Read Plautdietsch (Low German) – De Bibel Markus 7 Bible Online

Markus 7 - Plautdietsch (Low German) – De Bibel bible

Markus 7

¹Dan kjeemen de Farisäa un eenje von de Schreftjelieede, dee von Jerusalem jekomen wieren, un saumelden sikj om am.

²See sagen daut eenje von siene Jinja met orreine Henj daut Broot eeten, daut meend see hauden sikj nich de Henj jewoschen.

³De Farisäa, un äwahaupt de Juden, äten nich aundasch, aus sikj no äare Eltestasch äare Väaschreften de Henj to wauschen; [16]

⁴un wan see vom Moakjtplauz komen, äten see nich onen sikj ieescht to wauschen. [17] Soo hoolen see sikj aun väl aundre Väaschreften, soone aus Kuffels, Kaunen un Jefässa von Koppa [18] wauschen.

⁵Dan fruagen de Farisäa un Schreftjelieede Jesus: Wuarom hoolen diene Jinja sikj nich aun onse Eltestasch äare Väaschreften, un äten daut Broot onen sikj de Henj to wauschen?

⁶Hee säd to an: Jie Heichla! De Profeet Jesaja haft von junt gaunz rajcht verut jesajcht, soo aus jeschräwen steit: “Dit Volkj ieet mie met de Leppen, sajcht Gott; oba em Hoat sent see wiet auf von mie.

⁷See deenen mie vejäfs, wiels see lieren sest nuscht aus Menschen Väaschreften.”

⁸Jie haben Gott siene Jebooten veloten, om Väaschreften von Menschen to hoolen; soowaut aus Kuffels un Kaunen utwauschen, un noch välet mea biesied.

⁹Un wieda säd Jesus: Sea fein hab jie Gott siene Jebooten oppjehowen, om june Väaschreften to hoolen.

¹⁰Moses säd: “Du saust dienen Voda un diene Mutta ieren” un: “Wäa Voda ooda Mutta flieekjt saul dootjemoakt woaren.”

¹¹Jie oba lieren: Eena kaun to Voda ooda Mutta sajen: De Help dee jie von mie hauden haben kunt, es Korban. Korban meent: Daut es Gott jejäft.

¹²Dan lot jie eenem nuscht fa sienen Voda ooda siene Mutta doonen,

¹³un soo moak jie Gott sien Wuat to nuscht derch de Väaschreften, dee jie oppjestalt haben. Un soo moak jie daut met väle Dinja.

¹⁴Jesus roopt daut Volkj wada no sikj un säd: Horcht emol aula no mie un vestot dit!

¹⁵Doa es nuscht, waut eenen Mensch veorreinicht daut von buten en am nenn kjemt; een Mensch woat derch daut orrein, waut ut am rut kjemt.

¹⁶(Wäa Uaren haft toom hieren, däm lot hieren.) [19]

¹⁷Aus hee de Menschen veleet un trigj em Hus jinkj, fruagen siene Jinja am, waut daut Jlikjnis bedied.

¹⁸Hee fruach an, auf see uk noch soo stomp wieren: Kjenn jie daut nich seenen, daut een Mensch nuscht veorreinjen kaun, daut von buten en am nenn kjemt?

¹⁹Daut jeit am nich em Hoat nenn, oba en de Moag, un dan ut däm Kjarpa rut. Doamet säd Jesus daut aulet Äten rein wia.

²⁰Hee säd noch wieda: Waut ut eenem Mensch rut kjemt, moakt am orrein;

²¹wiels von bennen ut eenem Mensch sien Hoat komen schlajchte Jedanken, Huararie, Stälsucht, Mort,

²²Ehebruch, Jiez, schlajcht sennen, Schuftarie, Lost, Aufgonst, Lastren, Stolt un aule Dommheit.

²³Aul dit schlajchte kjemt von bennen un veorreinicht eenen Mensch.

²⁴Dan veleet Jesus doa un jinkj no de Omjäajent von Tierus. [20] Hee jinkj doa en een Hus nenn un wull nich daut et irjentwäa weeten sull, oba hee kunn sikj nich vestäakjen.

²⁵Eene Fru, dee een Dochtakje met eenen orreinen Jeist haud, haud von am jehieet, un kjeem un foll ver am han.

²⁶Daut wia eene griechische Fru un staumd von Sierien Feenizien. Dee prachad am, dän Soton ut äare Dochta rut to driewen.

²⁷Oba Jesus säd to ar: Lot de Kjinja sikj ieescht saut äten; daut es nich fein, de Kjinja daut Broot wajch to nämen un de Hunj väatoschmieten.

²⁸See säd to am: Jo, Har; oba soogoa de Hunjkjes unja däm Desch, äten de Kjinja äare Kjreemels.

²⁹Dan säd hee to ar: Wiels du dit sätst, go dienen Wajch; de Soton haft diene Dochta veloten.

³⁰Un see jinkj trigj no Hus un funk äare Dochta em Bad, un de Soton haud ar veloten.

³¹Un aus hee wada ut de Jäajent von Tierus un derch Sidon jinkj, kjeem hee nom galiläischen Mäa, medden en de Jäajent von Tieen Städa.

³²Dan brochten see eenem no Jesus, dee doof wia un schwoa räden kunn, un prachaden am, siene Haunt opp am to lajen.

³³Un hee neem am gaunz auleen fa sikj, läd am siene Finjasch en de Uaren un spieech un tukst am aun de Tung.

³⁴Dan kjikjt hee nopp no däm Himmel, un deep bewäacht, säd hee: Hefata! daut meent: Moak die op!

³⁵Am wieren de Uaren plazlich op, un waut am de Tung bunk wia wajch, un hee räd dietlich.

³⁶Dan veboot Jesus an, daut irjentwäm to sajen. Oba je mea an daut veboden wort, je mea räden see doavon.

³⁷Un see wundaden sikj äwa aule Moten un säden: Hee haft aules goot jemoakt; hee moakt soogoa de doowe hieren un de Stomme räden.