Read Plautdietsch (Low German) – De Bibel Matäus 8 Bible Online

Matäus 8 - Plautdietsch (Low German) – De Bibel bible

Matäus 8

¹Aus Jesus vom Boajch rauf kjeem, jinjen am een grootet Schoof Menschen hinjaraun.

²Un nu horcht, doa kjeem uk een Leprakranka, bäd am aun un säd: Har, wan du west, du kaust mie rein moaken.

³Un Jesus strakjt siene Haunt ut, schieed am aun un säd: Daut es waut ekj well; sie rein! Un fuaz oppe Städ wia hee von siene Lepra Krankheit loos.

⁴Un Jesus säd to am: See doano, daut du daut kjeenem sajchst, oba go un stal die dän Priesta väa un brinj een Opfa, soo aus Moses befolen haft, aus een Bewies ver an. [20]

⁵Aus Jesus en Kapernaum nenn kjeem, kjeem am een Offizia entjäajen un säd to am:

⁶Har, mien Kjnajcht licht tus jelämt un sea jekjwält.

⁷Un Jesus säd to am: Ekj woa komen un am jesunt moaken.

⁸Oba de Offizia säd to Jesus: Har, ekj sie daut nich wieet, daut du unja mien Dak kjemst. Saj du bloos een Wuat, dan woat mien Kjnajcht aul jesunt woaren.

⁹Wiels ekj sie een Maun, dee unja Autorität steit, un hab Soldoten unja mie. Ekj saj to eenem: Go! un dee jeit; to een aundren: Komm! un dee kjemt; un to mien Sklow: Doo dit! un dee deit daut.

¹⁰Aus Jesus daut hieed, wundad hee sikj un säd to dee, dee met am jinjen: Dit mott ekj junt sajen: Soon Gloowen hab ekj nich emol en Israel [21] jefungen.

¹¹Ekj saj junt dit: Väl woaren vom Oosten un Wasten komen un en daut Himmelrikj met Abraham, Isaak un Jakob aum Desch setten,

¹²oba de Kjinja von daut Rikj woaren rut em diestren jeschmäten woaren. Doa woaren see jaumarieren un met de Tänen kjnirschen.

¹³Un to dän Offizia säd Jesus: Go, daut woat soo woaren aus du jejleeft hast. Un krakjt dan wort sien Deena jesunt.

¹⁴Aus Jesus bie Petrus em Hus kjeem, sach hee daut Petrus siene Schwieemutta krank em Bad lach, un daut see Feeba haud.

¹⁵Hee foot ar aun de Haunt, un daut Feeba veleet ar. Dan stunt see opp un bedeend am.

¹⁶Dan zeowes brochten see väle no am, dee von beese Jeista besäten wieren, un hee dreef de Jeista rut met sien Wuat un muak aul äare kranke jesunt,

¹⁷daut sikj daut erfellen wudd, waut derch dän Profeet Jesaja jesajcht es, dee doa sajcht: “Hee haft onse Schwakheiten opp sikj jenomen un onse Krankheiten jedroacht.”

¹⁸Aus Jesus sach, daut noch soo väl Menschen om am stunden, befool hee äwa to foaren no de aundre Kaunt See.

¹⁹Un een Schreftjelieeda kjeem no am un säd: Meista, ekj well metkommen, wuaemma du hanjeist.

²⁰Un Jesus säd to am: Fas haben äare Lajcha, de Väajel haben äare Nasta, oba de Menschensän haft nich een Plauz, sienen Kopp hantolajen.

²¹Dan säd een aundra Jinja: Lot mie ieescht gonen, mienen Voda begrowen.

²²Jesus säd to am: Folj du mie no, un lot de Doodje äare Doodes selfst begrowen!

²³Jesus stieech en daut Boot nenn, un siene Jinja am hinjaraun.

²⁴Oba horcht emol, een jewaultja Storm kjeem oppem Mäa opp, soo daut de Walen äwa daut Boot schluagen. Oba Jesus schleep.

²⁵Un siene Jinja kjeemen un wuaken am opp un säden: Har, rad ons, wie komen om!

²⁶Un hee säd to an: Wuarom es junt soo angst? Woo es jun Gloowen soo kjlien? Un Jesus stunt opp un befool dän Wint un de Walen sikj to lajen. Un daut wort gaunz stell.

²⁷Un de Menschen staunden doaräwa un säden: Waut es daut fa een Mensch, daut am soogoa Wint un Wota unjadon sent?

²⁸Aus Jesus no de aundre Sied Wota kjeem en de Gadarena [22] äa Launt, kjeemen am twee Mana entjäajen, dee von beese Jeista besäten wieren, dee sikj en ladje Jräwa opphilden un soo rietent wieren, daut sikj kjeena woagd dän Wajch to gonen.

²⁹Aus dee Jesus sagen, fungen dee aun to schrieen: Waut hast du met ons to doonen, Jesus du Gott sienen Sän? Best du jekomen ons ver de Tiet to kjwälen?

³⁰Een zimlichet Enj auf grosd eene groote Häad Schwien.

³¹Dan prachaden de Soton Jesus un säden: Wan du ons rut driewen deist, dan lot ons en de Schwien nenn foaren.

³²Un Jesus säd: Got! Dan kjeemen dee rut un fuaren en de Schwien nenn. Un de gaunze Häad Schwien moaracht äwa dän Aufgrunt em Mäa nenn, un vesoopen.

³³De Schwienshoad randen aus jejoacht en de Staut nenn un vetalden aules waut passieet wia, un uk waut met de Mana passieet wia, dee von de beese Jeista wieren besäten jewast.

³⁴Un aulemaun kjeem ut de Staut rut Jesus to trafen. Un aus see am sagen, prachaden see am äare Jäajent to veloten.