Read Plautdietsch (Low German) – De Bibel Markus 11 Bible Online

Markus 11 - Plautdietsch (Low German) – De Bibel bible

Markus 11

¹Aus see nu noda no Jerusalem kjeemen, no Betfage un Betanien aum Oliewen Boajch, schekjt hee twee von siene Jinja

²un säd to an: Got no daut Darp daut ver junt licht, un jrod wua jie doa nengonen, woa jie een Falm aunjebungen finjen, wua noch kjeena bowen jeräden haft; leest daut loos un brinjt daut häa!

³Wan junt irjentwäa frajcht, wuarom jie daut doonen, sajcht am: De Har well daut brucken un woat daut boolt wada trigj schekjen.

⁴See jinjen un fungen een Falm, buten opp de Gaus aum Däarenpost aunjebungen, un leesden daut loos.

⁵Von de Menschen, dee doa stunden, säden eenje: Waut doo jie doa, daut jie daut Falm loosleesen?

⁶See säden an, waut Jesus an befolen haud, un dee leeten an gonen.

⁷Aus see daut no Jesus brochten, spreeden see äare Kjleeda äwa daut Falm, un Jesus sad sikj doa nopp.

⁸Väl Menschen spreeden äare Kjleeda opp däm Wajch, aundre hakten blädaje Asta von de Beem, un spreeden dee uk opp däm Wajch.

⁹Dee doa veropp jinjen uk dee doa hinjaraun kjeemen, schrieejen: Hosiana! Jesäajent es dee, dee em Harn sienen Nomen kjemt!

¹⁰Lot onsen Voda David sien Rikj, daut em Harn sienen Nomen kjemt, jesäajent sennen! Halp du Hechsta ons!

¹¹Jesus jinkj en Jerusalem nenn, un jinkj nom Tempel. Hee kjikjt sikj aules aun, un wiels daut aul lot wia, jinkj hee met siene Twalw no Betanien.

¹²Aus see dän näakjsten Dach Betanien veleeten, wia Jesus hungrich.

¹³Hee sach von wiet auf eenen Fiejenboom met Bläda stonen un jinkj han to seenen auf dee Frucht haud. Aus hee han kjeem, funk hee sest nuscht aus Bläda; wiels de Fiejen äare Tiet wia noch nich doa.

¹⁴Dan säd hee to dän Boom: Mucht kjeena mea von die Frucht äten! Un siene Jinja hieeden waut hee säd.

¹⁵Aus hee no Jerusalem kjeem, jinkj hee em Tempel nenn un funk aun dee rut to joagen dee doabennen koften un vekoften. Hee schmeet de Jeltwakjsla äare Deschen un de Duwenhendla äare Benkjen om,

¹⁶un leet kjeenem mea siene Woa derch dän Tempel droagen.

¹⁷Un aus hee an lieed, säd hee: Steit doa nich jeschräwen: “Mien Hus saul een Bädhus fa aule Velkja jenant woaren”? Oba jie haben eene Reibaheel doarut jemoakt.

¹⁸De Huagepriestasch un Schreftjelieede hieeden daut, un sochten no eene Uasoak am omtobrinjen. See hauden Angst fa am; wiels daut gaunze Volkj sikj äwa siene Lieren wundad.

¹⁹Un aus daut ieescht Owent wort, jinjen see [35] ut de Staut rut.

²⁰Un aus see zemorjes bie dän Fiejenboom vebie jinjen, sagen see daut dee bat en de Wartel vedrieecht wia.

²¹Petrus foll bie, waut Jesus jesajcht haud, un säd to am: Liera [36] kjikj, de Fiejenboom, opp dän du dän Fluch lädsd, es vedrieecht.

²²Jesus auntwuad un säd: Habt Gloowen aun Gott!

²³Ekj saj junt de Woarheit: Wäa to disen Boajch sajen wudd: Häw die opp un schmiet die en daut Mäa! un em Hoat nich doaraun twiewelt, oba jleeft, daut daut passieren woat, woat daut kjrieen wuano hee frajcht.

²⁴Doawäajen saj ekj junt: Om wautemma jie bäden, jleeft daut jie daut kjrieen, un jie woaren daut haben.

²⁵Un wan jie stonen un bäden, un jäajen wäm waut haben, dan sell jie däm daut vejäwen, daut jun Voda em Himmel junt june Fälasch uk vejäwen kaun.

²⁶Oba wan jie nich vejäwen, woat jun Voda em Himmel, junt june Fälasch uk nich vejäwen.

²⁷Dan kjeemen see wada no Jerusalem. Un aus hee em Tempel romjinkj, kjeemen de Huagepriestasch, de Schreftjelieede un Eltestasch,

²⁸un säden to am: Derch waut fa eene Macht deist du dit? Ooda wäa haft die daut rajcht jejäft dit to doonen?

²⁹Jesus auntwuad un säd to an: Ekj woa junt uk waut froagen; jäft mie eene Auntwuat, un dan woa ekj junt uk sajen, wäa mie daut rajcht jeft dit to doonen.

³⁰Sajcht emol: Wia Johanes siene Doop vom Himmel ooda von Menschen?

³¹See hauden mank sikj eene Berodunk un säden: Wan wie sajen: Vom Himmel, dan woat hee sajen: Wuarom jleewd jie am dan nich?

³²Oba wan wie sajen: Von Menschen? Doatoo ferchten see de Menschen, wiels dee hilden Johanes fa eenen grooten Profeet.

³³Un soo säden see to Jesus: Wie weeten nich. Dan säd Jesus to an: Dan saj ekj junt uk nich, wäa mie daut rajcht jeef dit to doonen.