Read Plautdietsch (Low German) – De Bibel Matäus 19 Bible Online

Matäus 19 - Plautdietsch (Low German) – De Bibel bible

Matäus 19

¹Aus Jesus met siene Räden foadich wia, veleet hee Galiläa, un kjeem no Judäa en de Jäajenden aun de aundre Sied Jordan.

²Am kjeemen väl Menschen hinjaraun un hee heeld dee doa.

³Un Farisäa kjeemen no am un vesochten am doarenn, daut see am fruagen: Es daut rajcht, daut een Maun sikj scheeden deit von siene Fru, wäajens irjent eene Uasoak?

⁴Hee auntwuad un säd to an: Hab jie nich jeläst daut dee, dee de Menschen jemoakt haft, een Maun un eene Fru muak?

⁵Un säd: “Een Maun woat Voda un Mutta veloten un sikj met siene Fru vebinjen, un dee twee woaren eent woaren.”

⁶Un dan sent dee nich mea twee, oba een Fleesch. Un waut Gott vebungen haft, saul de Mensch nich von enaunda scheeden.

⁷See säden to am: Wuarom befool Moses dan, daut see sullen een Scheedungsbreef jäwen un sikj von äare Frues scheeden.

⁸Hee säd to an: Moses haft junt erlaupt von june Frues to scheeden, wiels jie em Hoaten soo aufjehoat sent, oba aum Aunfank wia daut nich soo.

⁹Un ekj saj junt: Wäa sikj von siene Fru scheeden deit, wan see am nich es ontru jewast, [48] un eene aundre friet, dee brakjt de Ehe. (Un wäa sikj met eene jeschiedne Fru befriet, brakjt uk de Ehe.) [49]

¹⁰Dan säden de Jinja to am: Wan dit soo met Maun un Fru stonen deit, dan es daut nich goot äwahaupt to befrieen.

¹¹Jesus säd, dise Lia kunnen see nich aula aunnämen, dee wia mau fa dee, dän daut jejäft wia.

¹²Doa sent soone dee onen Maunskrauft jebuaren sent. Eenje sent uk derch Menschenhaunt bat doa jebrocht. Doa sent uk soone, dee sikj om daut Himmelrikjs haulwen bat doa jebrocht haben. Wäa dit soo aunnämen kaun, däm lot daut aunnämen.

¹³Dan worden kjliene Kjinja no am jebrocht daut hee an de Henj opplajen un äwa an bäden sull. De Jinja oba schullen an doaräwa.

¹⁴Oba Jesus säd: Lot de kjliene Kjinja no mie komen, un vebeet an daut nich, wiels ut soone besteit daut Himmelrikj.

¹⁵Un hee läd an de Henj opp un jinkj von doa wieda.

¹⁶Dan kjeem een Maun no Jesus un säd to am: Gooda Meista, waut fa goodet mott ekj doonen, daut ekj daut eewje Läwen kjrie?

¹⁷Hee säd to am: Wuarom frajchst du mie äwa waut goot es? Doa es eena dee goot es, daut es Gott. Wan du Läwen haben west, dan hool de Jebooten.

¹⁸Hee säd to am: Woone? Un Jesus säd: “Du saust nich dootmoaken; du saust nich ehebräakjen; du saust nich stälen; du saust nich een faulschet Zeichnis jäwen;

¹⁹du saust Voda un Mutta ieren”, un: “Du saust dienen Näakjsten soo goot sennen aus die selfst”.

²⁰De junga Maun säd to am: Daut hab ekj aula jehoolen. Waut fält mie noch?

²¹Jesus säd to am: Wan du west volkomen sennen, dan go un vekjeep waut du hast, un jeff daut fa de oame, un du woascht een Schauz haben em Himmel. Un dan folj mie no.

²²Aus de junga Maun daut hieed, jinkj hee truarich wajch, wiels hee haud een grootet Vemieejen.

²³Un Jesus säd to siene Jinja: Ekj saj junt de Woarheit, daut woat fa een rikjen Maun schwoa sennen em Himmelrikj to komen.

²⁴Ekj saj junt noch emol: Daut es fa eenen Kameel leichta derch daut Uag von eene Notel to gonen, aus fa een rikjen Mensch em Himmelrikj to komen.

²⁵Aus de Jinja daut hieeden, vewundaden see sikj sea un säden: Wäa kaun dan äwahaupt seelich woaren?

²⁶Un Jesus kjikjt an aun un säd: Fa Menschen to beseenen es daut ommäajlich, oba bie Gott es aules mäajlich.

²⁷Dan auntwuad Petrus un säd to am: Kjikj emol, wie haben aules veloten un sent die nojefolcht. Waut woa wie doafäa kjrieen?

²⁸Jesus säd to am: Dit es secha: En de niee Welt, wan de Menschensän opp sienen harlichen Troon setten woat, dan woa jie, dee jie mie nojefolcht sent, uk jieda opp eenen Troon setten un äwa de 12 Stam von Israel rechten.

²⁹Un wäa om mient haulwen Hus ooda Brooda ooda Sesta ooda Voda ooda Mutta ooda Kjinja ooda Launt veloten haft, woat daut hundade mol [50] trigjkjrieen un daut eewje Läwen oawen.

³⁰Un väle dee daut ieeschte sent, woaren daut latste sennen, un dee daut latste sent, woaren daut ieeschte sennen.