. Un däm HARN sien Enjel kjikjt daut too.

⁶Un däm HARN sien Enjel hilt Jeschua dit väa un säd:

⁷Dit es waut de HAR, dee aules rejieet, sajcht: Wan du woascht no mie horchen un woascht doonen waut ekj saj, dan woascht du mienen Tempel rejieren, un Wajchta sennen äwa mien Hoff. Du woascht mank dise, waut hia stonen, aunjeseenen sennen.

⁸Un Jeschua, du Huagapriesta, un jie, Breeda, dee jie hia met am setten, horcht no waut ekj to sajen hab. Jie sent een Tieekjen von daut waut komen woat. Wiels, horcht emol, ekj woa “Eenen nieen Aust” väabrinjen, dee mie deenen woat.

⁹Paust goot opp no dän Steen, dän ekj ver Jeschua sat. Daut es een Steen, oba dee haft säwen Sieden. Un ekj, de HAR, dee aules rejieet, woa selfst dän utschnitzen, un ekj woa en eenen Dach de Sind von dit Launt wajchnämen.

¹⁰Un to dee Tiet woat een jiedra von junt sienen Noba enloden, daut jie bie june Wienranken un unja junen Fiejenboom setten, sajcht de HAR, dee aules rejieet.