Read Plautdietsch (Low German) – De Bibel Matäus 3 Bible Online

Matäus 3 - Plautdietsch (Low German) – De Bibel bible

Matäus 3

¹En dee Tiet kjeem Johanes de Deepa un prädijd en Judäa en de Wiltnis un säd:

²Kjieet om, daut Himmelrikj es dicht bie!

³Dit es dee von däm de Profeet Jesaja jesajcht haft “Eene Stemm roopt en de Wiltnis: Moakt een Wajch reed fa onsen Harn, moakt fa am eenen jlikjen Stich.”

⁴Johanes oba haud een Kjleet von Kameelenhoa jemoakt, un hee druach dee met een Ladagort om de Lint, un äten deed hee Graushoppa un willen Honnich.

⁵Un de Menschen von Jerusalem un gaunz Judäa un de Jordan Jäajenden kjeemen no am,

⁶bekjanden äare Sinden un leeten sikj von am em Jordan deepen.

⁷Oba aus hee sach, daut väl Farisäa un Saduzäa kjeemen sikj von am deepen to loten, säd hee to an: Jie Schlangenbroodsel! Wäa haft junt jesajcht daut jie daut komende Jerecht utem Wäaj komen kjennen?

⁸Bewiest met jun Läwen, daut jie junt oppjemoakt haben,

⁹un denkjt nich, daut jie bie junt selfst sajen kjennen: Abraham es ons Voda. Ekj saj junt: Gott kaun Abraham ut dise Steena Kjinja schaufen.

¹⁰De Akjs licht de Beem aun de Wartel reed, un jieda Boom, dee nich goode Frucht drajcht, woat aufjehakt un em Fia jeschmäten.

¹¹Ekj deep junt met Wota daut jie omkjieren. Oba dee waut no mie kjemt es stoakja aus ekj, däm ekj nich wieet sie de Schoo to droagen. Dee woat junt met dän Heiljen Jeist un met Fia deepen.

¹²Hee haft siene Schmietscheffel en de Haunt, un woat de Draschflua rein moaken, un dän Weit em Spikja brinjen. Oba daut Sprie woat hee em Fia schmieten, daut nich uttomoaken jeit.

¹³Dan kjeem Jesus von Galiläa no Johanes, om sikj von am em Jordan deepen to loten.

¹⁴Johanes oba proowd am doavon auftoräden un säd: Ekj sull mie von die deepen loten, un du kjemst no mie?

¹⁵Jesus oba auntwuad am: Doo daut mau, wiels doamet doo wie waut Gott siene Jerajchtichkjeit velangt. Dan leet hee daut too.

¹⁶Un sooboolt aus Jesus jedeept wia, kjeem hee utem Wota rut, un dan muak sikj de Himmel äwa am op, [10] un hee sach Gott sien Jeist, soo aus eene Duw rauf komen un sikj opp am saten.

¹⁷Un eene Stemm vom Himmel säd: Dit es mien leewa Sän, met däm ekj sea tofräd sie.