Read Plautdietsch (Low German) – De Bibel Matäus 4 Bible Online

Matäus 4 - Plautdietsch (Low German) – De Bibel bible

Matäus 4

¹Dan wort Jesus vom Jeist en de Wiltnis nenn jebrocht, om doa vom beesen Fient vesocht to woaren.

²Un aus hee 40 Doag, Dach un Nacht jefaust haud, hungad am.

³Dan kjeem de Vesieekja un säd to am: Wan du Gott sienen Sän best, dan jebeed dise Steena, daut dee Broot woaren.

⁴Jesus oba auntwuad: Daut steit jeschräwen: “De Mensch läft nich bloos von Broot, oba von aule Wieed, dee Gott jerät haft.”

⁵Dan neem de beesa Fient am en de heilje Staut nenn un stald am opp dän Tempelspetz

⁶un säd to am: Wan du Gott sien Sän best, dan sprinj rauf, wiels daut steit jeschräwen: “Hee woat siene Enjel Befäl äwa die jäwen, un dee woaren die opp de Henj droagen, daut du die nich de Feet aun eenen Steen steeten woascht.”

⁷Jesus säd to am: Daut steit uk jeschräwen: “Du saust Gott dienen Harn nich vesieekjen.”

⁸Dan neem de Soton am wada met sikj opp een huagen Boajch nopp, un wees am aule Kjennichsrikjs un äare Pracht opp de Ieed

⁹un säd to am: Dit woa ekj die aula jäwen, wan du die ver mie bieejen un mie aunbäden woascht.

¹⁰Dan säd Jesus to am: Wajch met die, Soton! Wiels daut steit jeschräwen: “Du saust Gott, dienen Harn, aunbäden un eensich am deenen.”

¹¹Dan veleet de beesa Fient am un de Enjel kjeemen un deenden am.

¹²Aus Jesus hieed, daut Johanes faustjenomen wia, trock hee no Galiläa.

¹³Hee veleet Nazaret, kjeem un wond en Kapernaum, daut en de Sebulon un Naftali Jäajent aum Mäa licht,

¹⁴daut et sikj erfellen wudd, waut de Profeet Jesaja jesajcht haud:

¹⁵“Daut Launt Sebulon un daut Launt Naftali, dee aum Mäa ligjen, aun de aundre Sied vom Jordan, daut gottloose Galiläa,

¹⁶daut Volkj, daut em diestren saut, haft een grootet Licht jeseenen; un äwa dee, dee em diestren wonden, es een Licht oppjegonen.”

¹⁷Von dee Tiet aun funk Jesus aun to prädjen un to sajen: Kjieet om, wiels daut Himmelrikj es dicht bie.

¹⁸Aus Jesus aum galiläischen Mäa jinkj, sach hee twee Breeda, Simon, dee Petrus jenant wort, un sien Brooda Andreas, dee daut Nat en daut Mäa schmeeten. Daut wieren Fescha.

¹⁹Un hee säd to an: Folcht mie no, un ekj woa Menschenfescha von junt moaken!

²⁰Un see veleeten soofuaz äa Nat un jinjen met am met.

²¹Un aus see von doa wieda jinjen, sach hee noch twee Breeda, Jakobus un Johanes, met äaren Voda Zebedäus toop en een Boot äare Nats flekjen, un roopt an.

²²Dee veleeten soofuaz daut Boot uk äaren Voda, un jinjen met am met.

²³Un Jesus jinkj derch gaunz Galiläa un lieed en äare Judenschoolen un prädijd daut Evangelium vom Rikj un heeld jieda Krankheit un Liedenschoft em Volkj.

²⁴Un hee wort doaderch en gaunz Sierien beriemt, un see brochten aul äare kranke no am, dee von veschiedne Liedenschoften jekjwält worden, dee waut vom Soton besäten wieren, dee waut Aunstoot hauden un de Jelämde, un hee muak dee aula jesunt.

²⁵Un von Galiläa un de Tieen Städa, von Jerusalem un Judäa, un von hinja däm Jordan kjeem am väl Volkj hinjaraun.