Read Plautdietsch (Low German) – De Bibel Matäus 7 Bible Online

Matäus 7 - Plautdietsch (Low German) – De Bibel bible

Matäus 7

¹Doot nich rechten, daut jie nich uk jerecht woaren.

²Wiels jrod doano aus jie aundre rechten, woa jie uk jerecht woaren. Un doano aus jie toomäten, woat junt toojemäten woaren.

³Wuarom kjikjst du no eenen Spoon en dien Brooda sien Uag un moakjst nich dän Baulkjen en dien ieejnet Uag?

⁴Ooda woo kaust du to dien Brooda sajen: Lot mie dän Spletta ut dien Uag trakjen, wan du selfst een Baulkjen em Uag hast?

⁵Du Heichla! Trakj ieescht dän Baulkjen ut dien ieejnet Uag, dan woascht du seenen kjennen, dän Spletta ut dien Brooda sien Uag to trakjen.

⁶Jäft de Hunj nich daut waut heilich es, un schmiet june Parlen nich ver de Schwien, daut dee dee nich unja de Feet kjrieen un sikj dan äwahäa moaken un junt verieten.

⁷Froacht, un junt woat jejäft woaren. Sieekjt, un jie woaren finjen. Klopt aun, un junt woat opjemoakt woaren.

⁸Wiels wäa doa frajcht, kjricht; un wäa doa sieekjt, finjt; un wäa aunklopt, fa däm woat opjemoakt.

⁹Wudd bie junt wäa sennen, dee sien Sän wudd een Steen jäwen, wan dee am fa Broot froagen wudd?

¹⁰Ooda wan dee am no een Fesch fruach, dee am dan eene Schlang jäwen wudd?

¹¹Wan jie dan, soo schlajcht aus jie uk sent, doch weeten june Kjinja goode Gowen to jäwen, wooväl mea woat jun Voda em Himmel, dee goode Dinja jäwen, dee am doano froagen?

¹²Un wautemma see junt doonen sellen, daut doot jie an uk. Daut es waut daut Jesaz un de Profeeten lieren.

¹³Got derch daut enje Puat nenn. Wiels daut Puat es wiet un de Wajch es breet, [19] dee en daut vedoawen fieet, un väle gonen dän Wajch;

¹⁴un daut Puat es enj un de Wajch es schmaul, dee toom Läwen fieet, un daut sent mau weinich, dee daut finjen.

¹⁵Seet junt väa fa de faulsche Profeeten, dee en Schopskjleeda no junt komen, oba ennalich sent see rietende Wilw.

¹⁶Jie sullen dee aun äare Frucht kjanen. Woaren Wiendruwen vom Hachelstruck ooda Fiejen von Distlen jeplocken?

¹⁷Jrod soo drajcht een gooda Boom goode Frucht un een schlajchta Boom schlajchte Frucht.

¹⁸Een gooda Boom kaun nich schlajchte Frucht droagen, un een schlajchta Boom kaun nich goode Frucht droagen.

¹⁹Jieda Boom dee nich goode Frucht drajcht, woat aufjehakt un em Fia jeschmäten.

²⁰Aun äare Frucht sull jie an kjanen.

²¹Dee woaren nich aula en daut Himmelrikj komen, dee to mie: Har, Har! sajen. Doa komen bloos dee nenn, dee doa doonen, waut mien Voda em Himmel haben well.

²²Aun janen Dach woaren väl to mie sajen: Har, Har, hab wie nich en dien Nomen jeprofezeit, un en dien Nomen Soton utjedräwen, un en dien Nomen väl jewaultje Woakjen jedonen?

²³Un dan woa ekj an sajen: Ekj hab junt noch nie jekjant; wajch met junt, jie schlajchte!

²⁴Wäa miene Räd jehieet haft un deit waut ekj jesajcht hab, es soo aus een vestendja Maun, dee sien Hus opp däm Steengrunt bud.

²⁵Un de Räajen foll un daut Wota kjeem un de Wint blosd un schluach jäajen daut Hus, un daut foll doch nich, wiels daut opp däm Steen jebut wia.

²⁶Un wäa miene Räd hieet un nich deit, waut ekj jesajcht hab, es aus een onvestendja Maun, dee sien Hus opp däm Saunt bud.

²⁷Un aus dan de Räajen foll un daut Wota kjeem un de Wint blosd un jäajen daut Hus schluach, foll daut met grootet krachen toop.

²⁸Un aus Jesus met siene Räden derch wia, staunden de Menschen äwa waut hee lieren deed,

²⁹wiels hee lieed soo aus eena, dee met Krauft doarhinja stunt, un nich soo aus de Schreftjelieede.