Read Plautdietsch (Low German) – De Bibel Sacharja 8 Bible Online

Sacharja 8 - Plautdietsch (Low German) – De Bibel bible

Sacharja 8

¹Doa kjeem eene Norecht no mie von däm HARN, dee aules rejieet, un dee säd:

²De HAR, dee aules rejieet, sajcht soo: Ekj kaun daut nich vedroagen woo Zion daut jeit; ekj sie besorcht äwa Zion met eenen brennenden Iewa.

³De HAR sajcht: Ekj woa trigj no Zion komen un woa doa en Jerusalem wonen. Daut woat von Jerusalem jesajcht woaren, woo bestendich un tru dee es. Däm HARN, dee aules rejieet, sien Boajch woat “De heilja Boajch” jenant woaren.

⁴De HAR, dee aules rejieet, sajcht soo: Doa woaren noch wada oole Mana un Frues oppe Gaussen en Jerusalem sennen. Dee woaren soo veellat sennen, daut see jieda woaren met eenen Stock gonen.

⁵Un doa woaren noch wada väl Kjinja oppe Gaussen en Jerusalem sennen.

⁶De HAR, dee aules rejieet, sajcht soo: Wan de poa, dee von mien Volkj sent äwajebläwen, daut uk ommäajlich schient, sull mie daut ommäajlich sennen? sajcht de HAR, dee aules rejieet.

⁷De HAR, dee aules rejieet, sajcht: Kjikjt emol. Ekj woa mie mien Volkj vom Oosten un vom Wasten raden.

⁸Ekj woa an no Hus brinjen, un see woaren en Jerusalem wonen. Dee woaren mien Volkj sennen, un ekj woa opp iernst äa Gott sennen, un woa rajcht met an haundlen.

⁹De HAR, dee aules rejieet, schekjt Norecht un sajcht: Aul jie, dee jie dise Norecht von de Profeeten hieren, von dan aus de Grunt jelajcht wort fa däm Tempel fa däm HARN, dee aules rejieet: Siet mootich un but wieda aum Tempel!

¹⁰Ver dise Tiet kunn een Mensch nuscht vedeenen, un daut Vee wia nuscht wieet. Dee, dee bat buta de Staut jinjen, wieren dän tietäwa en Jefoa. Ekj leet dan eenen jiedren jäajen däm näakjsten schaufen.

¹¹Oba nu, sajcht de HAR, dee aules rejieet, woa ekj daut nich soo tooloten met de poa, dee von mien Volkj äwajebläwen sent.

¹²Nu woaren see en Fräd seien, un de Wienrank woat äare Frucht droagen. De Ieed woat eene Arnt brinjen un de Himmel woat Deiw jäwen. Dit es daut Oafgoot, waut ekj de poa jäwen woa, dee von mien Volkj äwajebläwen sent.

¹³Un soo aus aundre Velkja eene Saj äwa Juda un Israel jemoakt haben, aus wan see een jefluchtet Volkj sent, soo woaren see nu, daut ekj junt raden woa, aus een jesäajendet Volkj aunseenen. Habt nich angst un fot Moot.

¹⁴Dit es de Norecht, dee de HAR, dee aules rejieet, schekjt: Krakjt soo aus ekj mootwellens Schoden opp junt brocht, aus june Elren mienen Oaja reizten, sajcht de HAR, dee aules rejieet, un mie daut nich schod wia,

¹⁵krakjt soo hab ekj mie väajenomen, daut Jerusalem un Juda saul daut nu goot gonen. Habt bloos nich angst.

¹⁶Dit sent de Dinja dee jie doonen sellen: Jie sellen unja eenaunda de Woarheit sajen, un wan jie rechten, sell jie nom rajcht seenen, un daut waut Fräd brinjt.

¹⁷Moakt nich eenen beesen Plon jäajen dän Noba, un sajcht nich waut äwa dän näakjsten, waut nich soo es. Dit sent Dinja, dee mie sea jäajenaun sent, sajcht de HAR.

¹⁸Un de HAR, dee aules rejieet, jeef mie dise Norecht:

¹⁹De HAR, dee aules rejieet, sajcht: De Doag en de 4. un 5. un uk dee en de 7. un 10. Moonaten, aun dee jie aus Volkj fausten deeden, sellen fa junt nu Heljedoag sennen, wua jie junt freien un junt daut scheengonen loten. Oba jie sellen de Woarheit un Fräd unja eenaunda biebehoolen.

²⁰De HAR, dee aules rejieet, sajcht soo: Doa woaren Lied von väl Velkja, un von väl Städa komen.

²¹Menschen woaren von eene Staut no de aundre gonen un dee kroagen: Well jie nich gonen däm HARN aunbäden? Well jie nich däm HARN, dee aules rejieet, sienen Säajen sieekjen? Wie wellen gonen!

²²Dan woaren väle Menschen un stoakje Velkja en Häaden no Jerusalem komen un dän Säajen von däm HARN, dee aules rejieet, sieekjen un däm HARN aunbäden.

²³De HAR, dee aules rejieet, sajcht soo: En dee Tiet woaren tieen Menschen von veschiedne Velkja sikj aun jieda Jud aunhenjen un sajen: Wie wellen met junt gonen. Wie haben jehieet, daut Gott met junt es!