Read Plautdietsch (Low German) – De Bibel Matäus 6 Bible Online

Matäus 6 - Plautdietsch (Low German) – De Bibel bible

Matäus 6

¹Seet junt väa, daut jie jun fromm sennen nich doaropp ver Menschen eewen, daut jie wellen jeseenen sennen, wiels dan hab jie von jun Voda em Himmel aul met kjeenen Loon to räakjnen.

²Wan du diene Gow jefst, saust du nich met de Trompeet veropp blosen loten, soo aus de Heichla daut en de Judenschoolen un opp de Gaussen doonen, om von de Menschen jeloft to woaren. Ekj saj junt en Woarheit, daut es aules, waut dee kjrieen woaren.

³Oba wan du diene Gowen jefst, dan lot de linkje Haunt nich weeten, waut de rajchte deit,

⁴soo daut du em Jeheemen jefst, un dien Voda, dee en daut Jeheemnis sitt, woat die daut effentlich beloonen.

⁵Un wan jie bäden, sell jie nich soo doonen aus de Heichla, dee jieren en de Schoolen un opp de Gaussenakjen stonen un bäden, soo daut de Menschen an seenen sellen. Ekj saj junt en Woarheit, dee haben äaren Loon wajch.

⁶Oba wan du bäden deist, dan go en diene Stow un moak de Däa too un bäd to dienen Voda em Jeheemen. Un dien Voda, dee doa sitt waut em Jeheemen väajeit, woat die doafäa loonen.

⁷Un wan jie bäden, rät nich soo väl ladje Wieed aus de Velkja doonen. Dee meenen see woaren jehieet, wan see väl Wieed brucken.

⁸Jie sellen nich soo sennen aus dee, wiels jun Voda weet waut jie brucken, ea jie doarom bäden.

⁹Doawäajen sell jie soo bäden: Ons Voda em Himmel! Dien Nomen saul heilich jehoolen woaren.

¹⁰Lot dien Rikj komen. Lot dien Wellen oppe Ieed jrod soo jedonen woaren aus em Himmel.

¹¹Jeff ons daut Broot daut wie vondoag brucken.

¹²Vejeff ons onse Schult, soo aus wie dee vejäwen, dee sikj aun ons veschulcht haben.

¹³Brinj ons nich en Vesieekjunk, oba bewoa ons fa dän beesen. [13] Wiels die jehieet daut Rikj un de Krauft un de Harlichkjeit fa emma un emma. Amen [14]

¹⁴Wan jie Menschen daut vejäwen, wan dee sikj jäajen junt vesindjen, woat jun himlischa Voda junt uk vejäwen.

¹⁵Oba wan jie aundre Menschen äare Sinden nich vejäwen, woat jun Voda junt june Sinden uk nich vejäwen.

¹⁶Wan jie fausten, sell jie nich lange Jesechta moaken soo aus de Heichla. Dee vestalen äare Jesechta, daut Menschen seenen sellen daut see fausten. Ekj saj junt de Woarheit: Dee haben äaren Loon aul wajch.

¹⁷Oba wan du Fausten deist, dan wausch dien Jesecht un besorj die de Hoa,

¹⁸soo daut nich de Menschen, oba jun Voda em Jeheemen, dien fausten sitt. Un dien Voda, dee doa sitt, waut em Jeheemen väajeit, woat die doafäa effentlich loonen.

¹⁹Saumelt junt nich Schaza oppe Ieed, wua Motten un Rost [15] dee oppfräten, un de Stäla enbräakjen un dee stälen.

²⁰Oba saumelt junt Schaza em Himmel, wua Motten un Rost [16] dee nich vefräten, un de Stäla nich nogrowen un stälen.

²¹Wiels wua jun Schauz es, doa woat jun Hoat uk sennen.

²²Daut Licht fa dän Kjarpa es daut Uag. Wan daut Uag kloa kjikjt, woat de gaunza Kjarpa voll Licht sennen.

²³Wan daut Uag oba nich kloa kjikjt, dan es daut em gaunzen Kjarpa diesta. Wan nu daut Licht, waut en die es, diesta es, woo groot woat dan daut diestre sennen!

²⁴Kjeena kaun twee Haren deenen. Hee woat eenen nich lieden kjennen un von dän aundren väl hoolen. Ooda hee woat aun eenen henjen un dän aundren veachten. Du kaust nich Gott deenen un daut Rikjtum. [17]

²⁵Doawäajen saj ekj junt, moakt junt nich sorjen om jun Läwen, äwa waut jie äten un drinkjen sellen; uk nich om jun Kjarpa, waut jie auntrakjen sellen. Es daut Läwen nich mea aus äten, un de Kjarpa mea aus de Kjleedunk?

²⁶Kjikjt no de Väajel enne Loft. Dee seien nich un arnten uk nich un saumlen nuscht en de Stalinj, un jun Voda em Himmel foodat dee doch. Sent jie nich mea wieet aus dee?

²⁷Un wäa kaun sien Läwen [18] derch sorjen uk bloos een bät velenjren?

²⁸Un to waut moak jie junt sorjen äwa de Kjleedunk? Denkjt aun dee Lelje opp de Stap, woo dee waussen. Dee oabeiden un spennen nich,

²⁹un doch saj ekj junt, selfst Salomo wia en aul siene Harlichkjeit nich soo aunjetrocken aus eene von dee.

³⁰Un wan Gott daut Graus opp de Stap, daut vondoag läft un morjen em Owen jeschmäten woat, soo kjleeden deit, wudd hee junt dan nich noch ea kjleeden? Waut hab jie doch fa eenen kjlienen Gloowen!

³¹Jie sellen nich sorjen un sajen: Waut sell wie äten? Waut sell wie drinkjen? Waut sell wie auntrakjen?

³²Daut sent aules Sorjen, dee de Velkja sikj moaken. Oba jun Voda em Himmel weet, daut jie daut aula brucken.

³³Oba sieekjt daut ieeschte no Gott sien Rikj un no siene Jerajchtichkjeit. Dan woa jie daut aundre uk aula kjrieen.

³⁴Doawäajen moakt junt nich Sorjen om daut, waut morjen komen saul. Morjen woat fa sikj selfst sorjen. Jieda Dach haft fa sikj jenuach Trubbel.