Read Plautdietsch (Low German) – De Bibel Matäus 15 Bible Online

Matäus 15 - Plautdietsch (Low German) – De Bibel bible

Matäus 15

¹Dan kjeemen Farisäa un Schreftjelieede von Jerusalem no Jesus un säden:

²Wuarom hoolen diene Jinja sikj nich aun de Eltestasch äare Väaschreften? Wiels see wauschen sikj nich de Henj ver däm Äten.

³Un hee säd to an: Un wuarom sat jie Gott sien Jeboot auntsied, daut jie june Väaschreften hoolen kjennen?

⁴Wiels Gott befool Voda un Mutta to ieren; un wäa Voda un Mutta flieekjt saul met däm Doot bestroft woaren.

⁵Oba jie sajen: Wan wäa to Voda un Mutta sajcht: Daut waut junt von mie togood komen kunn, es Gott äwajäft, dee deit rajcht.

⁶Doamet es daut soo wiet, daut kjeena mea Voda un Mutta ieet. Un soo hab jie om june Väaschreften to hoolen, Gott siene Jebooten [37] to nuscht jemoakt.

⁷Jie Heichla, de Profeet Jesaja haft von junt gaunz rajcht jesajcht:

⁸“Dit Volkj ieet mie met de Leppen, oba äa Hoat es wiet auf von mie,

⁹oba vejäfs deenen see mie, wiels waut see lieren sent bloos Menschenjebooten.”

¹⁰Un Jesus roopt de Menschen no sikj un säd to an: Horcht häa un vestot dit!

¹¹Waut een Mensch veorreinicht es nich daut waut em Mul nenn jeit, oba daut waut utem Mul rut kjemt veorreinicht am.

¹²Dan kjeemen de Jinja no am un säden: Weetst du uk daut de Farisäa sikj oajaden, aus dee hieeden, waut du sätst?

¹³Hee säd: Aule Plaunten, dee mien himlischa Voda nich jeplaunt haft, woaren utjeräten woaren.

¹⁴Lot dee toch. Daut sent blinje Blinjenleida! Un wan een blinja Maun een aundren blinjen leit, faulen see beid em Growen.

¹⁵Oba Petrus säd: Moak ons daut Jlikjnis dietlich.

¹⁶Un Jesus säd: Vesto jie uk noch emma nuscht?

¹⁷Weet jie nich, daut aules, waut derch een Mensch sien Mul nenn jeit, jeit en de Moag nenn un von doa wada rut?

¹⁸Oba waut utem Mul rut kjemt, kjemt utem Hoaten, un daut veorreinicht dän Mensch.

¹⁹Wiels ut däm Hoaten komen beese Jedanken, Mort, Ehebruch, Huararie, stälen, faulsche Zeichnisen, un gotteslastaliche Räden.

²⁰Dit es waut een Mensch orrein moakt. Oba met onjewoschne Henj äten, daut veorreinicht am nich.

²¹Dan jinkj Jesus von doa un trock sikj trigj en de Jäajenden von Tierus un Sidon.

²²Un dan kjeem am von doa eene kanaanitische Fru entjäajen, un funk aun to schrieen: Oo Har, du David sien Sän, hab Metleet met mie! Miene Dochta woat schrakjlich vom Soton jeploacht.

²³Oba Jesus jeef ar kjeene Auntwuat. Siene Jinja oba kjeemen un prachaden am: Schekj dee Fru wajch. Dee schricht ons hinjaraun.

²⁴Jesus säd: Ekj sie bloos no de veloarne Schop en Israel jeschekjt.

²⁵See kjeem oba un kjneed sikj ver am un säd: Har, halp mie!

²⁶Un hee säd to ar: Daut es nich rajcht de Kjinja äa Broot to nämen un de Hunj väatoschmieten.

²⁷See säd: Jo, Har, ekj weet. Un doch äten de Hunj, waut bie äare Haren vom Desch felt.

²⁸Dan säd Jesus to ar: Oo Fru, du hast een grooten Gloowen. Du saust kjrieen, waut du die wenschst! Un äare Dochta wia plazlich jesunt.

²⁹Dan jinkj Jesus von doa delenjd däm galiläischen Mäa. Hee jinkj opp däm Boajch nopp un sad sikj doa dol.

³⁰Dan kjeemen groote Schoowa no am un brochten äare lome, blinje, Stomme, Kjräpels, un väle aundre, un läden dee ver Jesus siene Feet han, un hee heeld dee,

³¹soo daut de Menschen sikj vewundaden aus see sagen daut de Stomme räden deeden, de Kjräpels jesunt wieren, de lome jinjen, un daut de blinje seenen kunnen. Un see lowden Israel äaren Gott.

³²Dan roopt Jesus sikj siene Jinja un säd to an: Mie jaumat daut äwa de väle Menschen, wiels dee sent hia nu aul dree Doag bie mie jewast un haben nuscht to äten. Ekj well dee nich hungrich wajch schekjen, wiels dee kunnen hinjawäajes veschmachten.

³³Dan säden siene Jinja to am: Wua kjenn wie hia en de Wiltnis jenuach Broot kjrieen, soon Schoof Menschen saut to moaken?

³⁴Jesus fruach an: Woo väl Brood hab jie? See säden to am: Säwen un een poa kjliene Fesch.

³⁵Dan befool hee de Menschen sikj opp de Ieed doltosaten.

³⁶Dan neem hee de säwen Brood un de Fesch un dankt doafäa. Hee bruak dee un jeef de Jinja dee, un de Jinja jeewen dee de Menschen.

³⁷Dan eeten dee aula un worden saut. Un see lausen opp, waut noch äwajebläwen wia, säwen Kjarwvoll.

³⁸Doa hauden 4.000 Maun jejäten, daut es Frues un Kjinja nich metjetalt.

³⁹Un aus Jesus de Menschen wajch jeschekjt haud, stieech hee en daut Boot, un kjeem en de magdalische Jäajent aun.