Read Plautdietsch (Low German) – De Bibel Matäus 10 Bible Online

Matäus 10 - Plautdietsch (Low German) – De Bibel bible

Matäus 10

¹Un Jesus roopt sikj siene 12 Jinja, un jeef an de Macht orreine Jeista uttodriewen, jieda Krankheit un aulet lieden to heelen.

²Dit sent de 12 Apostel äare Nomes: ieeschtens Simon, dee uk Petrus heet, un dän sien Brooda Andreas. Un Zebedäus sien Sän Jakobus un dän sien Brooda Johanes.

³Un Filippus un Bartolomäus un Tomas un Matäus, de Takskollakjta. Un Jakobus, waut Alfäus sien Sän wia, un Tadäus. [26]

⁴Un Simon von Kana un Judas Iskariot, dee am nohäa veroot.

⁵Dise 12 schekjt Jesus ut un jeboot an un säd: Got noanich manke Nichjuden un got uk nich en de Samarita äare Städa.

⁶Got leewa no de veloarne Schop en Israel.

⁷Un wan jie gonen, prädicht un sajcht: Daut Himmelrikj es nu aune Däa.

⁸Heelt de kranke, reinicht de Lepra, wakjt de Doodes opp un drieft de Soton ut. Jie haben daut emsonst jekjräajen, jäft daut uk emsonst wieda.

⁹Nämt kjeen Golt, Selwa ooda Koppa em Gort.

¹⁰Nämt uk nich eene Tausch, uk nich twee Kjleeda ooda Schoo, uk nich een Stock met opp june Reis, wiels een Oabeida es sien Äten wieet.

¹¹Un wan jie en eene Staut ooda Darp nenn komen, seet junt no wäm rom, dee daut wieet es, un blieft doa, bat jie wieda reisen.

¹²Un wan jie en een Hus nenn komen, jäft an jun Frädensgruss.

¹³Un wan daut Hus daut wieet es, dan woat june Fräd doaräwa komen. Es daut daut oba nich wieet, dan woat june Fräd wada trigj no junt komen.

¹⁴Un wan junt wäa nich well oppnämen un no june Wieed horchen, dan got von daut Hus ooda dee Staut wajch un scheddat junt dän Stoff von de Feet.

¹⁵Ekj saj junt gaunz opprechtich: Aum Jerechtsdach woat daut fa Sodom un Gomorra leichta sennen aus fa soone Staut.

¹⁶Seet emol! Ekj schekj junt aus Schop medden manke Wilw. Doawäajen siet kluak aus de Schlangen un oschuldich aus de Duwen.

¹⁷Seet junt väa fa de Menschen; dee woaren junt ver Jerecht nämen un en äare Judenschoolen priejlen.

¹⁸Un jie woaren ver aunjestalde un Kjennichs jebrocht woaren, om mient haulwen, aus een Zeichnis äwa an un äwa de Velkja.

¹⁹Wan see junt väabrinjen woaren, dan siet nich beduat doaräwa waut jie sajen sellen, wiels waut jie räden sellen, woat junt jrod dan jejäft woaren.

²⁰Wiels daut sent nich jie, dee doa räden, oba jun Voda sien Jeist, dee derch junt rät.

²¹Een Brooda woat sien Brooda toom Doot veroden, un een Voda dän Sän. Kjinja woaren jäajen äare Elren oppstonen un dee toom Doot veuasoaken.

²²Jie woaren om mient haulwen von aulemaun vestat woaren. Wäa oba bat aum Enj staunthauft blift, woat jerat woaren.

²³Wan see junt en eene Staut vefoljen, dan flicht no de aundre. Ekj saj junt de Woarheit, jie woaren en Israel nich en aule Städa jewast sennen, ea de Menschensän komen woat.

²⁴Een Jinja steit nich bowa sien Meista un een Kjnajcht [27] nich äwa sien Harn.

²⁵Fa een Jinja es daut jenuach, soo to sennen aus sien Meista, un fa een Deena, soo aus sien Har. Wan see dän Husharn haben Beelzebul jenant, wooväl mea woaren see dee, dee to sien Hus jehieren, soo nanen!

²⁶Aulsoo fercht junt nich fa dee, wiels doa es nuscht toojedakjt daut nich woat opjedakjt woaren. Doa es nuscht vestoaken, daut nich woat verendach komen.

²⁷Waut ekj junt em diestren saj, doavon rät bie dach. Un waut junt em Ua jefuschelt woat, prädicht vom Husendak.

²⁸Un fercht junt nich fa dee, dee dän Kjarpa doot moaken kjennen un de Seel oba nich doot moaken kjennen. Fercht junt leewa fa dän, dee Kjarpa un Seel vedoawen kaun en de Hal.

²⁹Woaren nich twee Spoalinja fa een Zent vekoft? Un doch felt nich eent opp de Ieed onen jun Voda.

³⁰Soogoa june Hoa opp däm Kopp sent jetalt.

³¹Fercht junt nich, jie sent mea wieet aus väl Spoalinja.

³²Wäa mie ver de Menschen bekjant, dän woa ekj uk ver mien Voda em Himmel bekjanen.

³³Oba wäa mie ver de Menschen velicht, dän woa ekj uk ver mien Voda em Himmel velieejen.

³⁴Jleeft nich daut ekj jekomen sie, Fräd en dise Welt to brinjen. Ekj sie nich jekomen Fräd to brinjen, oba daut Schwieet.

³⁵Ekj sie jekomen een Maun jäajen sienen Voda to saten un de Dochta jäajen äare Mutta, un de Schwieedochta jäajen äare Schwieemutta.

³⁶Un een Mensch siene Fiend woaren ut sien ieejnet Hushault sennen.

³⁷Wäa Voda ooda Mutta mea räakjent aus mie, un wäa Sän ooda Dochta leewa haft aus mie, es daut nich wieet eena von de mienje to sennen.

³⁸Un wäa nich sien Kjriez opp sikj nemt un folcht mie no, dee es daut nich wieet eena von de mienje to sennen.

³⁹Wäa sien Läwen finjt, woat daut velieren; un wäa sien Läwen om mient wellen velist, woat daut finjen.

⁴⁰Wäa junt oppnemt, nemt mie opp; un wäa mie oppnemt, nemt dän opp, dee mie jeschekjt haft.

⁴¹Wäa een Profeet oppnemt, wiels hee een Profeet es, woat een Profeeten Loon kjrieen. Un wäa een jerajchten Mensch oppnemt, wiels dee jerajcht es, woat dän selwjen Loon kjrieen aus de jerajchta.

⁴²Un wäa eent von dise jerinjste doawäajen een Drunk koldet Wota jeft, wiels hee mien Jinja es, ekj saj junt: Dee woat secha sien Loon kjrieen.