Read Plautdietsch (Low German) – De Bibel Markus 15 Bible Online

Markus 15 - Plautdietsch (Low German) – De Bibel bible

Markus 15

¹Tiedich näakjsten Morjen hauden de Huagepriestasch eene Berodunk met de Eltestasch un Schreftjelieede, un met däm gaunzen Rot. Un see bungen Jesus, leiden am wajch un jeewen am äwa aun Pilatus.

²Dan fruach Pilatus am: Best du de Juden äa Kjennich? Un hee säd to am: Daut es soo aus du sajchst.

³De Huagepriestasch hauden väl, wuamet see am beschuljden, oba hee jeef an kjeene Auntwuat.

⁴Dan fruach Pilatus am nochmol: Jefst du kjeene Auntwuat? Kjikj doch emol, met waut see die aules beschuljen!

⁵Oba Jesus säd noch emma nuscht, soo daut Pilatus sikj wundad.

⁶Pilatus haud daut soo daut hee an opp däm Fast een faustjenomnen loosjeef; un see kunnen sikj dän wälen.

⁷See hauden dan jrod eenen Maun, Barabas, faust, dee met aundre toop en eenen Opprua eenen Mort begonen haud.

⁸Dan kjeem eene maussen Menschen no Pilatus un fruagen doano, daut hee wada soo doonen sull aus hee emma deed.

⁹Dan fruach Pilatus an, auf hee an sull dän Judenkjennich loosjäwen,

¹⁰wiels hee wist daut de Huagepriestasch am Jesus ut Aufgonst en de Henj jejäft hauden.

¹¹Oba de Huagepriestasch hizten daut Volkj en, daut hee an väl leewa sull Barabas loosjäwen.

¹²Pilatus fruach an: Waut saul ekj dan met dän doonen, dän jie dän Judenkjennich nanen?

¹³See schrieejen: Doo am kjriezjen!

¹⁴Pilatus fruach: Wuarom? Waut haft hee fa een vebräakjen begonen? Oba see schrieejen bloos soo väl dolla: Doo am kjriezjen!

¹⁵Wiels Pilatus daut Volkj tofräd stalen wull, jeef hee an Barabas loos un leet Jesus vepitschen un jeef am han, jekjriezicht to woaren.

¹⁶De Soldoten neemen Jesus dan em Rechthus nenn, un roopten de gaunze Baund Soldoten toop.

¹⁷See neemen am eenen bleiwrooden Rock om un flochten eene Stachelkroon un saden am dee opp dän Kopp

¹⁸un fungen aun, am to bejreessen aus dän Judenkjennich.

¹⁹Un see schluagen am emma wada met eenem Ruastock opp däm Kopp un spieejen no am un kjneeden sikj ver am un bäden am aun.

²⁰Un aus see am vespott hauden, neemen see am dän bleiwrooden Rock auf un trocken am wada siene Kjleeda aun. Dan leiden see am rut, am to kjriezjen.

²¹Simon von Kiereen, Alexanda un Rufus äa Voda, kjeem jrod vom Launt un kjeem doa vebie; däm bedwungen see Jesus sien Kjriez to droagen.

²²Un see brochten am no eenem Plauz, Golgata jenant, daut meent: een Schädelplauz.

²³Doa wullen see am Wien met betret Beteibungsstoff to drinkjen jäwen; oba hee neem daut nich.

²⁴Un aus see am jekjriezicht hauden, vedeelden see siene Kjleeda un trocken Lessa, om to seenen, waut een jiedra kjrieen wudd.

²⁵Daut wia Klock näajen zemorjes, aus see am kjriezijden.

²⁶Un bowen aum Kjriez schreewen see: De Judenkjennich; daut wia waut see jäajen am hauden un wuawäajen see am kjriezijden.

²⁷See kjriezijden met am toop noch twee Merdasch, eenen aun de rajchte un eenen aun de linkje Sied.

²⁸(Soo kjeem daut rom, aus daut jeschräwen steit: “Hee wort mank de Vebräakja jetalt.”) [44]

²⁹Un dee doa vebie jinjen, scheddaden met de Kjap un lastaden un säden: Aha! Du, dee du dän Tempel dolbrakjst un en dree Doag oppbust,

³⁰rad die selfst un komm vom Kjriez rauf!

³¹Jrod soo deeden uk de Huagepriestasch un Schreftjelieede unjaenaunda äwa am spotten un säden: Hee haft aundre jeholpen, oba kaun sikj selfst nich halpen.

³²Lot dän Christus, dän Kjennich äwa Israel, nu vom Kjriez rauf komen, daut wie seenen un jleewen kjennen. Un dee waut met am toop jekjriezicht wieren, schullen uk äwa am.

³³Dan opp Meddach wort daut dree Stund äwa daut gaunze Launt diesta.

³⁴Un Klock dree no Meddach schrieech Jesus lud: Eli, Eli, sabachtani? Daut meent: Mien Gott, mien Gott, wuarom hast du mie veloten?

³⁵Aus eenje von dee, dee doabiestunden, daut hieeden, säden see: Kjikjt emol, dee roopt dän Elia.

³⁶Dan rand eena un leet een Schwom voll Wienädikj trakjen, stuak dän opp eenen Ruastock un hilt am dän han to drinkjen un säd: Wacht, well wie mol seenen, auf Elia am woat komen raufnämen.

³⁷Un Jesus schrieech lud un jeef dän Jeist opp.

³⁸Dan reet de Gardien em Tempel von bowen bat unjen entwei.

³⁹Aus de Offizia, dee jäajenäwa von Jesus stunt, sach woo hee schrieech [45] un sienen Jeist oppjeef, säd hee: Dis Maun wia werkjlich Gott sien Sän!

⁴⁰Doa wieren uk Frues, dee von wiet auf tookjikjten; mank dee wieren Maria von Magdala, un Maria, waut dän jinjren Jakobus un Joses äare Mutta wia, un Salome.

⁴¹Dise Frues wieren en Galiläa met am jewast un hauden fa am jesorcht. Doa wieren uk noch väle aundre Frues, dee met am wieren metjekomen no Jerusalem.

⁴²Aus daut Owent wort, un wiels daut de Dach wia, aun dän see reedmuaken toom Sabat,

⁴³neem Josef von Arimatäa dän Moot, bie Pilatus nenn to gonen un no Jesus sienen Kjarpa to froagen. Josef wia een ierlicha Rotjäwa un eena, dee uk no daut Gottesrikj luad.

⁴⁴Pilatus wundad sikj, daut dee aul [46] doot wia, un foddad dän Offizia un fruach däm, auf Jesus aul doot wia.

⁴⁵Un aus hee daut derch dän Offizia utfunk, leet hee Josef dän Kjarpa.

⁴⁶Dan koft hee feinet Lienzeich un neem Jesus rauf un wekjeld am en daut Zeich en, un läd am en een Grauf, daut en eenen Steen utjehakt wia, un rold eenen Steen ver daut opne Loch.

⁴⁷Un Maria von Magdala un Joses siene Mutta Maria pausten opp, wua see am hanläden.