Read Plautdietsch (Low German) – De Bibel Matäus 16 Bible Online

Matäus 16 - Plautdietsch (Low German) – De Bibel bible

Matäus 16

¹Un de Farisäa un Saduzäa kjeemen, un om am opp de Proow to stalen, fruagen see am no een Tieekjen vom Himmel.

²Siene Auntwuat wia: Wan daut Owent woat, saj jie: Daut woat scheenet Wada sennen, wiels de Himmel es root. [38]

³Un zemorjes saj jie: Daut dreift met Storm, wiels de Himmel es root un dunkel. Jie Heichla! Jie kjennen daut Wada dieden, doano waut aum Himmel to seenen es. Oba de Tieekjens, dee de Tiet aundieden, kjan jie nich.

⁴Dit es eene beese ehebräakjarische Jennerazion, daut no een Tieekjen sieekjt. Oba an saul kjeen Tieekjen jejäft woaren, buta daut Tieekjen von Jona. Un hee leet an doabie un jinkj wajch.

⁵Aus de Jinja aun de aundre Sied aunkjeemen, hauden see vejäten Broot mettonämen.

⁶Jesus säd to an: Heet junt fa de Farisäa un Saduzäa äare Häw!

⁷Un see unjahilden sikj doaräwa un säden: Daut es, wiels wie nich Broot metjebrocht haben.

⁸Aus Jesus daut enwort, säd hee: Woo es jun Gloowen soo schwak? Wuarom moak jie junt doaräwa schwoa, daut jie nich Broot haben?

⁹Kjenn jie daut noch emma nich vestonen? Hab jie daut aul von de 5 Brood un de 5.000 Menschen vejäten un woo väl Kjarwvoll jie noch tooplausen?

¹⁰Ooda dee säwen Brood un de 4.000 Maun un woo väl Kjarw jie doa tooplausen?

¹¹Woo kjemt daut, daut jie nich vestonen, daut ekj nich von Broot räd, wan ekj saj jie sellen junt fa de Farisäa un Saduzäa äare Häw heeden?

¹²Dan vestunden see, daut see sikj nich fa de Häw em Broot heeden sullen, oba daut see sikj fa de Farisäa un Saduzäa äare Lia heeden sullen.

¹³Aus Jesus en Cäsarea Filippi aunjekomen wia, fruach hee siene Jinja un säd: Wäa sajen de Menschen daut ekj, de Menschensän, sie?

¹⁴Un see säden: Eenje sajen, du best Johanes de Deepa, aundre sajen du best Elia, un eenje du best Jeremia ooda eena von de Profeeten.

¹⁵Un hee säd to an: Un wäa saj jie, daut ekj sie?

¹⁶Simon Petrus auntwuad: Du best de Christus, dän läwendjen Gott sien Sän!

¹⁷Jesus säd to Petrus: Seelich best du, Simon, Jona sien Sän. Dit hast du nich von Menschen. Daut haft mien Voda em Himmel die openboat.

¹⁸Un ekj saj die, du best Petrus, [39] un opp disen Steen [40] woa ekj miene Jemeent buen, äwa dee de Doodesjewault niemols woat de äwahaunt kjrieen.

¹⁹Un ekj woa die de Schlätels toom Himmelrikj jäwen, un wautemma du oppe Ieed binjst, saul uk em Himmel jebungen sennen, un aules, waut du oppe Ieed leesen deist, saul uk em Himmel loos sennen.

²⁰Dan befool Jesus siene Jinja strenj, daut see daut to kjeenem sajen sullen, daut hee de Christus wia.

²¹Von dan funk Jesus aun siene Jinja daut bietobrinjen, daut hee no Jerusalem gonen must un derch de Eltestasch un Huagepriestasch un Schreftjelieede väl wudd lieden motten un dootjemoakt woaren un oba dän dredden Dach vom Doot oppstonen wudd.

²²Dan neem Petrus am tosied un säd to am: Gott bewoa die! Soowaut saul die nie passieren!

²³Jesus dreid sikj no Petrus un säd to am: Soton, see daut du wajch kjemst. Du steist mie em Stich! Du denkjst nich soo aus Gott, oba soo aus Menschen

²⁴Dan säd Jesus to siene Jinja: Wan wäa met mie metkomen well, mott hee von sikj selfst vejäten un dan sien Kjriez opp sikj nämen un metkomen.

²⁵Wiels wäa sien Läwen raden well, woat daut velieren. Oba wäa sien Läwen om mient haulwen velieren deit, woat daut wada finjen.

²⁶Wiels waut halpt een Mensch daut, wan hee de gaunze Welt jewennen wudd, wan hee siene ieejne Seel doafäa jäwen must? Ooda waut kaun een Mensch jäwen, siene Seel trigjtokjrieen?

²⁷Wiels de Menschensän woat met siene Enjel toop en sien Voda siene Harlichkjeit komen un een jiedrem Loon jäwen, doano waut hee jedonen haft.

²⁸Ekj saj junt de Woarheit: Hia stonen soone, dee dän Doot nich schmakjen woaren, bat see dän Menschensän woaren en sien Kjennichrikj komen seenen.