Read Plautdietsch (Low German) – De Bibel Matäus 11 Bible Online

Matäus 11 - Plautdietsch (Low German) – De Bibel bible

Matäus 11

¹Aus Jesus siene Jinja unjarecht haud, jinkj hee wieda en äare Städa un lieed un prädijd.

²Aus Johanes em Jefenkjnis hieed, waut Jesus deed, schekjt hee twee von siene Jinja un leet froagen:

³Best du dee doa komen sull, ooda sell wie no eenen aundren luaren?

⁴Un Jesus säd to an: Got sajcht Johanes, waut jie hieren un seenen:

⁵De blinje kjennen wada seenen, de lome kjennen gonen, de Leprakranke woaren rein, de doowe kjennen wada hieren, Doodes stonen opp, un de oame woat daut Evangelium jeprädicht.

⁶Seelich es, wäa sikj nich oajat äwa mie.

⁷Aus Johanes siene Jinja wajchjinjen, funk Jesus aun, to de väle Menschen von Johanes to räden un säd: Aus jie no de Wiltnis jinjen Johanes to seenen, waut räakjend jie to seenen? Een Schelprua daut de Wint han un häa weit?

⁸Waut wull jie seenen gonen? Eenen Maun en feine Kjleeda? Soone Menschen wonen wua en een Paulaust.

⁹Waut wull jie seenen gonen? Wull jie een Profeet seenen? Jo, ekj saj junt: noch mea aus een Profeet.

¹⁰Dit es dee von däm jeschräwen steit: “Seet, ekj schekj mien Bootschofta ver die, dee dienen Wajch fa die reedmoaken woat.”

¹¹Ekj saj junt de Woarheit: Doa es nich een Mensch jebuaren, dee doa jrata es aus Johanes de Deepa. Un doch de kjlansta em Himmelrikj es jrata aus dee.

¹²Von dan aus Johanes prädijd bat nu, es daut Himmelrikj emma wada met Jewault aunjejräpen worden, [28] un dee doa Jewault eewen, nämen daut en.

¹³Aule Profeeten un daut Jesaz profezeiden bat Johanes kjeem,

¹⁴un wan jie wellich sent daut auntonämen: Hee es de Elia, dee doa komen sull.

¹⁵Wäa Uaren haft toom hieren, däm lot hieren. [29]

¹⁶Met waut kaun ekj de Menschen vondoag dän Dach vejlikjen? Dee sent soo aus Kjinja, dee sikj opp däm Moakjtplauz romsetten, un eene Grupp schricht to de aundre:

¹⁷Wie spälden, un jie daunzten nich; wie muaken Trua, un jie hielden nich.

¹⁸Johanes kjeem un eet un drunk nich; dan säden see: Dee haft een Soton.

¹⁹De Menschensän kjeem, un at un drinkjt, un see sajen: Kjikjt no dän Fräta un Drinkja, een Frint aun Takskollakjta un Sinda! Un doch rajchtfoadicht de Weisheit sikj derch daut waut see deit. [30]

²⁰Dan funk Jesus aun, de Städa, wua hee de mieeschte groote Wunda jedonen haud, daut väatohoolen, daut see äaren Senn nich jeendat hauden:

²¹Wee die, Chorazin! Wee die, Betsaida! Wan de groote Wunda, dee ekj bie junt deed, en Tierus un Sidon passieet wieren, dee hauden sikj lenjst Sakj omjewekjelt, sikj en de Ausch jesat un omjekjieet.

²²Oba ekj saj junt dit, aum Jerechtsdach woaren Tierus un Sidon leichta aufkomen aus jie woaren.

²³Un du Kapernaum, best du nich bat aum Himmel jehowen worden? Du woascht en de Hal jeschmäten woaren. Wiels wan de groote Woakjen, dee bie junt jedonen worden, wieren en Sodom passieet, daut stunt noch vondoag dän Dach.

²⁴Oba ekj saj junt dit: Daut woat fa Sodom leichta sennen aum Jerechtsdach aus fa die.

²⁵Doaropp säd Jesus: Voda un Har äwa Himmel un Ieed, ekj dank die daut du dit fa de weise un jelieede jeheem jehoolen hast, un hast de kjliene Kjinja daut openboat.

²⁶Jo, Voda; dit es soo aus die daut jefoll.

²⁷Aules waut ekj hab, es mie vom Voda jejäft worden; un dän Sän kjant sest kjeena aus de Voda; un dän Voda kjant sest kjeena aus de Sän, un wäm de Sän daut openboaren well.

²⁸Komt aula no mie, dee jie unja schwoare Lausten gonen un bedrekjt un meed sent, un ekj woa junt Ru jäwen.

²⁹Lajcht junt mien Joch opp un lieet von mie, wiels ekj sie saunftmootich un von Hoaten deemootich, un jie woaren Ru finjen fa june Seelen.

³⁰Wiels mien Joch drekjt nich, un miene Laust es leicht.