Read Plautdietsch (Low German) – De Bibel Markus 16 Bible Online

Markus 16 - Plautdietsch (Low German) – De Bibel bible

Markus 16

¹Aus de Sabat dan äwa wia, koften Maria von Magdala un Jakobus siene Mutta Maria un Salome scheenrikjende Eelj, dän Dooden entosaulwen.

²Un aum ieeschten Dach en de Wäakj, tiedich zemorjes, aus de Sonn oppjinkj, kjeemen see nom Grauf,

³un see fruagen sikj unjarenaunda, wäa an dän Steen von de Graufdäa wajchrollen wudd.

⁴Oba aus see oppkjikjten, sagen see daut de Steen, soo groot aus dee wia, aul wajchjerolt wia.

⁵Aus see em Grauf nenjinjen, sagen see aun de rajchte Sied eenen jungen Maun en witte Kjleeda setten; daut jeef an doch eenen grooten Schrakj.

⁶Dee oba säd to an, see sullen sikj nich ferchten: Jie sieekjen no Jesus von Nazaret, dee jekjriezicht wort. Hee es oppjestonen; hee es nich hia. Kjikjt, daut es de Städ, wua see am hanjelajcht hauden.

⁷Oba got un sajcht siene Jinja un Petrus: Hee woat ver junt no Galiläa gonen; doa woa jie am seenen, soo aus hee junt säd.

⁸Vewillat, daut see zettaden, jinjen de Frues vom Grauf un randen doavon. Un wiels an soo angst wia, säden see daut kjeenem.

⁹Aus Jesus dan tiedich dän ieeschten Dach en de Wäakj, oppjestonen wia, leet hee sikj daut ieeschte von Maria von Magdala seenen, von dee hee säwen beese Jeista rutjedräwen haud.

¹⁰See jinkj un leet dee weeten, dee ieescht bie am jewast wieren, un noch hielden un truaden.

¹¹Aus dee hieeden, daut Jesus läwd, un daut see am jeseenen haud, jleewden see daut nich.

¹²Nohäa, aus twee von an opp een Launtwajch jinjen, leet Jesus sikj von an en eene aundre Jestault seenen.

¹³Dan jinjen dee trigj un säden de aundre daut. Oba see jleewden dee daut uk nich.

¹⁴Nohäa leet Jesus sikj von de Alw seenen, aus see eeten. Un hee schull an, wäajen äaren Ongloowen, daut see dee nich jejleeft hauden, dee am jeseenen hauden, no däm daut hee oppjestonen wia.

¹⁵Hee säd to an: Got en de gaunze Welt nenn un prädicht aule Menschen daut Evangelium.

¹⁶Wäa doa jleeft un jedeept woat, woat seelich woaren; wäa oba nich jleeft, woat vedaumt woaren.

¹⁷Un waut dee uttieekjnen woat, dee doa jleewen, es dit: See woaren en mienem Nomen beese Jeista utdriewen, un en onbekaunde Sproaken räden.

¹⁸Un wan see Schlangen hauntieren, ooda Jeft drinkjen, daut woat an nuscht schoden; dee woaren de kranke de Henj opplajen, un dee woaren jesunt woaren.

¹⁹Un aus de Har Jesus met an jerät haud, wort hee em Himmel nenjenomen, un sad sikj bie Gott to de rajchte Haunt dol.

²⁰Dan jinjen see rut un prädijden aulawäajen. Un de Har wirkjt met an un bekjraftijd daut Wuat derch Wundatieekjens, dee doaropp foljden. [47]