Read Plautdietsch (Low German) – De Bibel Matäus 14 Bible Online

Matäus 14 - Plautdietsch (Low German) – De Bibel bible

Matäus 14

¹En dise Tiet kjrieech Herodes de Kjennich to hieren, waut äwa Jesus vetald wort.

²Dan säd hee to siene Deena: Daut es Johanes de Deepa. Dee es vom Doot oppjestonen, doawäajen haft hee de Krauft soone Wundawoakjen to doonen.

³Wiels Herodes haud Johanes faustjenomen, un am binjen un enstoppen loten, wäajen Herodias, sienen Brooda Filippus [34] siene Fru.

⁴Wiels Johanes säd to am: Daut es nich rajcht, daut du ar hast.

⁵Herodes wudd am jieren dootjemoakt haben, oba hee fercht sikj fa de Menschen, wiels dee hilden am fa een Profeet.

⁶Oba aus Herodes sien Jeburtsdach kjeem, daunzt Herodias äare Dochta ver Herodes siene Jesalschoft, un am jefoll daut.

⁷Hee schwieed doaropp, daut hee ar irjentwaut jäwen wudd, wuano see Froagen wudd.

⁸Von äare Mutta doatoo aunjeleit, säd see: Brinj mie opp eene Schiew, Johanes dän Deepa sien Kopp.

⁹Daut deed dän Kjennich leet. Oba om sien Vespräakjen to hoolen un om dee äat haulwen, dee met am aum Desch sauten, befool hee daut to doonen.

¹⁰Hee schekjt un leet Johanes em Jefenkjnis dän Kopp aufhaken.

¹¹Un sien Kopp wort opp eene Schiew de Mejal jebrocht, un see brocht äare Mutta dän.

¹²Un siene Jinja kjeemen, neemen sien Kjarpa un begrowden dän, un see jinjen un säden Jesus daut.

¹³Aus Jesus daut hieed, reisd hee wieda un fua en een Boot no eene eensome Städ, wiels hee wull auleen sennen. Oba aus de Menschen daut hieeden, kjeemen dee ut de Städa un jinjen am to Foot hinjaraun.

¹⁴Un aus hee doahan jinkj, sach hee aul dee Menschen, un am jaumad daut äwa an, un hee heeld de kranke.

¹⁵Aus daut Owent wort, kjeemen de Jinja un säden to am: Wie sent hia en de Wiltnis, un daut es aul lot; schekj de Menschen wajch, daut dee no de Darpa gonen un sikj waut kjeepen to äten.

¹⁶Jesus säd to an: Daut es nich needich, daut dee wajchgonen. Jäft jie dee to äten.

¹⁷See säden to am: Wie haben hia bloos 5 Brood un twee Fesch.

¹⁸Un hee säd: Brinjt mie dee emol häa!

¹⁹Dan säd Jesus to de Menschen, see sullen sikj opp däm Graus dolsaten. Un hee neem de 5 Brood un de twee Fesch, kjikjt nopp nom Himmel un spruak een Dankjebäd, bruak daut Broot un jeef de Jinja daut, un dee jeewen de Menschen daut.

²⁰Dee eeten sikj aula saut un lausen noch 12 Kjarw voll opp, waut doa äwajebläwen wia.

²¹Un daut wieren bie 5.000 Maun, onen Frues un Kjinja, dee doa jejäten hauden.

²²Dan befool Jesus siene Jinja en daut Boot to stieen un no de aundre Sied to foaren, un hee neem noch Aufscheet vom Volkj.

²³Un aus de Menschen wajch wieren, jinkj hee fa sikj auleen opp een Boajch, toom bäden. Aus daut Owent wort, wia hee fa sikj auleen.

²⁴Oba daut Boot wia nu aul een Enj vom Launt auf [35] un wort von de Walen han un häa jeschmäten, wiels de Wint wia an jäajenaun.

²⁵Soo bie Klock dree zemorjes kjeem Jesus an opp däm Wota entjäajen jegonen.

²⁶Oba aus de Jinja am sagen opp däm Wota gonen, wia an schrakjlich angst un säden: Daut es een Jespanst! un schrieejen ut Angst.

²⁷Oba dan räd Jesus met an un säd: Enjst junt nich. Dit sie ekj!

²⁸Petrus säd to am: Har, wan du daut best, dan saj, daut ekj opp däm Wota no die komen saul.

²⁹Jesus säd: Komm! Petrus stieech utem Boot rut un jinkj opp däm Wota no Jesus opptoo.

³⁰Oba aus hee dän Wint [36] sach, wort am angst, un funk aun unjatogonen. Dan schrieech hee: Har, rad mie!

³¹Jesus strakjt schwind de Haunt ut un kjrieech am to hoolen un säd to am: Oo Mensch, du hast een kjlienen Gloowen. Wuarom twiewelsd du?

³²Un aus see em Boot nenn stieejen, wort de Wint stell.

³³Dee waut em Boot wieren, kjeemen un bäden am aun un säden: Du best woarhauftich Gott sien Sän!

³⁴Aus see äwajefoaren wieren, launden see en Genezaret.

³⁵Un aus de Menschen am doa enworden, leeten see daut aulem en äare Omjäajent weeten un brochten aul äare Kranke no am

³⁶un prachaden am, daut hee an bloos sull loten sienen Soom aum Kjleet aunschieren. Un wäa am aunschieed, wia gaunz jesunt.