Read Plautdietsch (Low German) – De Bibel Sacharja 6 Bible Online

Sacharja 6 - Plautdietsch (Low German) – De Bibel bible

Sacharja 6

¹Noch eemol aus ekj nopp kjikjt, sach ekj doa vea Kjrichswoages von tweschen de twee Boaj komen. De Boaj wieren von Koppa.

²De ieeschta Woagen haud roode Pieed, de tweeda schwoate,

³de dredda witte un de vieeda schemmelje Pieed. Un daut wieren aules stoakje Pieed.

⁴Un ekj säd to däm Enjel, dee sikj met mie aufjeef: Waut bedieden dise, mien Har?

⁵Un de Enjel säd to mie: Dit sent de vea Wind unjarem Himmel. Dee sent ver däm Harn von de gaunze Ieed jewast, un gonen nu en äare Rechtungen.

⁶De Woagen met de schwoate Pieed jeit nom Nuaden, dee met de witte Pieed jeit nom Wasten, un dee met de Schemmels nom Sieden.

⁷Aus de Pieed ver ons kjeemen, wieren daut stoakje, un dee wieren iewrich äwa de Ieed to foaren. Un hee säd: Got, un seet no oppe Ieed. Un see jinjen.

⁸Un hee säd to mie: Moakj die dit: Dee waut nom Nuaden gonen, haben mienen Jeist tofräd jestalt em Nuaden.

⁹Dan jeef de HAR mie dise Norecht:

¹⁰Go no Heldai, Tobija un Jedaja, dee von de veschlapte von Babel, trigjekomen sent, un nemm waut see jebrocht haben no Joschija, Zefanja sien Sän.

¹¹Nemm daut Selwa un Golt, waut de Mana von Babel jebrocht haben, un moak doa Kroonen von. Dan sat dän Huagenpriesta, Jeschua, Jozadak sien Sän, dee opp.

¹²Dan saj to am: De HAR, dee aules rejieet, sajcht: Horch emol, eena dee doa “De niea Aust” heet, woat opp siene Städ waussen, un woat däm HARN sien Tempel buen.

¹³Hee woat dän Tempel fa däm HARN häastalen, un woat een jeieeda Kjennich sennen, un opp sienen Troon setten un rejieren. Un doa woat een Huagapriesta opp sienen Troon setten, un de twee woaren frädlich toopschaufen.

¹⁴De Kroonen woaren en däm HARN sien Tempel bliewen, aus een Aundenkjen aun Heldai, Tobija, Jedaja un Josia, Zefanja sien Sän.

¹⁵Doa woaren eenje von wiet auf komen un halpen däm Tempel fa däm HARN to buen. Wan daut passieet, dan woa jie weeten daut ekj von däm HARN, dee aules rejieet, jeschekjt sie. Dit woat aula woaren, wan jie däm HARN, jun Gott, siene Stemm jehorchen woaren.