Read Plautdietsch (Low German) – De Bibel Markus 10 Bible Online

Markus 10 - Plautdietsch (Low German) – De Bibel bible

Markus 10

¹Jesus veleet doa un jinkj en de judäische Jäajent aun de aundre Sied Jordan. Un wada kjeem väl Volkj no am, un hee lieed an, soo aus hee emma deed.

²Doa kjeemen eenje Farisäa am to vesieekjen, un fruagen am auf een Maun sikj met rajcht von siene Fru scheeden kunn.

³Hee säd to an: Waut sajcht Moses sien Jesaz?

⁴See säden, Moses haud daut toojeloten, daut een Maun siene Fru kunn eenen Scheedungsbreef schriewen un ar gonen loten.

⁵Dan auntwuad Jesus an un säd: Moses schreef junt dit Jesaz bloos wiels jie em Hoat vehoat sent un soo schwoa to belieren sent;

⁶oba aus Gott aum Aunfank aules moaken deed, muak hee eenen Maun un eene Fru.

⁷Doawäajen woat een Maun Voda un Mutta veloten, om met siene Fru toop to sennen, [31]

⁸un dee twee woaren een Fleesch woaren, soo daut see nich mea twee, oba een Fleesch sent.

⁹Waut Gott jebungen haft, saul de Mensch nich uteneen leesen.

¹⁰Aus see wada bennen wieren, fruagen siene Jinja am wada äwa dise Sach.

¹¹Un hee säd to an: Wäa sikj von siene Fru scheeden deit un eene aundre friet, brakjt siene Ehe met ar;

¹²un wan eene Fru sikj von äaren Maun scheeden deit un eenen aundren friet, brakjt see de Ehe.

¹³Dan brochten see kjliene Kjinja no am, daut hee dee de Henj opplajen sull. De Jinja oba schullen dee, waut de Kjinja brochten.

¹⁴Oba aus Jesus daut sach, wia hee sea ontofräd un säd to an: Lot de kjliene Kjinja no mie komen un hoolt dee nich trigj; wiels soone jrod jehieet daut Gottesrikj.

¹⁵Ekj saj junt de Woarheit: Wäa daut Gottesrikj nich soo oppnemt aus een kjlienet Kjint, woat doa niemols nenn komen.

¹⁶Un hee neem de Kjinja opp en siene Oarms, läd an de Henj opp un säajend an.

¹⁷Aus Jesus wada opp däm Wajch wia, kjeem een Maun no am jerant, kjneed sikj ver am un säd: Gooda Meista, waut mott ekj doonen om daut eewje Läwen to jewennen?

¹⁸Jesus säd: Wuarom nanst du mie goot? Kjeena es goot buta Gott selfst.

¹⁹Du weetst de Jebooten: “Du saust nich morden, du saust nich ehebräakjen, du saust nich stälen, du saust nich faulsch Zeichnis jäwen, du saust kjeenem aunschmäaren, du saust Voda un Mutta ieren.”

²⁰Hee säd: Meista, dit hab ekj aula von junk aun jehoolen.

²¹Jesus kjikjt am aun un wia am goot. Hee säd to am: Die fält noch eent. Go un vekjeep aules, waut du hast, un jeff de oame daut. Dan woascht du eenen Schauz em Himmel haben, un dan komm un folj mie no.

²²De Maun leet dän Kopp henjen un jinkj truarich wajch; wiels hee haud een grootet Vemieejen.

²³Jesus kjikjt om sikj un säd to siene Jinja: Woo schwoa woaren de rikje en daut Gottesrikj komen!

²⁴De Jinja wundaden sikj äwa siene Wieed. Hee oba auntwuad noch eemol: Kjinja, woo schwoa es daut en daut Gottesrikj to komen fa dee, dee äa vetruen opp Rikjtum saten! [32]

²⁵Daut es fa eenen Kameel leichta, derch daut Uag von eene Notel to gonen, aus fa eenen rikjen Mensch en daut Gottesrikj to komen.

²⁶Dan vefieeden de Jinja sikj noch dolla un säden eena toom aundren: [33] Wäa kaun dan seelich woaren?

²⁷Jesus kjikjt an aun un säd: Fa Menschen es dit ommäajlich oba nich fa Gott; fa Gott es aules mäajlich.

²⁸Petrus säd to am: Wie haben aules veloten un sent met die jekomen.

²⁹Jesus säd: Ekj saj junt de Woarheit: Doa es nich eena dee Hus ooda Brooda ooda Sesta ooda Mutta ooda Voda ooda Kjinja ooda Lenda om mient wellen un wäajen daut Evangelium, veloten haft,

³⁰dee nich aul en dit Läwen, medden unja Vefoljunk 100 mol sooväl Hiesa un Breeda un Sestren un Mitta un Kjinja un Launt kjrieen woat, un en de komende Welt daut eewje Läwen.

³¹Oba väle dee nu de ieeschte sent, woaren de latste sennen, un dee nu de latste sent, woaren de ieeschte sennen.

³²See wieren opp däm Wajch no Jerusalem; un Jesus jinkj veropp. De Jinja wundaden sikj; un dee doa metkjeemen, wia angst. Un hee neem de Twalw wada tosied un säd an, waut met am passieren wudd.

³³Hee säd: Wie gonen nu no Jerusalem, un de Menschensän woat aun de Huagepriesta un Schreftjelieede verot woaren. Dee woaren am toom Doot veuadeelen un aun de Nichjuden äwajäwen.

³⁴Dee woaren am vespotten un aunspieen un veheiwen un doot moaken, un om dree Doag woat hee oppstonen.

³⁵Dan kjeemen Jakobus un Johanes, Zebedäus siene Säns, un säden: Meista, wie wellen, daut du daut fa ons deist, wuano wie die froagen woaren.

³⁶Hee fruach an: Waut saul ekj fa junt doonen?

³⁷Lot ons bie die en diene Harlichkjeit, eena aun diene rajchte Sied un eena aun de linkje Sied setten.

³⁸Jesus säd: Jie weeten nich, no waut jie froagen. Kjenn jie von daut Liedenskuffel drinkjen, von daut ekj drinkj, un met dee Doop jedeept woaren met dee ekj jedeept woa?

³⁹See säden to am: Daut kjenn wie. Jesus säd to an: Jie woaren daut Liedenskuffel drinkjen, daut ekj drinkj, un met de Doop jedeept woaren, met dee ekj jedeept woa;

⁴⁰oba to bestemmen wäa aun miene rajchte ooda linkje Sied setten saul, es nich miene Sach; doa komen dee han, dee doatoo bestemt sent.

⁴¹Aus de Tieen daut hieeden, wieren see vedrislich äwa Jakobus un Johanes.

⁴²Jesus roopt an toop un säd: Jie weeten daut de groote en dise Welt harschen, un daut de Beaumte äare Jewault uteewen.

⁴³Mank junt saul daut oba nich soo sennen; wäa mank junt well groot sennen, saul jun Deena sennen;

⁴⁴wäa mank junt well de väanämsta sennen, saul aulemauns Kjnajcht sennen.

⁴⁵Soogoa de Menschensän kjeem nich, om sikj bedeenen to loten, oba om to deenen, un sien Läwen to jäwen väle loostokjeepen.

⁴⁶Dan kjeemen see no Jericho. Aus Jesus met siene Jinja un noch een Schoof aundre de Staut veleeten, saut Bartimäus, een blinja, Timäus sien Sän, aum Wajch un prachad.

⁴⁷Aus dee hieed, daut dit Jesus von Nazaret wia, funk dee aun to schrieen: Jesus, du David sien Sän, hab Metleet met mie!

⁴⁸Väle beschwichten am, un säden hee sull stell sennen. Hee oba funk bloos sooväl dolla aun to schrieen: Du David sien Sän, hab Metleet met mie!

⁴⁹Jesus stunt stell un säd: Roopt am! Dan säden see to dän blinjen Maun: Sie jetroost, sto opp! Hee lat die roopen!

⁵⁰Hee schmeet sien Kjleet auntsied, sprunk opp un kjeem no Jesus.

⁵¹Jesus fruach am waut hee fa am doonen sull. De blinja Maun säd: Meista, [34] ekj well seenen kjennen.

⁵²Jesus säd to am: Go! Du best derch dienen Gloowen jeheelt. Krakjt doa kunn hee seenen, un foljd Jesus no.