Read Plautdietsch (Low German) – De Bibel Matäus 1 Bible Online

Matäus 1 - Plautdietsch (Low German) – De Bibel bible

Matäus 1

¹Dit es daut Buak von de Jeschicht von Jesus Christus, dee von David staumd, dee von Abraham staumd.

²Abraham wia Isaak sien Voda, Isaak Jakob siena, un Jakob wia Voda äwa Juda un siene Breeda.

³Juda haud derch Tamar Perez un Serach. Perez wia Voda äwa Hezron un Hezron äwa Ram. [1]

⁴Ram [2] wia Voda äwa Aminadab, Aminadab äwa Nachschon, un Nachschon äwa Salmon.

⁵Salmon haud von Rahab dän Boas, un Boas haud Obed von Rut, un Obed wia Voda äwa Isai.

⁶Isai wia Kjennich David sien Voda. Un David haud von Uria siene Fru dän Salomo.

⁷Salomo wia Voda äwa Rehabeam, Rehabeam äwa Abija un Abija äwa Asa. [3]

⁸Asa [4] wia Voda äwa Joschafat, Joschafat äwa Joram, un Joram äwa Usija.

⁹Usija wia Voda äwa Jotam, Jotam äwa Ahas, un Ahas äwa Hiskia.

¹⁰Hiskia wia Voda äwa Manasse, Manasse äwa Amon [5] un Amon [6] äwa Josia.

¹¹Josia wia dan Voda äwa Jojachin un siene Breeda aus see no Babel wajchjefieet worden.

¹²Un aus see ieescht no Babel jebrocht wieren, kjrieech Jojachin dän Schealtiel [7] un Schealtiel [8] dän Serubabel.

¹³Serubabel wia Voda äwa Abihud, Abihud äwa Eljakim, un Eljakim äwa Asor.

¹⁴Asor wia Voda äwa Zadok, Zadok äwa Achim, un Achim äwa Eliud.

¹⁵Eliud wia Voda äwa Eleasar, Eleasar äwa Matan, un Matan äwa Jakob.

¹⁶Jakob wia Voda äwa Josef, Maria äaren Maun, von dee Jesus jebuaren wort, dee doa Christus heeten deit.

¹⁷Von Abraham bat David sent aules toop 14 Jennerazionen. Un von David bat see no Babel vebaunt worden, sent noch emol 14 Jennerazionen. Un von de Vebaununk bat Christus kjeem, sent wada 14 Jennerazionen.

¹⁸Jesus Christus [9] siene Jeburt passieed soo aus dit: Aus siene Mutta Maria dän Josef aunvetrut wia, worden see en, ea hee ar no Hus hold, daut see aul vom Heiljen Jeist schwanga wia.

¹⁹Josef, äa Maun, wia fromm un wull ar nich toschaund brinjen, soo plond hee sikj em stellen von ar loostosajen.

²⁰Oba aus hee dit jeplont haud, seet, dan kjeem dän Harn sien Enjel no am em Droom un säd: Josef, du David sien Sän, schu die nich doafäa, diene Fru Maria no die to nämen, wiels daut, waut see en sikj drajcht, es vom Heiljen Jeist.

²¹Un see woat eenen Sän to Welt brinjen, dän saust du Jesus nanen, wiels hee woat sien Volkj von äare Sinden raden.

²²Daut es aula doawäajen soo romjekomen, daut daut soo wort aus de Har derch dän Profeet jesajcht haud, dee doa säd:

²³“Kjikjt emol! Eene Mejal woat schwanga sennen un woat een Sän to Welt brinjen. Dän woaren see Immanuel nanen”, daut meent: Gott met ons.

²⁴Aus Josef vom Schlop oppwuak, deed hee waut dän Harn sien Enjel am befolen haud, un neem Maria met no Hus aus siene Fru.

²⁵Hee haud oba kjeen Jeschlajchtsvekjia met ar, bat see äa ieeschten Sän to Welt jebrocht haud. Un hee jeef am dän Nomen Jesus.