Read Plautdietsch (Low German) – De Bibel Matäus 23 Bible Online

Matäus 23 - Plautdietsch (Low German) – De Bibel bible

Matäus 23

¹Dan säd Jesus to daut Volkj un to siene Jinja:

²De Schreftjelieede un Farisäa setten opp Moses sien Stool.

³Horcht no an, un doot waut see junt sajen, oba recht junt nich, no daut waut see doonen, wiels dee doonen selfst nich waut see lieren.

⁴See binjen aundre Menschen schwoare Lausten opp de Schulren, dee schia nich to droagen sent. [60] Oba see selfst woaren nich een Finja rieren, dee droagen to halpen.

⁵See doonen aul äare Woakjen met dee Aufsecht, von de Menschen jeseenen to sennen. See moaken sikj äare Stiernreemes breet un de Tollen aun de Kjleeda lank.

⁶Bie eene Moltiet mäajen see jieren bowenaun setten un en de Judenschoolen dän väaschten Plauz haben.

⁷See seenen daut jieren, daut Menschen an opp däm Moakjtplauz bejreessen un an Liera nanen.

⁸Oba jie sellen junt nich Liera [61] nanen loten, wiels jie haben eenen Liera, un jie unjarenaunda sent Breeda.

⁹Jie sellen uk kjeen Mensch oppe Ieed Voda nanen, wiels jie haben eenen Voda, un dee es em Himmel.

¹⁰Jie sellen junt uk nich Meista nanen loten, wiels jie haben eenen Meista, daut es Christus.

¹¹Wäa bie junt groot es, saul jun Deena sennen.

¹²Wiels wäa sikj selfst groot moakt, woat trigjesat woaren; un wäa sikj selfst kjlien moakt, woat grootjemoakt woaren.

¹³Wee junt, Schreftjelieede un Farisäa, jie Heichla, jie schluten daut Himmelrikj too ver de Menschen! Jie komen doa nich nenn, un loten dee nich nenn, dee doa nenn wellen.

¹⁴(Wee junt, Schreftjelieede un Farisäa, jie Heichla, jie fräten de Wätfrues utem Hus, un moaken lange Jebäda, om jeseenen to sennen! Doawäajen woat june Vedaumnis soo väl jrata sennen.) [62]

¹⁵Wee junt, Schreftjelieede un Farisäa, jie Heichla, dee jie äwa Launt un Wota reisen, een Mensch fa dän Judengloowen to jewennen. Un wan daut ieescht passieet es, dan moak jie een Halenkjint von am, dobbelt soo sea aus jie selfst sent.

¹⁶Wee junt, blinje Wajchwiesa. Jie sajen, wan eena biem Tempel schwieren deit, daut es nuscht; oba wan eena bie daut Tempelgolt schwieren deit, dan es eena jebungen.

¹⁷Jie blinje Noaren! Waut es jrata: daut Golt ooda de Tempel, dee daut Golt heilich moakt?

¹⁸Un jie sajen uk, wan eena biem Aultoa schwieren deit, daut es nuscht; oba wäa bie daut Opfa opp däm Aultoa schwieet, dee es jebungen.

¹⁹Jie blinje Menschen! Waut es jrata, daut Opfa, ooda de Aultoa, dee daut Opfa heilich moakt?

²⁰Dee wäa aulsoo biem Aultoa schwieet, schwieet biem Aultoa met aules, waut doabowen es.

²¹Un wäa biem Tempel schwieet, schwieet biem Tempel un däm, dee doa bennen wont.

²²Un wäa biem Himmel schwieet, schwieet bie Gott sien Troon un bie dän, dee doabowen sett.

²³Wee junt, Schreftjelieede un Farisäa, jie Heichla, jie jäwen daut tieende vom Päpakrut, Anies un Dell em Goaden, oba seenen nich daut et wichtja es jerajcht, metliedent un tru to sennen! Dit es waut jie hauden doonen sult, onen daut aundre to unjaloten.

²⁴Blinje Leidasch! Migjen sie jie rut, oba Kameelen schluck jie opp.

²⁵Wee junt, Schreftjelieede un Farisäa, jie Heichla! Wiels jie moaken june Kuffels un Schiewen von buten krakjt rein, oba waut jie doa bennen haben, hab jie en june Jia toopjestolen!

²⁶Jie blinje Farisäa, moakt june Kuffels un Schiewen von bennen rein, dan woaren dee von buten uk rein sennen!

²⁷Wee junt, Schreftjelieede un Farisäa, Heichla! Jie sent soo aus aunjewitte Jräwa, von buten straum oba von bennen voll Doodenknoakes un jieda Oat Orreinichkjeit.

²⁸Soo lat daut junt von buten aus jerajchte Menschen, oba von bennen sent jie jesazloose Heichla.

²⁹Wee junt, Schreftjelieede un Farisäa, jie Heichla! Jie buen feine Jräwa fa de Profeeten un putzen de jerajchte äare Graufsteena

³⁰un sajen: Wan wie en onse Vodasch äare Tiet jeläft hauden, wudd wie nich metjeholpen haben, de Profeeten äa Bloot to vejeeten!

³¹Doamet saj jie, daut jie dee äare Säns sent, dee de Profeeten omjebrocht haben.

³²Dan moakt june Vodasch äare Mot nu voll!

³³Jie Schlangen, jie jeftjet Schlangenbroodsel! Woo räakjen jie jun Uadeel, fa de Hal vedaumt to sennen, utem Wäaj to komen?

³⁴Ekj saj junt, ekj schekj junt Profeeten, weise Mana un Schreftjelieede; eenje von dee woa jie doot moaken, un aundre kjriezjen, eenje woa jie en de Judenschoolen priejlen un hinjaraun sennen von eene Staut no de aundre,

³⁵soo daut opp junt aul daut jerajchte Bloot komen woat, daut opp dise Ieed vegoten es; von dän oschuldjen Abel sien Bloot aun, bat Secharja, Barachja sien Sän, sien Bloot, dän jie tweschen dän Tempel un dän Aultoa doot muaken.

³⁶Ekj saj junt woarhauftich, aul dit woat äwa dise Jennerazion komen.

³⁷Oo Jerusalem, Jerusalem, dee du de Profeeten doot moakst, un dee steenichst, dee die jeschekjt woaren! Woo foaken hab ekj die prooft soo to saumlen aus eene Kluck sikj de Kjikjel unja de Flichten saumelt, oba du leetst daut emma nich.

³⁸“Doawäajen woat junt jun Hus to eene Wiltnis woaren”.

³⁹Ekj saj junt dit: Jie woaren mie nich mea seenen, bat jie sajen woaren: Jesäajent es dee, dee em Harn sienen Nomen kjemt!