Read Plautdietsch (Low German) – De Bibel Matäus 20 Bible Online

Matäus 20 - Plautdietsch (Low German) – De Bibel bible

Matäus 20

¹Met daut Himmelrikj es daut soo aus met een Ieejendeema, dee tiedich zemorjes jinkj Oabeida meeden, en sien Wiengoaden to oabeiden.

²Aus hee sikj met an eenich wort, an een vollet Doagesloon [51] to tolen, schekjt hee an en sienen Wiengoaden.

³Un aus hee Klock näajen rut jinkj, sach hee noch aundre opp däm Moakjtplauz stonen, dee nuscht to doonen hauden,

⁴un hee säd to an: Got jie uk en mienen Wiengoaden oabeiden, un ekj woa junt jäwen waut rajcht es. Un see jinjen.

⁵Un aus hee opp Meddach rut jinkj un Klock dree no Meddach wada, muak hee daut jrod soo.

⁶Bie Klock fief jinkj hee noch eemol, un funk noch emma soone dee sikj romstunden. Un hee säd to an: Wuarom sto jie hia dän dachäwa un doonen nuscht?

⁷See säden to am: Wiels ons kjeena jemeet haft. Hee säd to an: Dan got jie uk en mien Wiengoaden oabeiden.

⁸Aus daut ieescht Owent wort, säd de Ieejendeema von dän Wiengoaden to sien Husvoda: Roop de Oabeida un tol an äaren Loon. Fang biem latsten aun, un soo bat du bat däm ieeschten best.

⁹Dan kjeemen dee, dee Klock fief jemeet wieren, un kjrieejen jieda een vollet Doages Loon. [52]

¹⁰Oba aus daut bat de ieeschte kjeem, dochten dee, see wudden mea kjrieen. Oba see kjrieejen uk jieda een vollet Doagesloon. [53]

¹¹Un aus see daut kjrieejen, grunsten see äwa dän Husvoda

¹²un säden: Dise latste haben mau eene Stund jeoabeit, un du hast an ons jlikj jemoakt, dee wie derch de Doages Hett de Laust jedroacht haben.

¹³Hee oba säd to eenen von an: Mien Frint, ekj doo die kjeen orrajcht. Worscht du die nich eenich met mie, fa een Doagesloon [54] dän Dach to oabeiden?

¹⁴Nemm waut die jehieet un go! Ekj woa de latste soo väl jäwen aus die.

¹⁵Doaf ekj, met daut waut mient es, nich doonen waut ekj well? Ooda best du aufjenstich, wiels ekj soo mildjäwrich sie?

¹⁶Soo woaren de latste de ieeschte, un de ieeschte de latste sennen, wiels väle sent beroopen, oba weinje sent utjewält.

¹⁷Un aus Jesus opp däm Wajch no Jerusalem wia, neem hee siene 12 Jinja oppoat un säd to an:

¹⁸Kjikjt emol, wie gonen nu no Jerusalem, un de Menschensän woat aun de Schreftjelieede un Huagepriestasch utjeleewat woaren, un dee woaren am toom Doot veuadeelen.

¹⁹Dee woaren am de Nichjuden äwajäwen, daut dee am vespotten, veheiwen un kjriezjen. Un aum dredden Dach woat hee wada oppstonen.

²⁰Dan kjeem de Mutta Zebedäus met äare twee Säns, kjneed ver Jesus un säd, see haud am waut to froagen.

²¹Un Jesus fruach ar, waut see wull. See säd: Saj daut miene beid Säns, eena aun de rajchte Sied un eena aun de linkje Sied, bie die en dien Kjennichrikj setten sellen.

²²Oba Jesus auntwuad un säd to ar: Jie weeten nich, no waut jie froagen. Kjenn jie daut drinkjen, waut ekj drinkjen mott? See säden to am: Daut kjenn wie.

²³Hee säd to an: Waut ekj drinkj sell jie drinkjen, un met de Doop, wuamet ekj jedeept sie, woa jie jedeept woaren, oba to bestemmen, wäa aun miene rajchte ooda linkje Sied setten saul, es nich miene Sach. Daut woat fa dee sennen, dee mien Voda doatoo bestemmen woat.

²⁴Aus de Tieen daut hieeden, wieren see oajalich äwa dee beid Breeda.

²⁵Dan roopt Jesus an no sikj un säd: Jie weeten daut de Leidasch von de Velkja äwa an romkommandieren, un de majchtje eewen Jewault.

²⁶Mank junt oba saul daut nich soo sennen. Wäa mank junt groot sennen well, mott sikj eewen dän näakjsten sien Kjnajcht to sennen;

²⁷wäa bie junt de jratsta sennen well, mott aulemauns Deena sennen.

²⁸Wiels de Menschensän kjeem uk nich sikj bedeenen to loten, oba to deenen un sien Läwen hantojäwen, väle loostokjeepen.

²⁹Aus see von Jericho wajchjinjen, kjeemen am een Schoof Menschen hinjaraun.

³⁰Un doa sauten twee blinje Mana aum Wajch. Aus dee hieeden, daut Jesus doa vebie kjeem, schrieejen dee: Hab Metleet met ons, oo Har, [55] du David sien Sän!

³¹De Menschen beschwichten an un säden see sullen stell sennen. Oba dee schrieejen bloos soo väl dolla: Har, hab Metleet met ons, du David sien Sän!

³²Un Jesus stunt stell un roopt an un säd: Waut saul ekj fa junt doonen?

³³See säden to am: Har, moak ons de Uagen op.

³⁴Un Jesus strikjt an ut Metlieden äwa de Uagen; un fuaz kunnen see wada seenen, un see jinjen met Jesus met.